Tunge ka puante dek kha?

Chanchin Tha bu pathum Matthaia, Marka leh Luka ziak te kan chhiar chuan kan thupui khi Lal Isua tawngkam a nih thu leh kum sawmpahnih zet hmeichhe thi putin damna beiseia Isua a deh avanga Lal Isua sawi a ni tih kan hre theuh awm e.

 

Chanchin Tha bu pathumte hian an ziah dan tawngkam chu in ang veklo mahse Lal Isua thiltihtheihna beiseiin he hmeichhe khawngaithlak tak hian Lal Isua hi a pan a ni tih erawh chu kan hre thei awm e. Hetih lai hian Lal Isua hi inkhawmna in hotu Jaira fanu tidam tura kal a ni a, amah zuitu hi mi tamtak an awm bawk a ni. 

Lal Isua tihdamna beisei tu hmeichhe thi put hi Leviticus 15:25-32 a kan hmuh angin an hnam Juda sakhaw danah bawlhhlawh a ni a, mipui zing atanga inthiarfihlim tur a ni a. Heti ang natna nei reng rengin mi an khawih chuan a khawiha kha an bawlhhlawh zel nia ngaihkhawpa an thinhrik a ni. A khawihtu nih kha a zahthlakin a khawiha nih pawh a thinrim thlak a, Judate Talmud bu phei chuan heti ang thi put natna hi vawi sawmpakhat aia tlem lo anchhia lawh turin a sawi nghe nghe. 

 

Chuti khawpa natna tihbaiawm leh tenawm, doctor te’n an tih dam theih siloh; thian kawm leh inkhawm pawh thiang velo leh mipui zingah pawh awm thei velo khawpa nun chep chu nimahse Lal Isuaah damna beiseiin; an dan leh hrai pawh pawisa lo a thih huam in Lal Isua puan hmawr fem tal dek turin huaisen takin a lo penchhuak a nih kha. Marka ziakin a sawi dan chuan a puan hmawr va deh hi Lal Isua thuilohkawr fual hmawr pehbuk pali zinga pakhat niin, pehbuk pali leh a suihna hian dan bu panga a en tir a. 

Chuti taka rinna nasa leh thih pawh huama Amah dektu chu Lal Isua hian a lo hai reng reng lo a, “Tunge ka puan te dek kha?” tiin zawhna a siam nghal a nih kha. A zirtirte pawhin mipui tamtakin Lal Isua chu an nek avangin chu zawhna chu an hre lthiam loin mi tamtakin an nekin an dek tiin an chhang a. Luka ziaka kan hmuh angin Lal Isua chuan a thiltheihna chhuak khawpa dek tu a neih thu in a chhang a nih kha. 

Chuti taka rinna nasa leh Lal Isua kawrfual hmawr chauh pawh deka damna beiseitu chu Lal Isua’n a hai theilo a. An hnam dan leh hrai bawhchhetu ni mahse Lal Isua’n rinna pawimawhzia tarlangin khawih leh deh thianglo in a deh thu hi sawiloin a rinna chu a dam pui thu hmeichhia leh mipui hriatah a puang chhuak a ni. 

Helai thu atang ringawt pawh hian Lal Isua hnena kal tur hian misual tawpkhawk leh mi tenawm tawpkhawk hi kan awm theilo a ni tih a lang chiang hle awm e. Kan thiante, kan khawtlang leh kan ramin min hnawl leh thinhrik, natna hlauhawm ber ber, natna anchhedawng ang hiala kan ngaih HIV/AIDS vei, mi beidawng tawpkhawk leh beisei tur nei tawh reng renglo khawpa awm mek pawh kan ni ang. 

Mi te hnawl, mi te hriatloh leh dam aia thih thlahlel zawk khawpa beidawnna khuarkhurum thuk ber a tang mek kan ni thei e. Kan harsatna, kan natna leh kan manganna te hi miten engtikahmah min hriatthiampui loh tur leh min tihdamsak theihloh tur khawp nasa pawh a ni theiin doctor te tih dam theih tawh ngailo tur pawh a ni thei. 

Engpawhchu nise he hmeichhe thi putin Lal Isua puan hmawr chauh pawh dek se damna famkin a chang dawn a ni tih a hriatna rilru hi nei hram hram ila. Chu rilru nena Lal Isua hi kan pan a kan deh phawt chuan Lal Isua thiltihtheihna hi kan tan a chhuak dawn chiang a ni tih hi nang leh kei hian hre nawn hram hram ang aw? 

Lal Isua thiltheihna kan tana chhuak tur khawpa ring tur leh beisei tur hian nang leh kei hi Lal Isua’n min nghak a ni.