Mihringte hian Pathian faka kan chawimawi theihna sang ber chu Amah faka zai hi a ni ang. Kan nungchang, kan thiltih leh kan chet dan, kan thilpek te leh kan inpekna hmang te pawh hian Pathian hi kan fak thei a. Chutih rual chuan awlsam tak leh mi zawng zawng tana Amah fakna awlsam ber chu 'zai' hi a ni.
Pathian pawh hian fak a duh in, chuti anga kan fakna tur chuan 'hla' hi a thlang bik em ni tih mai turin Bible ah pawh hian Amah fakna leh chawimawina hla awmna 'Sam' hi a lian ber a ni a, bung 150 zet a awm a nih hi. Chuti ang khawpa zai leh hla hmanga fak leh chawimawi duh chu a ni. Chuti ang bawkin Pathian fakna hla phuah thiam te leh sa thiam te chu an hlu em em a. Sermon tamtak aiin Pathian hla pakhatin kan nun hi a khawih zawk chang a awm fo a nih hi.
Pathianin mihringte hnena a thilpek hlu ber chu a fapa Lal Isua hi a ni a. Lal Isua kan tana a hlut zia hi kan ngaihtuah ngun poh leh kan chhut chhuak thiamlo zawk ang. Chu Lal Isua kan tana a lo pianchampha chu khawvela mi tam berin December ni 25 ah kan lawm thin a. Kohhran thenkhat leh hmun thenkhat ah te chuan December ni 25 hi Lal Isua lo pianni 'Krismas' ah lo hmanglo pawh nise khawvel pumpuiin a pawm leh a lawm, a hman chu December ni 25 hi a ni tih kan hre theuh awm e.
December ni 25 chiah chiah hi Lal Isua pianni dik tak a nih leh nihloh lam hi chu kan chhui zuilo ang a. Bible ah hian Lal Isua pianni, hun leh kum te hi ziakin a awm loh avangin tumahin kan sawi theilo. Mahse Lal Isua lo pian dawn leh pian lai vela thil lo lang chiang em em chu - Lal Isua lo pian thu hi hla hmanga puanchhuah a ni.
Chanchin Tha Luka ziak kan en chuan Lal Isua nu Mari chuan Pathian a fak a.(Lk 1:46-55) He fakna hla Bible mithiamte'n an sawi zui dan leh a hun lai boruak vel chu sawi lo ila. Heta thil lo lang chiang em em chu Lal Isua kan tana a lo piang (tur) hi Pathian hnena lawmthu sawia hlim tak maia zai mawlh mawlh tur kan lo nih zia a lang chiang hle.
Tin, Luka ziakah bawk hian Baptistu Johan-a pa Zakaria Pathian fakna hla kan hmu bawk a. (Lk 1:67-79) A hla thu hi kan chhiar chuan Lal Isua hi lo pian tur thu leh a fapa Johna'n a kawng a lo sial sak dawn thu kan hmu a. Hetah tanga lo lang chiang leh em em chu Lal Isua lo pianna hi fak hla sa a lawm tur kan ni. Krismas ah hian zaikhawm tluk tluk tur kan lo ni. Chu chu Pathian thu (Theology) pawh a ni.
Hetah mai hian a la tawplo a. Berampute'n beram an ven lai khan vantirkoh an hmaah lo ding in Lal Isua lo pian thu kha a hrilh a. Chumi a hrilh zawhah chiah chuan vantirhkoh kiangah van mipui te lo awm khawm in Pathian an fak a:
"Chungnung berah Pathian ropui takin awm rawh se
Lei chunga a lawm em em Mihringte hnen ah remthu leng rawh se"
(Lk 2: 14)
Chuti ang chuan Vana mipuite pawhin Lal Isua lo piang hi an lawm em em a, Pathian an fak thu hi Bible ah chiang takin kan hmu a. Chuvangin keini mihring te phei hi chuan Lal Isua min pek avang hian Pathian hnena lawmthu sawia faka zai tur kan nih zia hi i hre nawn ang u.
A bikin Mizo te phei hi zai ngaina hnam kan ni a. Kan kohhran hi thlarau lama a nun leh nunloh teh fung taka kan hman ber pawh kan zai tui leh tuiloh ah, kan lam nasat leh nasat loh a ni fo thin. Chuti ang chian chuan Kohhhran hote'n Krismas kan hlawkpui leh hlawkpuiloh kan tehna ber pawh kan zaikhawm tui leh tuiloh a innghat thui hle.
A chunga kan sawi tak atang hian engvanga Krismas leh a vuakvet ah te zaikhawm thin nge kan nih tih kan hre chiang nawn thei awm e. Krismas a zaikhawm a Pathian fak hi Pathian thu a ni tih hre nawn ila. Zaikhawm hi ning lo a uar sauh sauh tur kan nih zia te i hre nawn ang u. Tin, Krismas lai chauh pawh nilo in Pathian faka zai hi kan tih tur hrim hrim a ni.
Krismas ah chauh Lal Isua hi chawimawi leh fak tur kan ni lo a. Krismas ah chauh Lal Isua kan tana a lo piang hi kan lawm tur nilo. Kan damchhung in Lal Isua kan tana a lo pian avang hian kan lawm ang a, kan fak ang. A fapa mal Lal Isua min petu Pathian hi lawmthu sawia, faka chawimawia hlim taka zai reng thei turin kan thinlung i buatsaih ang u.
Lal Isua hi Chatuana nunna kan neihna a nisi a.
Comments
Post a Comment