SAWI NAWN LEH RAWH

Zaithiam hrang hrang te'n an sak țhin 'Sawi nawn leh rawh' (Thiam tawk tea ka ngaihtuah hian) tih hla hi ka hriat hmasakna ber chu Lalremruati (Naem-i) sak, kum 2004 ah khan a ni. 

A thlûk leh a thu hi nalh ka ti êm êm țhin a, mi a ber tan pawh a hriatthiam awlsam in a thu hi a tluang a, a thlûk hi a nalhin a satu khan a sa thiam em em bawk. Khatih lai khan naupang mai kan la ni a, a phuahtu pawh ka hre lem lo.

Ka nu kha he hla 'Sawi nawn leh rawh' tih hi ka zawt a, an tet laia a lar țhin zia thu min hrilh a, nalh ka tih em avang khan kan han sa dun nghe nghe a nih kha!

Hun a lo kal zel a, kum 2016 a ATC a BD ka zir kumin Leitan South Kohhran a kan inkhawm fo hnu ah, Sunday Sikul Superintendent Upa K. Lalthanzama chu he hla mawi leh țha tak mai hi a phuahtu a nih thu min hrilh a, a phuahtu hi zawh chian tumin hun rem chang ka nghak ta reng a, tichuan ka zawt chiang thei ta a, ka lawm hle.

He hla 'Sawi nawn leh rawh' tih hi kum 1976, Pathianni zînga Theiriat Biak in rawngbawlna neia an inkhawm laia a rilru a lo awm ațanga a phuah a a ni a. Amah Upa K. Lalthanzama tak phei hi chuan ka phuah a nilo a, Pathian min pek a ni a, hla phuah thiam pawh ka nilo a ti. A pianthar tirh lam, Lal Isua kan tana a tawrhna leh Kraws thu hlir a rilru a awm laia a dawn a nih thu a sawi a. He hla a sak chhuah hmasakna ber chu Lunglawn Kohhran ah rawngbawlna an neih lai niin a hria.

Pathian hla tamtak a phuah a, tuna Kristian Hla bu kan hman mek a number 591 na 'Amah chu malsawmna hnar a ni' tih pawh hi a phuah a ni tih kan hre awm e. Amah hi lar tumna neilo, mi inngaitlawm, mawl tak leh ã tak maia Pathiana innghat tawp mai leh ring nghet bur, nun nghet tak mai a ni a. A hla phuah hi a hun leh ni han sawi chian fak tur pawh a hre lo. Chuti khawpa pa uanglo leh langsar lo chu a ni. Amah hi chuan kan sawi tawh angin hla phuah thiam a nilo a, a hla te hi Pathian in a pek a ni a ti.

Upa. K. Lalthanzama nen

Pathian min hmangaihna hi ngun taka han ngaihtuah chet chet hian a makin a ropui em em a. Kan tana Kraws lera mualpho tak leh hreawm tinreng tuara a han thi ngawt mai hi amak em em a. He min hmangaihna leh a tawrhna chanchin hi a ngaihnawm in a thu hi a mawi em em a, a ninawm thei lo a ni. 

Sawi nawn fo ila, i hrilh nawn fo ang u. Pathian fapa kan tana a tawrhna leh Kalvari a damna famkim min pek -Chatuan Nunna thu hi a mawi in a ngaihnawm bang thei lo a ni. 

Engvangin nge ranthleng leh kraws hi a lo chan le? Min hmangaihna vang a ni. A hausa in lei leh van neitu, he khawvel leh engkim neitu ni mahse kan tana a hmangaihna luangliam leh a reitheihna chanchin hi khawvela thu ropui leh mawi ber a ni a, i sawi nawn fo ang u. 

Natna leh tihduhdahna tinreng keimahni min hmangaih vanga Kraws a a tawrh lai khan mittui nen 'Ka Pa, ngaidam rawh' tia min la dîl sak cheu te hi a va ropui êm! He Lal Isua țawngkam, hmangaihna vanga chhuak hian kan tan a va hlu in a va ropui em! Engtikahmah kan theihnghilh thei tawhlo ang a, kan rilru ah rimawi leh lungkuai ber niin a châm reng tawh dawn a ni. Chatuana Nunna kan neihna a ni sia a!

SAWI NAWN LEH RAWH

Phuahtu: Upa K. Lalthanzama
Satu: Lalremruati (Naem-i), adt,.

1. Thiam tawk tea ka ngaihtuah hian
Ka tlantu min hmangaihna leh
Ka tan Kraws-a inpek chanchin
A mawiin a ngaihnawm bang lo ve.

Sawi nawn leh rawh min hrilh leh rawh
Isua'n ka tan a tuarna kha
Kalvari ka damna chanchin
Aw ngaihnawm ka tibang theilo ve.

2. Engah ranthleng kraws a chan le?
Hausa mahse keimah vanga
A retheih tak chanchin ngei kha
Ka ning lo'ng min hrilh nawn fo rawh aw?

3. Ka Chhandamtu'n mittui nena
"Ka Pa, ngaidam rawh", a tih kha
A țawngțai kam chhuak aw mawi ber
Thinlai ah a ngaihnawm bang lo ve.