KAN INNGAIZAWNG EM?

Chapter 37

Khuanu Samsuihloh zawng

Rinawma pawh an khaw lam ah awm in, Kohhran ah leh inchhung khur tan a theihtawp chhuah in a inhmang a. A duhthusam angin Mali nen chuan an inkar chu a tawp dawnlo tih a hre thiam tawh a, pawm harsa a ti hle a. WhatsApp ah leh phone call pawhin a be tawh ngai lo. 

A chang chuan a lungleng thei em em a, an hun leh nun hlui te chu theihnghilh tum fo mahse a hrechhuak leh thin a. Kum tawp lamah chuan Aizawl a kal a, Pro. Pastor interview tur in, mahse a tling lo. A tawpna ber atan tiin Mali chu lehkha a thawn a. Chumi pah chuan Missionary turin a interview nghal a. Pathian zarah Missionary tur chuan a tling ta hlauh a. Mali lehkha a thawn dan chu heti ang hi a ni. 

Mal, 

Tunah hian Aizawl ah ka awm mek a, ka thlenin tukverh atangin in in lam ka lo thlir fo a, ka lung a leng khawp mai. Nangnena kan hun leh nun hman tawh te kha ka ngaihtuah let fo a, i bula damchhunga awm hi ka duh a, mahse chu chu a theihloh tih hi ka pawm thiam tawh a. Hreawmin na engang mahse ka tawrhchhuah hi a ngai a ni. 

Ramhlun lama petrol pump, in in hlui pan thlakna ka thlen chang apiang te khan ka duh reng vang nilo in ka hre chhuak leh thin che a. Bus kan chan thinna te khan ka lung a ti leng em em thin. Engkim kha a la ngai vek a, mahse kan pahihn erawh kan danglam tawh a ni. 

Kan hun hman dun tawh zawng zawng ah khan inchhirna ka nei lo a, demna che pawh ka neilo. Engkim huamin ka zui che a, ka thlang che a, heti anga kan tawp hi ringhlel chungin ka ring phallo a, mahse a tak a lo thlen meuh chuan ka tuar thiamlo lek lek mai.

Aizawl te pawh kha nangmah vanga nuam ka tih thin nen khan tunah chuan khawpui ni mahse i tello chuan khawram mai a ni. Ka van ruai ruai a, mahse min hnem tu ber nang chu ka tan biak phak i ni tawh lo a, awmlo i ni tawh si.

Engtiang pawhin ka rilru tina mahla ka dem lo che a, ka haw ngailo che. I kal ta rau rau a nih chuan keipawh ka zalen ta a. He ka zalenna hi a zawng zawnga Lal Isua tana hlan turin ka rilru ka siam fel tawh a. Nangpawh Kristian Chhungkaw dinpui tlak ngei tur lo tawng mawlh ang che. 

Kan inkar hre tu te hian an dem ngei ngei dawn che tih ka hria a, tun atang pawhin an dem tawh che. Nep min ti tih ka hria a, ka induhtawk thiamlo tih ka inpawm. Mahse heng zawng zawng hi ka hmangaih vang che a ni. I kal ta rau rau a, keipawh ka kal a ngai a a nih chuan ka lo let awh ngai dawnlo a. Ka mihring tumna leh ruahmanna ah chuan ka lo kir tawh ngai dawn lo. 

"Khuanu samsuih loh zawng inthen zawk mai ang aw? Thenna'n Hawilopar min thliah la, Mangtha aw? Damtakin mangtha mai le"

Chu lehkha ziak chu Rinawma chuan uluk taka thlep tha in Mali te in bula Mali thiannu Chami chu a kawl that tir a. Missionary tura a kal liam dawn ni ah pe turin a hrilh a. Chami chuan tha taka lo kawlsakin Rinawma duh ang ngeia pe tur chuan a intiam a. 

Rinawma pawh chu Missionary a tlin hnu chuan an veng lamah a haw leh ta a. Kohhran te leh khawntlang mipui, chhung te leh thenrual tha te chuan Missionary a ni tur chu an lawmpuiin an chibai liam liam hlawm a. Chuti ang chuan hun hmangin Kumthar tir ah 'retreat' neiin thla khat zet chu Aizawl ah a cham leh a. Chutih chhung zawng chuan Mali chu a theihnghilh ngailo.

Mahse, heti lam kawngah hian 'experience' a lo neih ve tawh avangin a hma ang em em a laknat leh nun buai khawpa awm erawh a tumlo a. A hmalam hun tur chu Pathian kut ah dahin hlim taka awm luih a tum hram hram a. A thiante bulah chuan hlim takin a awm a, zan ah erawh Mali chuan a rilru chu a luah leh fo thin. A hriatloh hlanin a ngaihtuah a, a inrinloh hlanin a mittui a lo tla leh lek lek thin. 

Mahse, mipa a ni a, chhel takin a tuar ang a, a tuar chhuak ngei bawk ang. Chu chu Rinawma infuihna chu a ni.  

(End of Chapter 37)

Chapter 38

Mangtha le

Thla khat zet Missionary lak thar ho chu 'retreat' an neih hnu chuan February thla tir ah Bethlehem Venglai Kohhran ah tirhchhuahna inkhawm an nei a. Rinawma nu leh pa te pawh chu Rinawma thlah chuan an lo kal ve a, chumi zan chuan Missioanry lakthar mi 27 te chu Moderator in  fuihna thu leh tawngtaina in a thlah a. Inkhawm boruak a nuamn inkhawm pawh an tha hle.

A tuk dar 10:30Am chuan Dawrpui atangin Rinawma chuan Lengpui airport pan turin Taxi a nghak mek a. Taxi fare chu a to ve em avangin a nu leh pa te chuan Airport thleng chu an lo zui ve thei dawn lo a. Chu hun chep tak tawh karah chuan a nu leh pa te nen chuan an titi awlh mawlh a. Damin an inhmu leh ang ngem? Engtik nge a lo haw leh ang? A hreawm viau ang nem? Zawhna chhan senloh zawh tur chu awm teuh mahse chung sawina hun chu a nilo a, hlim takin an inbe bawrh bawrh zawk a. 

Rinawma taxi hman tur chu a lo thlen tak hnu ah chuan, Odisha (Orissa) Mission field lama thawk tur chuan Lengpui Airport panin Rinawma chuan a nu leh pa, kut hnathawh nasat vanga pawr ve fifep te chu Millenium Center kawta traffic piont bul atang chuan a vai liam ta lauh lauh a. A nu leh pa te chuan Chanmari lam pana an fapa chuanna Taxi chu a lan theih chhung chu an thlir a.

Lengpui Airport pan ve tur midang 2 te nena inthu rual sa an nih avangin a chuanpui te nen chuan Lengpui panna kawngtluan chuan an titi thla bawrh bawrh a. A chuanpui nufa leh pa tlong pakhat te chuan Missionary an ngaihsan thu leh Rinawma pawh chu thataka thawk turin an fuih thla mawlh mawlh a. Tawngtaina lamah pawh an lo hriat reng tur thu te chu an chah a, Rinawma pawh chu a thla a muang hle a.

Chuti ang chuan Lengpui Airport chu an thleng thla a, bungrua te an 'check' zawhtir fel hnu chuan Minute 10 vel chu Thlawhna chhuah hun tur nghak chuan Airport ah chuan mi chi hrang hrang te chua an thu a, a thenin phone an hmang a, an chhungte an be sup sup bawk a. Rinawma pawh chuan a pa chu Lengpui a thlen tawh thu leh an chhuah nghal mai dawn tawh thu te a han hrilh a.

Thlawhna chu a lo thleng a, passenger te thlawhna lut tura hriattir an nih hnu chuan Rinawma pawh chu thlawhna a lut tur chuan leihlawn ah chuan a lawn chho kauh kauh a, Air-hostess chuan hlim hmel pu sangin Rinawma chu a lo nuih a, Rinawma pawh chuan a'n nuih let ve sak a. A thutna tur seat a zawn hmuh hnu ah chuan a thu a. Thlawhna tuk verh ah chuan a theih ang angin a'n hawi kual a. Tlang leh chhum dumpawl nalh tak tak te chu a thlir a. 

A ngaihtuahna chu a kal kual zut zut a, engtikah nge a haw leh  ang tih te a ngaihtuah a. An khua te, a thiante, an Kohhran te leh College a zirpui te chu a ngaihtuah kual a. A tawp ber ah chuan Mali chu a ngaihtuah thleng a.

"Ka tan chuan 'Mali Diana' kha i ni reng ang. Mangtha le"

Thawlhna chu a tlan tawk tawk a, boruak ah chuan a thlawk kang ta luah a, Rinawma chuan Mali leh Mizoram chu a mangtha ta a.   

The End