LEI LEH VAN THIL ZAWNGTE AIIN

Beginner Department kan nih lai atang tawha Pathian fakna hla kan hriat hmasak, sak nuam leh vawn awlsam em em, vawiin thlenga hla chuai theilo leh Central KTP Conference Hla Bu ah pawh tum eng emaw zat an lo telh tawh chu 'Lei leh van thil zawngte aiin' tih hla Seventh Day Pastor C. Saikhuma'n kum 1979 September thlaa a phuah hi a ni. 

Kan tet lai, hla thu awmzia leh a chhungril (substance) kan hriat hma atang tawhin hi he hla hi kan sa nasa thei em em a. A thu hi a awlsam in hriat reng a nuam a. A thluk hi naupang te tan pawha sak awlsam tak a nih vang te pawh a ni ang -  heti tak maia mitinin kan sak thiam. Chu mi phenah chuan a thu leh a chhungril (substance) lo ropuizia kan hriatthiam ve hnu ah phei chuan thinlung leh tihtakzetin he hla hi kan sa ta fo mai a nih hi. 

Pathianin he hla thu awl leh mawl te mai hi nasa takin a hmang a. He hla hi phuah a nih hnuah hre miahlo chu Zofate ah hian kan awm lo ang tiila kan sawi sual awm lo e.  Pathian min hmangaihna leh kan sual a tlanna hlut zia ngaihtuah nguna hre chiang apiangin he hla hi thinlung leh tihtakzetin, Pathian fak leh chawimawi nan kan sa thin a nih hi. 

He khawvel hi nitin kumtinin a changkang chho zel a. A nawmna leh inawihtleina tur thil tamtak a awm tawh a. Chung thil te a lungawina zawngtu tan chuan lungawina tur tawk thil tamtak hi hmuh tur a awm a ni tih hi phat rual a ni hauh lo. Chung thil te chuan min hip bet tlat a, a nawmna leh a chakna lak ata chu tal chhuak zo tawhloa boral pui ta hi mi tam tak kan awm tawh a, kan la awm zel dawn bawk.

Chung khawvel thil zawng zawngte aia hlu leh ropui, khawvel piah lam thlenga kan tana hlu ber leh kan innghahna pumhlum, kan rinchhan ber tur leh kan chhuan ber tur zawk chu Lal Isua thihna Kraws hi a nih thu he hla phuahtu hian min hrilh a. Khawvela boral mai tur leh chatuan hremhmuna boral mai tur chu Lal Isua'n Kraws lerah kan aia thiin Chatuan Nunna min pek avangin Lal Isua Kraws chauh hi kan chhuang a ni tiin min hrilh a ni.     

Chuvang chuan Lal Isua min chhandamtu hnenah chuan kan nih ang angin, kan sualna leh tlinlohna ang angin kan in pe tawp mai a ni - A nunna hlu tak chu min pek tlat tawh avangin. Kan theihtawpin  Amah hmangaih let chungin kan chawimawi ang a, Van rama kan luh thlengin kan tana a nun hlanna leh min chhandamna ropui zia hi kan sawi bang dawnlo a ni.   

 Chuti anga Lal Isua hnungzui tur leh Atan chauha inpek kan tum avang chuan he khawvel ropuina leh mawina te chu kan theih ang angin kan hnawlin kan kalsan a. Khawvel pawhin min dem chang leh mawl min tih chang te, min nuihzat chang te a awm thin. Mahse chung harsatna leh buaina karah pawh chuan hmangaihna vanga min chhandamtu thihna Kraws hlutna thuruk chu vawnga vuan tlat chungin he khawvel hi chhuahsan turin kan inbuatsaih a nih hi tiraw u?

Khawvela awm kan nih miau avangin Lal Isua tana inpek pumhlum kan duhna kawngah kan mit chak zawng leh kan it zawng te'n kan rilru a ti buai fo a. Chu lam kawng zawk han zawh a han dai pelh leh te pawh kan nei thelh thelh a, kan nei fo bawk a nih hi. Chung thil itawm leh mawi, duhawm leh sual kawnga min hruailut hlen tura tawktarh duh awm tak tak te chu kan mit in kan hmu a, kan bengin a hre bawk. Mahse heng zawng zawngte hi Thlarau Thianghlim puihna leh hruaina rinchhan tlat in kan hnarin kan hnawl thei dawn a, hnehna chu kan chang ngei dawn a ni. 

Aw Lal Isu, keini chaklo leh pui ngai reng, sual lama rilru awn reng leh tluk san leh fo thin tu che khawngaihtakin min hruai zel la, min ngaidam nawn fo ang che. Chuti ang chuan chaklo leh tling lo tak chungin i hnung zui zel hi kan duh in kan tum ve fan fan a. Nakin ah i lo kal leh huna Nangmah ringtute i hnenah i hruai hun ah chuan, khawngaihtakin keini pawh hi min hruai ve ang che aw Lal Isu?

LEI LEH VAN THIL ZAWNGTE AIIN

Phuahtu : Pastor C. Saikhuma

Lei leh van thil zawngte aiin,
Ka Lalpa Kraws ka chhuang a;
Chutah chuan in ka Lalpa chu,
Ka aia a thih vangin.
Chhandamtu hnenah ka inpe,
A nunna min pek vangin;
Hmangaihna in ka chawimawi ang,
Chatuan ram ka thlen thleng in.
Keiin khawvel ka khengbet a,
Khawvel in min khengbet a;
Ka Lalpa Kaws vuang chung zelin,
Leiram hi ka chhuahsan ang.
Ka mithmuh leh ka beng hriat ten,
Suallam ah min hip mahse;
Thlarau thianghlim in min hruai a,
Hnehna chu ka chang ngei ang.
Aw, chhandamtu min hruai zella,
Damlai kawng chhukchho ah hian;
I tlansa te i lawr hunah,
Kei pawh min hruai ve ang che.