Khatia Gauhati Palton Bazar bula Cachar Hill Tribe Synod House a kan thleng kha, tlai lamah chuan han teichhuah châkna a lo awm a. Tlailam dar 3 vel ah chuan Hriatpuii'n Mizoram House bula Sahuan tlawh tura min sâwmna chu pawmin kan chhuak ho ta a.
Hriatpuii chu vawikhat Sahuan ah chuan a kal tawh avangin amah rinchhan chuan Sahuan kal tur chuan keini 6 chuan Motor lo kal pakhat chu phar dingin Gauhati Zoo, Mizoram House bul hnaia awm ah kan kal duhthu kan hrilh a, ₹200/- a nih thu min hrilh a, kan kal ta a.
Thui lutuk lo kan tlankual hnuah hmun 1 ah min dinpui a, he lai hi ni e Sahuan awmna chu tiin Driver chuan min chhuk tir a. Hriatpuii chuan Sahuan awmna a nih loh thu hre mahse tih dan vak kan hre tawh silo a, kan hmalam pan chuan kan kal zel a,Brahmaputra lui ah chuan kan va kal ta ngawt a!
Brahmaputra hi chu Primary leh Middle Sikul leh High Sikul ah te kan lo zir ve nasa a, India Map kan siam pawhin kan duh duhna hmun ah kan luan tir ṭhin kha! Chutia a tak ngeia kan hmu thei ta chu kan lâwm hle a, Sahuan pawh chu theihnghilhin Brahmaputra lui ah chuan hlim takin kan kal ta a nih chu!
Mi tamtak Lui kam ah chuan an lo ding a, keini pawh chuan thla te kan la a. Kan awmna aṭanga hla vaklo ah chuan thliarkar lian vaklo hi a awm a, chutah chuan kal kan châk thu kan sawi sap sap a.
Chutia kan sawi lai chuan kam bulah ah chuan patling 1 hian Mizoṭawngin kan kal dan tur te leh Sahuan lamah chuan kal turin hun kan neih tawhloh thu min hrilh a. Tichuan Lawng awmna lam pan chuan kan chhuk a, kan hma a thliarkar ah chuan ₹20/- ṭheuh chawiin mi dangte nen chuan thliarkar panin Lawng chuan kal kal ta a.
Thliarkar hi a takah ka la hmulo a, kal pawh ka la kal lo. Daniel Defoe ziah Robinson Crusoe chanchin, a behchhana film an siam Cast Away, Tom Hanks channa kha ka en tawh a, tin a novel hi ka chhiar tawh bawk. Chu chu Thliarkar ka hnaih dan ber chu a ni. Mahse hei tunah a takin Pathian zarah thliarkar, thliarkar tak takah kan ṭhiante nen kan awm mek -Brahmaputra thliarkar ah!
Vai ho hi an fing a, chu thliarkar ah chuan Temple an sa a. Keni tihloh chu an pathian be tura chu thliarkar a kal chu an ni ber. Keini chu kal kan châk ve hrim hrim avangin kan kal a. Temple thlen dawn hnaih ah chuan pheikhawk hlîp turin min lo au lauh lauh a, pheikhawk hlip velo in kawngdang ah kan peng a, Temple chu kan han tlawh ve ta lo.
Kan nui nasa a, thla kan la nasa bawk. Sahuan kal kan tuma, mahse Sahuana kal aiin kan hlim zawk tih kan inpawm. Ramsa chi hrang hrang hmuh tur chu kan neilo a, mahse Pathian thilsiam mihring chi hrang hrang te nen kan inpawlhsawp thung.
Hmun pawimawh leh tlawh chakawm tak a nih theih nan Temple an sa a, Sakhuanna leh sumdawnna an kal kawppui thiam hle. Mi tamtakin damna zawngin sum sengin chu Temple chu an pan ṭhin tih a lang.
Keini erawh chuan a thlâwnin Lal Isua kan nei a, Amah in min zawng chhuak a, Chatuan Nunna min pe.
Keini erawh chuan a thlâwnin Lal Isua kan nei a, Amah in min zawng chhuak a, Chatuan Nunna min pe.
Comments
Post a Comment