Mizote
zingah RK Lianzuala (Fam) hi hrelo kan awm a nih pawhin kan tam hauh loang. Central
Kristian Thalai Pawl hruaitu hlui a nihna te, All India Radio-a chanchin thar
buatsaihtu a nih thin te hi rual u deuhte chuan an hriat tan dan a ni ang a.
Keini thangthar zawkte chuan Zonet Cable TV hi kan hriatna bul ber chu a ni
ang. A chanchin ringawt hi ziak dawn ila; kan ziak seng dawnlo a. Hetia kum
naupangte a min boral san hi a uiawm zia kan la hre dawn chauh niin a lang.
May
ni 29, 2019 khan Zonet lama a thawhpui thinte chuan RK Lianzuala’n kum 2015
chhunga Facebook-a thu a ziah thinte chu lakhawmin a bua siamin an chhuah a. He
lehkhabu hi cheng 300 man (Perfect binding) leh cheng 500 (Hard binding) a awm
a. He lehkhabu ‘release’ zan hian ka kal ve theilo a; Zonuni hnenah cheng 300
man chu min lo lei sak turin ka chah a, ani’n min lo hawn sakin a thlawnin min
la pe zui a, ka lawm hle.
He
lehkhabu hi ‘thuhmahruai’ telloin phek 527 a chhah a ni a. A chhungthu
zawnawlna hi A AW B indawta remin a chhungah erawh January ni 1 atanga RK
Lianzuala thuziah/status chu dahin December ni 31, 2015 in a tawp a. Thupui chi
hrang hrang niin chhiar ninawmloh tawk leka sei, thu tha tak tak leh a hun lai
mila ziak, zir tlak khawpa ngaihnawm leh bengvarthlak leh engtiklai pawha hman
nghal theih tur a ni a. Facebook lama RK Lianzuala ‘wall’ kan en chuan heng a
thuziah te hi mi sangkhat dawnin an chhiar ziah a ni tih kan hre thei ang a.
Hetia a bua chhiar theih a Zonet Publication te’n an lo buatsaih hi a lawmawm
hle. Social Media kaltlanga RK Lianzuala kut chhuak zawng zawngte hi vawikhata
chhuah vek sen a nih loh avangin la chhuah chhunzawm leh zel tura hmachhawp a
ni.
He
lehkhabu hi kan sawi tak ang khan thupui 365 a awm a. Heng thupui chi hrang
hrang atang te hian RK Lianzuala rilru put hmang te, a vei zawng te, Mizo te
min hmangaih zia te, dikna leh rinawmna a duh zia te kan hmu thei a. Chungte
chu a tlangpui lo tang lang ila-
Mi
thilchhinchiah thei tak leh lehkha chhiar tam a ni: RK Lianzuala hi he lehkhabu
atang hian mi inchhiar zau tak leh thil hre zau tak a nih zia a lang chiang hle
a. A thuziah te reng reng hi ama tawn hriat te, Pastor te thusawi a hriat te,
khawvel miropui te thusawi a hriat leh a chhair leh an nun dan atang te a bul tanin
keini’n kan lo hman tangkai ve theih dan tur zawngin a kuai her a. Kan hman
tangkai ve dan tur leh kan entawn ve theih dan tur te min kawhhmuh nghal zel a
ni.
Kohhran
hmangaihtu a ni: Kohhran chungchang a ziah thenkhatah te hian pawl bik (Denomination)
lam a sawi uar lo a. Kohhran zawng zawng huapin a sawi a, kan that tlanna tur
leh kan hmasawnna tur lam hawiin a ziak thin. Entirnan ‘Sunday School leh
Pianthar’ tih a ziahah te pawh tawngkam fimkhur tak hmangin koihhran dangte tan
pawha chhiar nuam turin a ziak a. Kohhran a duhkhawp tawklohna a sawi pawhin na
taka sawisel lo in rawtna tha zawk rilru pu chungin a tawp a khar thin.
Dikna
leh takna duh mi a ni: ‘Thil ropui tih’ tih te, ‘Ei zawnna’ adt tih a ziah
atang te hian mi thil tih tak tak duh mi; kan thiamna leh kan hnathawh te pawh
dik leh fel taka hlen chhuak tur kan nih zia min fuih nasa hle a. ‘Mi pawhin an
ti tho’ tih a ziah te hi a ngaihnawmin a zir tlak takzet. ‘Thatchhe Thufing’
tih a ziah te, ‘Rinawmna’ tih a ziahte hi kan inzir tharna tur lo ni mawlh teh
se.
Thalai
leh chhungkua a vei: ‘Phaia Mizo thlaite u’, ‘Nula mu rei’ adt a ziah tang te
hian thlaite a vei zia lang a. Tin ‘Valentine’s Day’ tih a ziah atang te pawh hian a hriat theih awm
e. Tin, chungkua a veiin ‘Chhungkaw tan Sakhua’ tih a ziah te, ‘Patling’, ‘Nutling’
tih a ziah te hi mitin in kan chhiar makmawh leh kan inzirna tur a ni ang.
Pathian
tih mi leh mi chapo lo a ni: RK Lianzuala hi he lehkhabu atang hian Pathian tih
mi leh a nun lairil bera Pathian tih mi a nih zia a lang chiang hle a. Good
Friday te, Easter Sunday te leh Kristiante hunpui a a thuziah atang te leh a
thuziak zawng zawng deuh thawah hian Pathian a tih zia a lang chiang hle. Tin,
a thuzikah hian fak tlak a fak a, chawimawi tlak te chu a fak hmiah hmiah a.
Ama mimal chanchin leh a dik zia te, a rinawmzia te a a sawi lang ngailo, mahse
tunge a nih chu kan hriat kha.
Kan
sawi zo seng dawnlo, chuvangin he lehkhabu hi lei la, lo chhiar ve teh. RK
Lianzuala lo ngaihsanawm zia te, a rilru put hmang dik zia te, mi hrethiam thei
tak, beisena nei tlat mi leh a tha zawnga thil thlir mi a nih tlat zia te, he a
thuziak tlawm tak atang hian keini Zofate hian zirchhuah tur kan ngah zia leh
he lehkhabu hi kum khat chhunga thil thleng awmze neia sawizawm leh chhui let
theih a nihna te leh rolting a nih zia te hi hmu thiamlo a i chhiar hmaih a nih
chuan ziak leh chhiar i thiamlo ah ka ngai ang!
Comments
Post a Comment