Kan Inṭhen Tur Hi

Zofate zingah chuan Rimawi khawvela sulhnu nghah ber pawl C. Dinthanga hi hrelo kan awm awmlo e. Tun hnaiah C. Dinthanga hla phuah pakhat ‘Kan Inthen Tur Hi’ tih H. Laldanglovi nen mawi tak maia an sak chu F. Hmingthanmawia te pafa chuan an lo sa tharin hla hi You Tube lamah en a hlawh hle a.  

He hla chungchang hi C. Dinthanga ka va zawt chiang a. He hla hi kum 1980 tawp lama Venghnuai Middle School Aizawl a a tawh laiin chunchawlh awm hleiin a phuah a nih thu min hrilh a. Phuah chhan erawh a neihloh thu min hrilh.  Class VI Scholarship exam a hnaih avangin zirlai naupangte study camp an neih pui a. Zing inkaihthawh nan he ‘Johny Please Don’t Cry’ tih hla an ‘play’ thin a. Chuchuan a rilru a luah deuh a ni ang e, he hla thluk hmang hian he hla hi a phuah ta a ni. 

AIR Aizawlah  leh C. Dinthanga Album pahnihna ‘Khuanu Samsuih’ ah khan a telh a.   Chumi hnuah chuan Peter C. Lalrinmawia leh F. Zothanmawii (Fam) te chuan an sa dun tawh bawk. 

Kan sawi tak ang khan he hla hi ‘Johny Please Don’t Cry’ tih hla thluk a ni a. C. Dinthanga chuan hla a phuah zingah he hla chiah hi Sap hla thluk a lak awmchhun a nih thu leh F. Hmingthanmawia te pafa hian an sak dik tawkloh thu min hrilh. 

He hla hi mipa leh hmeichhe inchhawn a sak chi a ni a. A phuahtu te hun lai hian Mizoram khawvelah nula leh tlangval inngaizawng te tana inbiakpawhna tha ber chu lehkhathawn kha a ni a. Tun lai angin WhatsApp, Facebook te chu a awm ang tih pawh an ring phalo a. 

Chuvangin an ngaihzawng te nen a hmun hrana in awmsan kha a lunglen thlakin, rinawm tak leh chhel takin innghah kha an tih tur a ni a. 

Chuvangin he hlaah pawh hian inhmangaih takte chu hmun hrana awm awm a ngai ta mauh mai si a. A mipa zawk hian eng emaw vangin an khua chhuah san in hun rei tak mai  a ngaihzawng telloa hun va hman chu a huhphurh tak zet a. 

Chu ai mah chuan a awm nem zawk leh rilru no zawk hmeichhia chuan a ngaihzawng pa nena an sulhnu engkim awmna – an khua leh an in te chu lungleng reng renga hun hman zawhna’n a hman tur thu a lo hrilh a nih kha.  Chuvangin an pahniha awm hrana inthen a ngai tur chu vanduaithlak an tiin an tawrh zawhloh an rin thu an sawi a nih kha. 

Mahse a mipa zawk chuan rilru puitling tak pu in an thil tawn mek chu hriatthiam tum hram hram turin an han inhmen renrawn a, mahse harsa chu a ti a ni! A hmeichhia zawk pawhin an hmalam hun atan tuna awm hran rih chu a tha zawk tih chu hre the mahse lunglen han tawrh ngawt ngawt mai leh a hmangaih ber tello a hun leh ni tamtak a lo hmang zo tur chu tawrh har a ti em em a nih kha!

Kan Inthen Tur Hi

Phuahtu: C. Dinthanga

Satute: C. Dinthanga & H. Laldanglovi

Peter C. Lalrinmawia & F. Zothanmawii (Fam)

F. Hmingthanmawia & F. Lalhriatchhungi

Suihlung leng hian fam mahila

Min dem suh ang che aw ka di

I tel lova chhingkhual chan chu

Tlei hian keizawng ka inringlo

Ka di ka chan tur I dawnlo

Nang zawng mualtin va tuan zawkah

Keizawng sulhnu run riangteah

Mahriak lunglen ka tuar ang maw!

Ka ngai ngamlo nang ka then tur

Awi kan tuarah vanpui a chim!

Tuar zo hian ka inringlo

Nangnen kan inthen tur hi

Nemten chhana lak thiam ila

A zia awm ngai e suihlunglen

Tiin lairil ka han hnem a

Mahse maw  a zual zel si

Hmatiang kawl lo eng tur chu

Kan tan hlimna ni mah sela

Nemten chhana lak ka thiamlo

Duhlai sakhmel ka then tur che