ISUA VANAH A AWM A

Sap Upa - Rev. F.W. Savidge leh Pu Buanga - Rev. J.H. Lorrain te'n Mizo Kristian te tana Pathian hla an phuah hmasak ber chu 'Isua Vanah a awm a' tih hla hi a ni tih kan hre theuh awm e. Kristian Hla Bu kan hman mek ah hian number 130 na ah a awm a. Kum 2015 khan Mission Veng Kohhran Zaipawl in Music Video siamin nalh takin an sak pawh kan ngaithla fur tawh ang.

He hla hi kum 1895 vel ah an siam tawh a, kut ziakin Zosaphluia - D.E. Jones kha an hnuchiah a. Zosaphluia chuan hmala in  kum 1899 - a Mizo Kristian Hla Bu hmasa ber an tih chhuah an a telh tih F. Vanlalrochana'n min hrilh a, ka lawm hle. 

Ka rilru ah he hla hi tun hnaiah a awm reng mai a. He thu ka ziah hma lawk hian ATC Male Voice Conductor Kennedy Lalhmangaiha room ah ka han chho a, tingtang nena min sak sak turin ka han ngen a. Ka vanneihna belhchhah turin ATC Male Voice Member pahnih Rinchhana leh Makuka te an lo awm hlauh bawk a. Tichuan Makuka'n tingtang a perh a, kan sa ho a, an chungah ka lawm hle.

He hla an siam lai vel hi kum 1895 vel bawr a nih chuan Mizo Kristian te kan la tlemin ziak leh chhiar thiam pawh kan la tlem hle ang a, Bible pawh hi kan la nei kher lo ang - Bible bu pum kan neih pawh kha kum 1959 ah chauh a nih kha. Mahse Mizo Kristian tiak tir te khan Pathian fakna hla kha an mamawh em em dawn si a. Tichuan Sap Upa leh Pu Buanga te hian Mizo Kristian tiak tir te rilru leh ngaihtuahna leh dinhmun (context) hre ran in he hla hi an siam dun ta a ni ang tih a rin theih a. An inpekna leh an ngaihtuahna sen nasat zia kha a ropuiin a hlu ngawt mai!

A hla thu hi kan en chuan Zotawng an hman pawh a la mawlin hla thu un leh ril pui pui a nih loh zia kan hre thei a. Anni pawhin Mizo tawng an thiam ang angin leh Lal Isua hun hman dan leh khawvela a lo kal chhante tarlang thei tur ang berin he hla hi an buatsaih a ni tih a hriat a. Zotawng zirchawp leh nghala heti ang hla tha leh ropui, Lal Isua chanchin leh a lo kal chhan te ropui tak maia hla hmanga an lo phuah chhuak mai thei hi a ropui tak zet a, Thlarau Thianghlim pawlna ropui tak an chang a ni tih pawh a hriat hle. 

A hun laia Mizote dinhmun ngaihtuah khan heti ang a hla thu awl leh sak nuam, mahse min chhandamtu Lal Isua chanchin tawikim taka sawi thei bawk si phuah chhuah har dun tur te hi tun hnua ngaihtuah let leh hian an ngaihsanawmin an fakawm tulh tulh mai. A thluk hi Sacred Song and Solos a mi number 376 na an hmang a ni tih Kristian Hla Bu ah kan hmu. 

Mizo Kristian ring thar, ziak leh chhiar thiam sawlh sawlh leh thiam miahlo,  Bible pawh a bu pumpui chhiar tur la nei manglo te hnenah he hla hmang hian Lal Isua chu khawvelah lo kalin min chhandamtu a nih zia min puanchhuah sak a. Lal Isua chu kan aia thi a tholeh, min chhandamtu a nih zia he hla ropui tak hmang hian min puanchhuah sak a, Mizo Kristiante kan vanneih zia chu vawiin thlengin a taka tawngtu leh hre tu te kan ni.  

Lal Isua kha Vanah awmin Pathian fapa ropui em em nimahse mihring te avangin lei ah a lo kal a. Mihring te anga lo awmin keimah min chhandam a duh avang liau liau in he khawvel ah khan a lo kal a nih thu Bible ah kan hmu tih hi Pu Buanga leh Sap Upa te khan hla hmangin min puan chhuah sak a ni. 

Lal Isua dam lai chuan khaw hrang hrang ah kalin damlo -pitar, putar, naupangte leh mi zawng zawng chu a khawngaih avangin a ti dam a ni tih kha Mizo Kristian ring thar te kha min hrilh leh a. A thu mai pawhin mitel, kebaite leh mitthi te a tih dam thu kha min hrilh a ni. 

Tin, Lal Isua chu khawvelah keimahni anga a lo awm lai khan Pathian thu min hrilh fo a, chu a thusawi chu ka awih chuan min chhandam dawn a, ka awihloh erawh chuan Pathian - Jehova chuan min hrem dawn ani tih min hrilh leh bawk. 

Pathianin thu a pek kha Isua chuan mi a hrilh thin a. Mahse chu a thusawi chu mi thenkhat te'n an awih loh a, thenkhat te erawh chuan an awih a. Mahse a hnampui ngei Juda mi te khan an awihloh avangin Kraws ah an khenbeha an tihlum thu te chu a mawl thei ang berin min hrilh. 

Chuti ang chuan Lal Isua chu kan sual aia a thi a. A thiante'n phumin nithum chinah a tho leh in min chhandamna tur chu a thawk zo a. Tunah vanah awmin min chhandam a duh em em a ni tih Sap Upa leh Pu Buanga te hian he hla hmang hian min hrilh a ni.

ISUA VANAH A AWM A

Phuahtu: Rev. F.W. Savidge (1862-1935)

              : Rev. J.H. Lorrain (1870-1944)

Isua vanah a awm a,

Khawvelah zuk lo kal a!

Mihring angin a lo awm, 

Keimah min chhandam turin;

Baibulah ka hmu thei e,

A va tha kher em ve le!

Khaw tinte a fang fo va,

Pitar, putar, naupangte,

Mi zawng zawng a khawngaih a;

Thuin mitdel, kebaite,

Mitthi pawh a tidam a;

Heti-ang a ti fo thin.

Isuan heta awm lai khan,

Thu tha tak a sawi fo va;

Ka awih chuan Lalpa Isuan,

Keimah min chhandam ang a,

Awih lo ila Jehovan,

Dik takin min hrem ang a.

Thu a pek kha, Jehovan,

Isuan mi a hrilh thin a;

Thenkhatin awih an duh a,

Thenkhatin an duh lo va;

Awih lo mi an thinur a,

Isua an tihlum ta a.

Heti-angin Lal Isua,

Ka thih aiin a thi ta;

A thianten an phum ta a,

Ni thum china tho lehin;

Tunah vanah a awm a,

Min chhandam a duh em e.