North East Express Rail chu Guwahati Station aṭang chuan zîng lam dar 9:45AM ah chhuak in India ram khawpui ber Delhi lam pan chuan a tlan ṭawk ṭawk a. Fiamthu a 'YMA Train' an lo tihfiam fo angin Rel dang lo kal te chu kawng a lo kian zel a, zin kawng a thui duh hle.
North East aṭang chuan India ram hmun laili lam pan chuan a tlan zel a, tlai lam dar 5 velah chuan Rêl chu a khat ṭha tawh fu a, ṭhutna tur seat neilo te pawh kawngka bulah chuan an bungraw neih ang ang te nen chuan mutmu an tuah a.
Thlasik lai a nih avangin boruak a vawt ang reng fu a, chak taka Rel a tlan phei chuan boruak a vawt hle. Chuti ang boruak vawt tak mai hnuaiah chuan Rel a ṭhutna nei velo, han en mai pawh a rethei ve tak an ni tih hriat em em te chuan an puankawp neih chhun, pan ve tak mai chu an sin a, an bungraw neih lukham chuan an mu hlawm a.
Chuti ang chuan Rel chu a tlan thui tawlh tawlh a, seat neilo chu an ṭhahnem tawlh tawlh bawk. Rel Sation ṭhenkhat ah phei chuan mi tamtak chu an lo mu hlawm a. A ṭhente chu hmeichhe naupang te an ni a, thawmhnaw lum leh puan lum sin tur pawh an neilo.
Khawawt tak hnuiah chuan rel lo kal hun nghakin an ṭhu a, a ṭhen chu an lo bawk a. Zan riah lo ei mawlh mawlh pawh an awm. Rel kawng sira miṭhenkhat te phei chuan Rel aṭanga chaw ei ruahna bawm an paih thlâk te chu an lo chhar a, a kuangbang tlem lo la awm te chu lawm takin an chhar a. Tin, a kuangbang zût tur awm lo an chhar fuh châng erawh chuan beidawng takin an thil chhar chu an paih let leh ṭhin.
Isu, Sleeper Class Rêl ah hian lo chuang ve la ka ti ngawt mai. Heng ṭhutna pawh changlo a kawngka bula khawvawt tak mai tuar te hnen ah hian i hmangaih zia thu te lo hrilh a, an tan a hlu in beiseina thar an neih phah nasa dawn em mai.
An tan engkim hi i tuar in Chatuan Nunna i pek thu te hi heng mi chanhai te hi lo hrilh la, an taksa retheihna aṭang hian rilru hausa takin khawvel hi an hman chhunzawm theih ngei ka ring a sin. Mahse, nang chu an la hre lo zui che a, a pawi hi ka ti takzet a, i chanchin hrilh turin ṭawng ka thiam silo a, ka ṭawngṭaisak ta ngawt mai a, i lo hria ang tiraw Isu?
Isu, Rel ah hian lo chuang ve la, Station ṭhenkhat a mi khawngaihthlak tak te hi lo hmu ve la, an hnenah hian i hmangaihna ropui zia te hi hrilh la ka va ti tak! Tichuan retheiin hreawm mahse he khawvel piah lamah an tan hmun i buatsaih chu beiseina nen an thlir ang a, hlim takin khawvel hi an chhuahsan ka ring a sin.
Isu, heng mite hian nangmah hi an hre bawk silo che a, pawi ka tiin ka lainat em mai. Hei, he hmeichhe naupang te hi, kawrlum hak tur pawh neilo a, a tei ve mai mai a, a rilru hi a thianghlim hmel em em mai leh nghal. Kawrlum ṭha tak tak ha pawhin vawt kan tih laiin kawrlum haktur pawh a neilo a, a kawr hak pawh hi a la pan êm êm zui a, kawrlum ṭha tak pek ka duh takzet a ni.
Isu, Rêl ah hian a hring a hranin i lo chuang ve kherlo mai thei a, mahse engtikah emaw chuan i aiawhin Rel ah hian chuan nawn leh ka duh a ni. Heng nangmah la hre ngailo te hnenah hian i chanchin hi puana hrilh ka duh a ni. I hmangaih zia thu te hi ka thiam ang anga puan chhuah ka duh a. Rem i tih chuan Isu, engtikah emaw chuan khawngaihtakin min la tir ang che aw?
Isu, Rel a mi te hi i hmangaihzia hi hriattir a an awm theih nan keini hi khawngaihtakin hmanruaa min hmang turin kan dîl a che, Amen.
Comments
Post a Comment