Roreltute thu kan awih vek ang em?

Tirhkoh Paula’n Rom 13:1-7 ah roreltute thu kan awih tur a nih thu min hrilh a. Kan ram hruaitute leh roretute an dik tawkloh pawha an rorelna hnuaia kun tawp mai tura ngaihna hi kristiante zingah tam tak kan awm awm e. Chuti ang a roreltu thalo te pawhin he lai Bible chang hi thur chhuak in tanchhanah an hmang fo thin a. Tirhkoh Paula hian hetih hun laia Rom khua a mite hnena an chunga rolreltute thu awih tura a hrilhna chhan hi kan zirchian erawh chuan roreltu thalo leh sual takte thu a kawi a ngila zawm ngawt tur kan nilo tih kan inhre thei awm e.

Paula hian Rom khua mite hnena lehkha a thawn hun lai hi kum AD 85 vel niin Bible zirmi te chuan an ngai deuh ber a. Kan hriat angin Paula hian kan Bible Thuthlung Thar ah hian lehkhathawn 13 zet mai a nei a. Rawngbawla zinchhuakin hmun hrang hrang a tlawh a; lehkha a thawn a ni tih kan hriat kha.  Rom lehkhathawn tur a ziah lai hian hetih hun laia khawvel a khawpui ber Rome hi a la tlawh lo a. Hetih hun laia ram ropui tak a la tlawhloh Spain chu Rome atang hian kal a duh a. (Rom 15:25, 28)

Hetih hun lai hian Rom ah hian bawih tam tak an awmin Kristian sakhua a than chhoh lai mek a ni a. Rom a Kristian hmasa te pawh chu bawih a ni a. Chung kristian bawihte chu an pute laka hel loa thuawih tur leh tuar turin Paula hian he thu hi a sawi a. Buina leh hlena an chawhchhuah chuan Kristiante bawihte chuan nasa takin an tuar dawn a ni. Chumi hre reng chuan leh heng bawih te dinhmun mil hian Paula hian a sawi hi a ni tiin Bible zirmi te chuan an sawi.

Tuna kan rama roreltu kan hrawn mek te leh ro min la relsak zel turte thu hi a dik loh pawha zawm hmiah hmiah tur kan nilo tih hi kan hriat chian a ngai awm e. Roreltu fel leh thate thu chu awih tur kan nih thu hi chu sawi ngailo in kan hrechiang sa a. Mahse roreltu thalo leh diklo te hi dodal ngam miahlo tura Kristian nih erawh hi chu Paula min zirtirna a nilo tila kan sawi sual awm lo e. A tul a nih phawt chuan Kristiante hian kan ram hruaitute, kan chunga rolreltute hi an diklohna leh an fellohnaah chuan khalh ngil tur leh zilh turin mawhphurhna kan nei tih kan hriat a pawimawh hle.

Thuhthlung Hlui lama Zawlneite rawngbawlna kan en chuan an hun laia sawrkarna chelhtu lalte diklohna pawh an do nasa hle tih kan hmu thei awm e. Kum zabi pariatna (BC) lai vela zawlnei Amosa, Hosea, Isaia leh Mika te pawh khan mihausa leh rethei inkar zau tak te, mi hausa in mi rethei an tihduhdah te, sakhaw lama an kal sualna nasa tak te kha an sawisel in an thil tih diklo te an puangchhuak a thin a ni tih kan hre awm e. Tin, Lal Isua pawh khan sakhaw hruaitute leh sorkar hruaitute thil tih dikloh kha a huaisen takin a sawisel a ni tih kan hre awm e.  

Kan ram hruaitute ah hian mi tamtak hi chu kan beidawng tlang a ni tih hi media a kan thuziah leh sawi a tang te hian a hriat a. Tunah hian chu kan hruaitute laka tanga kan beidawnna te, kan ram leh hnam hmasawn chak lo lutuk te, retheih leh hausa inkar zau ta tial tial mai te hi kan hmuh hmaih awm lo e. a. An that tawklohna leh dik tawklohna te, hma kan sawn hleihtheihlohna ah te hi ngun taka ngaihtuahin roreltu tha leh fel hi kan mamawh zia kan hai awm lo e.

Chumi siamtha tur chuan Kohhran mite hian kan hruaitu thlanchhuah tur atang hian mawhphurhna kan nei nghal a ni tih kan hriat chian a hun tawh hle. Kan ram hi hmasawn ve tak tak tur te, Kristian ram a nihna te chawi nung thar leh tur te, ram rolelna tha a awm theihna tur te in keini Kohhran mi te hian tihtur leh mawhphurhna thui tak kan nei a ni.

Kan chunga roreltu tur kan thlang leh dawn a, Pathian tih mi leh kan ram hmangaih tak tak tu; kan chunga rorletu tha thlang chhuak tur hian chanvo hlu tak kan nei a. Chu kan chanvo hlu tak chu kan ram leh hnam tan, kan kristianna thlenga hmasawnna a awm theihna turin kan hruaitu tur te hi thlanchhuah i tum ang u. Rorletu sual leh thalo te laka kun reng tur Kristian kan nilo tih kan inhriatchhuah a hun tawh hle.