LOVE LETTER

To.

Dearest Love, 

He lehkhathawn hi i tan ka ziak a, mahse i hmuh kher ka ring lo a. I lo hmuh hunah meuh chuan ka ziah mek laia ka rilru ang hi ka pu kher tawhlo ang. Mahse he lehkha ka ziah chhan erawh hi chu nangmah ngei i ni.

Engemaw ti khan kan intawng nawlh a nih kha! A tirah chuan min chik biklo a, ka chik bawk hek lo che. Eng nge ka tih thin a, tunge ka nih pawh i hre lo. Kei pawhin ka hre chuanglo a, mahse Facebook a kan inbiakna atangin i thil zir erawh ka hria a nih kha. 

Hmeichhe ngo ve tak a ni a, i thau bawk. Ka hmeichhe duhzawng hi ka lo hre ngailo a - tun hma khan. Mahse tun hnu ah hian thau lam deuh hi ka duh a ni tih nangmah atangin ka hriat chhuah phah! Tin, ngo lam hi ka duhthusam an ni zawk bawk - kei ka hang si a!

Chung zawng zawng chu ka hriat hma che khan i nei a, ka hriat hnu ah che ka duhthusam i ni. Kan va hlim dun thei tak! Chief Minister Lalthanhawla Building kawt ah kan inhmuh hmasak bera kan thiante'n thla min laksak khan, tlai lam dar 5:30PM vel a ni ta in ka hria. 

In veng lama pana kan haw dun a 'kawng fal tawk ka hria' i tih kha ka ngaihtuahnawn hian tun thlengin ka nuih a la za deuh a, a hlimawm bawk. Kan kut kan inchelhsak a, ke in kan kal dun hnek hnek a nih kha. Khami kawng fal deuh kha tun hnu a ka kal leh chang hian ka la hre chhuak leh fo che.

Kan inkawp laia min duh tluk zetin min then hnu hian min duhlo a! Kei atan chuan na tak a ni! Ka theihnghilh fe tawh hnu che hian ka lo hre chhuak leh thin che a. Hmangaih dang ka neih tawh hnu hian ka la hmangaih cheu che tih hi ka hre nawn leh thin -mahni ka inbum thei lo! Ka theihnghilh hlen hnu che hian ka rilru a i cham ngheh zia ka hre nawn leh thin.

Kan thil thlir dan leh kan ngaihdan kha a inanglo tih kan hriatchhuah chuan kan inkar a chhe tawh a. Nangchuan min kalsan tawh a, kei erawh chuan kal turin ka phal hlawllo che a, ka ngen che a, ka uai che a, ka ko tawk tawk che nih kha. Zing chaw kan ei lai pawhin dawhkan hnuaiah i ke ka rah beh tlat kha! I chhungte hriat i duhloh avangin i ke kha i la sawn thei silo a, chaw ei chhung zawngin i ke kha ka rap bet a nih kha!

Pencil in i lehkha tur kha vawi 2 ngawt ka ziak a, i lukham hnuaiah ka dah kha i la hria em? Chuan vawikhat envelope sen ah pawh ka ziah pahkhat kha i chhiar ang tiraw? A vaiin vawi 3 ka thawn hman che kha. Min kalsan lo tur a ka ngen nasat zia che kha tiraw?

Nang chuan min ngaihzawn tawhloh rual khan min kalsan a, i bialpa hlui kha ka 'title' a ni nghal a. Kei erawh chuan ka hmangaih tak tak hman che avangin ka bialnu hlui i ni ve thei lo a, ka hmangaih kha i ni reng tho. Nang chuan min ngaizawng a, kei chuan ka hmangaih che. 

Nang chuan bialpa angin min en a, kei chuan ka hmangaih reng tur, ka dam chhunga ka bula awm turin ka thlang che. 

Nang atan chuan hlutna nei tawhlo, mipa nep tak leh i tello awm theilo, hmuhsit awm tak leh biak pawh biak duh tawhlo ka ni.

Ka tan chuan kan inhriat tirh a i hming kha ka thinlung ah a la ngai reng.

Min ngainepna te, min runluihna te leh min tihel na te ai khan ka hriat chian hmasak ber zana i hming mawi tak, ka thinlunga cham reng kha ka dam chhunga ka thinlunga i awm dan tur chu a ni.

Mihring ve bawk i ni a,  vawi hnih-khat tal chu i inchhir ve ang tih ka ring a, ka hre bawk. Mahse mi chak tak, luhlul tak leh engkim i duhna ah chuan ti thei i nih avangin ka ring tawk che a, min kalsan hi i tan thuthlukna dik tak a ni ang tih hi ka pawmpui che. 

Ka biak tawh ngai miahloh chhan che chu ka rilru i tihnat takzet vang a ni a. 

Min ngei em em na chhan chu neih let che tuma ka biak nasat em vang che kha a ni ngei ang.

Ka phone number i block tlatna chhan kha ka 'call' i nin lutuk vang a ni tih ka hria.

Min ngaihnepa min tihel nachhan kha i tello a awm theilo mipa ka nih vang a ni tih ka hria.

Huat reng che ka rtum tawh a, biak tawh ngailo che pawh ka tum. Lo inhmuh leh palh a awm a nih pawhin hriatloh der hmak che a, ka nuna awm ngailo leh tawn ngailoh i nih ka duh. Ka hre duhlo che a, ka hre tawh ngailo ang che. Ka be tawh ngailo che a, i hming pawh ka lam ngai lo. 

Chung zawng zawng ka tihna chhan chu ka hmangaih takzet vang che a ni tih ka hre nawn.

Ka hmangaihloh hun ah che chuan ka lo be leh mai thei che ni.