Ka lawm e Lalpa, i malsawmna vangin

Kum 2013 kum tawp lamah ni ta in ka hria, ka nau hian a phone ah Pathian hla pakhat hi a chhuah a. Chu hla chu ka vawikhat ngaihthlakna a nih avang leh nalh ka tih em vang chuan ka nau chu ka’n zawt chiang a, chu hla chu ‘Ka lawm e Lalpa,  i malsawmna vangin’ tih hla a nih thu leh ‘One In Christ’ te sak a nih thu min hrilh a, vawi tamtak ka ‘play’ nawn tir nghe nghe.

Chu hla chu nalh ka ti em em mai a. Pathian malsawmna kan dawn nasat zia leh lawm avanga Pathian hnena lawmthu sawina hla tha tak a ni tih ka hria. Kum 2014 a Orissa a ka awm hnu ah he hla hi Sap hla a ni tih ka’n hre ve hnuhnawh a! A sap hla pawh chuan Saptawng harsa lo tak a nih avang chuan ka ngaihthla ngun hle.

Tun hnu ah ‘One In Christ’ te chu kan bel chiang a, an hotupa Alvin Lalruatfela hi ka Arsenal Fan pui a ni tih te ka’n hre chhuak ta zel a. He hla pawh hi amah Alvin-a leh a thiannu Maria te lehlin a ni tih te min hrilh a, an letling thiam in an sa nung-nalh em em bawk a. He hla hi Mizoram pumah a lar chhuak a ni tih pawh kan hre awm e.

He hla phuahtu hi James Easter leh the Easter Brothers te niin kum 1975 khan an phuah a. Lal Isua thusawi, Chanchin Tha Matthaia ziak 6:33 "A ram leh a felna chu zawng hmasa zawk rawh u, tichuan, heng zawng zawng hi a pek belhchhah dawn che u nia" tih kha he hla kan ngaihthlak hian kan rilru ah kan hrechhuak nghal thei awm e.

Khawvel changkang tawh tak leh mahni inhaivurna leh inbenbelna khawvel ah hian Lal Isua zuitu nih avanga rethei leh nun dik, mahni tanghma diko tak leh pamham taka hai velo nih chuan mawl nihna leh nuihzatrukna khawvel ah kan cheng mek a. Khawvel mite’n min thlir , nun khawhar leh rethei, beisei tur pawh neilo leh mawl ru riau ah min ngai a. Kan thenawmte leh kan ‘level’ pui nia an hriatte’n min hausak khalhin in leh lo tha min din khalh sup sup a. Chutih laia keini chu hmasawn lo leh rethei reng mai, hausa ve thiam lo leh a na chang hre ve lo mimawl tiin min lo sawi sep sep a.

Mahse, an va hre diklo em tiraw u? Kan nun chhungril ber hlim zia leh Lal Isua vanga Chantuan ro kan nei tih kan hriat chian em avanga kan lawmna hi han hmu thei se zawng! Chuvangin Lalpa kan lawm e, malsawmna chhiarsenloh min vur a vangin.

Kan chenna tur in leh lo min buatsaih sak a – zanah tui tak maia kan mutthilh theihna tur in. Nitin kan mawmawh ei leh intur te a thlawn liau liau in min pe a, kan silhfen te nen lam. I hmangaihna, zahngaihna leh enkawlna kan dawng a, chumai chu nilo in chhungkaw duhawm tak min la pe zui a. Lalpa, kan chunga i mawlsawmna min vur zozai hi kan chhiar seng lo a, chuavangin lawmthu kan hrilh tawp mai che ni!

Kan in leh lo, kan thil neih te leh kan Bank Account ah te chuan engmah a awm lo. Mite tan ngaihsan tlak leh zahtlak kan ni hauhlo tih kan in hria a, chhuan tur reng reng kan neilo. Kan silhfen te pawh ‘branded’ a nilo a, second hand-hand leh chhawng a ni. Thil chhuak thar leh tun lai ber ber, a tha ber ber leh nalh ber ber te chu kan nei pha lo a, kan sin in kan ha pha lo.

Mite’n engmah kan neihloh thu hi sawi se thudik a ni. Mahse Lalpa, kan ta ni tur leh kan neih ve theih tura i lo awm hlauh hi kan va vannei em! Chu Nang kan neihna chauh che chu kan tana pawimawh ber leh hlu ber a ni si a! Pawn lam hausakna leh ropuina chu kan nei lo tih kan inhria, mi te pawhin hmuh tur an neilo. Mahse Lalpa nang kan neih tlatna che hi mete’n min hmuhpuilo mahse kan lawm em em a, kan ta I lo nih duh avang te, malsawmna chhiarsenloh min vur avang te leh Chatuan Nunna min pek avang hian – kan lawm e Lalpa!

Ka lawm e Lalpa, I malsawmna vangin

(Thank You Lord, For Your Blessings On)

Lettu: Alvin & Maria
Satu: One in Christ Band

Khawvel mi ten min thlir reng,
Ka nunkawng har tak hi;
Beisei tur neilo min ti,
An va hre lo em;
Chhungril ah hian ka hlim si,
Aw min han hmu thei se;
Ka lawm e Lalpa, i malsawmna vangin.

As the world looks upon me, as I struggle along
They say I have nothing, but they are so wrong
In my heart I'm rejoicing, how I wish they could see
Thank you Lord, for your blessings on me

Chenna in tur min buatsaih,
Hahchawlhna tur min pe;
Ei leh in tur min pe in,
Silh leh fen min pe a;
Hmangaihna in min hruai thin,
Chhungkaw duhawm min pe;
Ka lawm e Lalpa, i malsawmna vangin.

There's a roof up above me
I've a good place to sleep
There's food on my table
And shoes on my feet
You gave me your love Lord
And a fine family
Thank you Lord, for your blessings on me

Hausakna chhuan tur ka nei lo,
Silhfen tha nei lovin;
Sum leh pai tam ka nei lo,
Mahse nang ka nei;
Chu mawlh chu ka tan a hlu ber,
Miten hmu lo mahse;
Ka lawm e Lalpa, i malsawmna vangin.

Now I know I'm not wealthy, and these clothes, they're not new
I don't have much money, but Lord I have you
And to me that's all that matters, though the world cannot see
Thank you Lord, for your blessings on me.