TAJ MAHAL

Khawvela thilmak pasarih an thlan chhuah zinga lang phak Taj Mahal hi mi zawng zawngin kan hre awm e. A awmna hmuna la kallo pawhin a thlalak leh a awmna hmun, a chanchin hi chu kan hre vek awm e. India rama Mughal Lal Shah Jahan-a’n kum 1623-1653 chhunga a sak niin a nupui Mumtaz Mahal-i’n an fa 14 na Gauhara Begum a neih laia a boral avangin  a nupui hriatrengna thlan atana a sak a nih thu hi kan hre theuh awm e.

Taj Mahal hi 73m (240 ft) a sang a ni a, Agra, Uttar Pradesh, India a awm a ni tih kan hriat kha. Nitinin mi sang tamtakin an tlawh reng a, kum tin mi maktaduai 7-8 chuangin an thlawh niin an chhut. Taj Mahal sakna atana an sum hman ral zawng zawng hi India pawisa in  Tluklehdingawn 52.8 vel niin an sawi.

Taj Mahal thlan

Taj Mahal hi a hlut danglamna ber nia ka hriat ve chu Sailungvar a sak a nihna hi a ni. Honeymoon hmanga zin te, hmu ve chak hrim hrim te, zirlai te, khawvel ram dang mite adt chu a tlawhtu langsar te an ni. Heti ang thil ropui leh hlu tak mai mit ngeia a hmu a tlawh ve thei nih chu a hlu in inchhuanna tham te pawh a ni ve awm e. Chuvang te pawh a ni ngei ang – thlalakpui tu reng an tamin Social Media lamah pawh Taj Mahal bula thla la kan hmuih nasat theih em hi!

Keima mimal bik chuan Taj Mahal ka hmuh chakna chhan ber chu Hmangaihna vanga sak a nihna lai tak hi a ni a. Presian Lal fanu Mumtaz-i hi a hmeltha leh thatloh te, a fel leh felloh te chu kan hre pha tawh hauh lo a. Mahse a pasal Mughal Lal Shah Jahan-a hi chuan a hmangaih thlu ngiang a ni ang- Taj Mahal a sak dan ah hian. Chu tak chu keima mimalin hlu ka tih leh ka hmuhchak chhan ber a ni a. Khawvel mihring te zinga hmangaihna vanga luangliamin a hmangaih zia lantirna tura a thiltih langsar ber leh hlu ber a ni ti ila thu uar lutuk kan ni awmlo e. 

Hmangaihna hi chu a hlu ngawt mai! Khawvelah hian hmangaihna tluka hlu thildang hi zawng ta ila, nunna nei te chuan a aia hlu hi kan hmu kher awmlo e. Chu hmangaihna chuan a hmangaih tan chuan engkim a ti thei a, tihtheihloh pawh a ti thei thin. Chu mi lan chianna ber chu Taj Mahal hi a ni ngei ang. Sum leh pa tamtak sengin, hnathawktu tamtak te’n kum 30 chhung te meuh an sa a. A sakna hmanrua lah Sailungvar a ni a, a hlu in a dangdai a, khawvelin he hmangaihna hi an hriat phah a ni. Hmangaihna hi a hlut zia leh a inpekna thuk zia kan sawi apiangin Taj Mahal hi kan sawi hmasak ber tur leh mit ngeia kan hmuh theih a ni ang. 

Chuti tak chuan Muslim Lal, Shah Jahan-a hmangaihna chu a ropuiin khawvel in a hmangaihna vanga Taj Mahal a sak pawh a hlutin mi maktaduai chuangin an tlawh luih luih a nih hi. Khawvela thil hlu leh ropui kan sawi apiangin hmangaihna vanga din Taj Mahal hi kan sawi hmaih thei ngailo ang. Taj Mahal hlut zia kan sawi apiangin hmangaihna hlutzia hi kan hre tel nghal zel bawk awm e.

Chuti kau chuan mihringte pawh hian kan hmangaihte tan kan luanliama kan inpekna a thukzia han ngaihtuah hian Pathian min hmangaihna phei chu a va hlu dawn em tiraw?! A hlut zia leh a thukzia hi sawi chhuah thiam theih a nilo ang a, sum leh pai in a hlutna hi lei theih a ni hek lo ang. Chuti taka hlu leh thuk a nih rual chiah chuan a thlawn liau liau in kan la dawng zui si a! Pathian min hmangaihna hi a va hlu em! 

A fapa Lal Isua Krista chu a thlawn liau liau in min pe a. Chatuan Nunna kan neih theihna turin hmangaihna vanga luangliam kan Pathian thil min pek leh min tihsak hi a va hlu em tiraw? Taj Mahal aia ropui leh hlu zawk Van ram min buatsaih sak a, chu chu kan neih theih nan a fapa Lal Isua kaltlangin Chatuan Nunna leihlawn min lo dawh sak a, a duh a piang chu leihlawna lawn tur chuan min la sawm zui – hmangaihna nen!  A va thukin a va hlu em –Pathian min hmangaihna hi!

Heti taka min hmangaihtu hi nang leh kei hian sira hnawl atan mai mai chuan a pamhai lua a, chuvangin he hmangaihna hi hmangaihna nen i chhang let ang aw? Kan hmangaih let ve loh lai pawha kan tana engkim min pe a min tihsaktu kan Pathian hi kan hmangaih let ve tak zet hun ah phei chuan nang leh keia chan tur hi thu leh hla hian a sawi chhuak zo dawn lo.

Lalpa, ka hmangaih che, min hmangaih si a!