Ka thih hunah chuan

Thi leh tur a piang ka nih miau avangin thihna chu ka pumpelh thei dawn lo a, ka la thi ngei dawn a ni. A hun leh nî tur chu ka hre lo a; mahse a lo la thleng ve ngei dawn a ni. 

Social Media lamah ka thih thu hi ka ṭhiante leh ka ṭhian ni lemlo; min hre ngai reng reng lo te pawhin an lo hre ve ang nga. Chutih hunah chuan ka chhûngte chu an rilru a nâin an ṭap ve ngei ang tih ka hria. Ka thlarau chu khawiah nge a kal ang tih chu Pathian thu thu a ni a, kei chuan ka lungkham bur thei lo a. Ani min hmangaih a min tlantu kutah hian ka dah tawp mai a ni. 

Orissa lama Missionary a ka lo thawh ve tawhna te khan ka thih thu hi an lo hre ve mial a nih chuan min ui thu chu an sawi ve ngei ang a. A chhan chu zing tin deuh thaw kha kan driver Hippi-a te in ah khan ka zuk len ve ṭhin avangin min ui ve ngei ang. 

Arsenal fan - ka ṭhiante pawhin min ui ve ka ring a. Mi ṭawngthei tak, an fiam nasat leh an ngamtlâk tak ka nih ve avang te, Arsenal Fans Group- WhatsApp leh Facebook lamah te ka 'active' ve em avang pawhin ka thihni na nâ nä chuan min ui ve ang.

Min ngaina a min hrechiang ve tu tak tak te ka lo nei a nih ngai chuan ka thih hlimchhawnah chuan thu ka lo ziah ve tawh ṭhin te hi an lo chhiar ve mai thei a. Ka Blog leh Facebook a ka 'wall' te pawh an lo 'check' ve mial mai thei a, chuti ang taka min ngaihlutu chu ka lo nei ta lo a nih pawhin ka thih tawh miau avangin ka rilru pawh a na tawh lemlo ang. 

One In Christ Band Member te hi chuan min ui der ve viau ang a; keipawhin an zai ngaihthlak theih se ngaihthlak ka la duh fan ang tih ka hria. 

Mi rilru ka lo tihnat tawh tam tak te, ka tlinlohna leh ka sualna vanga min ngeitu te leh min haw êm êm tu te pawhin ka thih takah chuan ka sualna aiin ka ṭhatna tlemte chu min ngaihtuah chhuah sak lêt ve ka ring a. College-a ka classmate te pawhin mi hlim thei tak, â tak leh ṭawng duh tak ka nihna kha an hriat nawn ve awn awn ka ring. 

Ngaihzawng ka lo neih ve te pawhin khawvel ka chhuahsan tih an hriat chuan an rilru ka tihnat tawhna zawng zawngah min ngaihdam vek ka ring a; rilru chhia leh min ngeina thinlung tumahin an put zui ka ring tawh lo. 

Mi beisei ka phaklohna te, ka tlinlohna leh sualna zawng zawng te, ka mize danglam tak te leh ka nihna ang ang te chu a neitu kei ka thih tawh miau avangin min ngaidam vek ang tih ka hria. 

Ka thih hlimchhawnah bak tu lainat leh khawngaih mah ka hlawh zui dawn lo a; hriat reng zui pawh ka nilo ang. Khawvel chu a dam a te ta a ni a, kei ngei pawhin mitthi tawh chu ka hre zui reng lo a; chuvangin ka dem lo. 

Ka thihni champha a lo thlen châng te, ka piancham a lo thlen changte a min lo hrechhuak ve leh ziah ṭhin hi tumah an awm pawh ka ring lem lo a, chuvangin ka vui lem lo - vui tur pawhin ka dam tawh miau dawn silo a.

Ka duh anga ṭha in ka dam laiin khawvel ka hmang biklo a; chuvangin ka thihnî leh a hnulama ka chanchin an sawi zui dan tur chu keima chanchin ngei a nih avangin vui thei leh rilru nâ tur ka ni dawnlo a; ka ni thei tawh bawk hek lo ang. 

Ka tih sual leh ka tih dikloh zawng zawngte hi min ngaihdam sak ula; ka thih hnûah ngaihdam ka dil theih tawh dâwnloh avangin tûnah hian in ngaihdamna chu ka lo dîl lâwk lawm lawm a ni.

Ka thih hnuah chuan - mihlim thei tak, â tak leh hmangaihna la nâ ve thei tak ka nih thu hi chu min lo sawi zui sak ve ṭhin ula. Ka ruang in vui zawh a khawhar in in lên hunah chuan 'Ka hre ta' (Yes I Know) tih hla kha min lo sak sak ve turin ka ngen a che u.

Engkimah ka lâwm a; min ngaidam nawn fo ang che u. Lan chhuah tir thiamlo engang mah ila- 

Ka hmangaih che.