KAN INNGAIZAWNG EM?

CHAPTER - I

Inhmelhriatna

Lunglei Government College Students’ Directory chu tih chhuah a ni a. Chuta phone number pakhat chu Rinawma chuan chhinchhiah a. Chu phone number neitu chu Muanpuii - 7^th Day Kohhran, Lunglei College Veng nula a ni a, Lunglei Government College-a BA 1^st Year zir mek a ni. Chu number a chhinchhiah chhan pawh phone number inpek dikoh vang a ni. A thiannu phone number ‘digit’ tawp ber kha a chhinchhiah sual vang a ni. Mahse College khata kal an nih avangin thil pawi em em phei chu a awm lo.

Chu phone number chu Onida Handset phone ah chuan a chhinchhiah ve ta reng a. Kum 2012 Village Council inthlan result an puan laiin chu Rinawma chuan Muanpuii number ah chuan tute nge an veng lama VC an thlan tlin ve tih ‘SMS’ hmanga a va zawh chuan, chu phone number neitu chu mi dang daih an lo ni tawh a. Muanpuii chuan a lo hmang tawh lo a, Hnahthial Bazar Veng tleirawl in a lo hmang daih tawh a!

A harh a harh ta ngang chuan Radio a Hnahthial lam VC tling te an puan chu chu Phone number neitu hnen ah chuan ‘SMS’ chuan a han hrilh zut zut a, chu tleirawl chuan mak a ti ngang mai! Hetih hun lai hian WhatsApp a la awm silo a, hmel a inhmuh theih loh a, SMS hmanga inbawl kha an uar viau bawk si a. Chu tleirawl pawh chuan a bawl emaw tiin vawi tamtak an awmna a zawt a. A tawpah chuan a bawl lo tih a hrechhuak in a pawm ta chauh nghe nghe a.

Kum 2013 ah chu Hnahthial Bazar Veng tleirawl nen chuan an inhmu a, class 12 a lo  zir mek a, hmeichhe fel tak mai a ni bawk. Chu tleirawl nen chuan an inhmu zui reng lem lo a, an inbe zui reng lem lo. Facebook te a lo lar chho a, WhatsApp te a lo awm ta zel a. Facebook lamah pawh chuan thian an ni zui a. Chu tleirawl chuan College kallo in DIET- ah a kal chhunzawm tih te Facebook atang chuan a hre thei a. Chuti ang vel chu an inkar chu a ni. Chu tleirawl chuan a Facebook profile name ah ‘Diana’ tih a hmang.

Kum 2017 June thla vel a Rinawma ‘online’ chuan Messenger-ah ‘Mali Diana’ tih lo ‘green’ va va chu a hmu a. Hnahthial a a thiannu kha a nih ngei dawn hi tiin a va text ta thawr a. Heti ang in-

Jun 10 AT 8:19PM

Rinawma: ‘Bike a I chuan hunah chuan’ ( inziahna Blog ‘link’ chu Mali Diana chu a va in box a)

Mali Diana: Like (Kutzungpui pawl lian tawk tak!)

Jun 24 AT 10:27AM

Rinawma: ‘English Angels’ (tih inziahna blog link bawk a va thawn leh a)

Mali Diana:  Like (kutzungpui te deuh)…lo share zel rawh.

Rinawma: Aw le.

Chumi hnu chuan Rinawma pawh chuan a thiannu chu thuziak awmna ‘blog link’ chu a khat tawkin a thawn ta deuh reng a, a vai in pariat vel a thawn a. Diana chuan ‘Like’ leh ‘tha lutuk’ tiin a lo ‘reply’ ve leh nulh zel a.

July 7 AT 4:58PM

Rinawma: I chhiar ve ngai em?

Mali Diana: Aw..chhiar thlap thlap zel..tha ka ti lutuk.

Rinawma: I va fel ve a.

Mali Diana: Fel a mi?...’tiang hi chhiar a nuam ka ti tawp!

Rinawma: I chhiar peih pawh ka ring lem lo a.

Mali Diana: Peih lutuk..kha vang lawm lo ‘share’ zel rawh ka tih..

Rinawma chuan a thiannu Mali Diana chuan a lo la hre ve reng mai a ni tih a hria a. A inbiak khat tawh the reng nen fel a ti hle a. chuavang chuan –

Rinawma: I WhatsApp-na no min lo pe la.

Mali Diana: 8131******

Rinawma chuan number chu la chhuak in a ‘save’ a, WhatsApp ah chuan a va text a a, Mali Diana pawh chuan tha takin a lo ‘reply’ ve mai a. Thui tak erawh an inbe zui lem lo. Mahse Rinawma chuan ‘Blog’ a thu inziak ‘link’ erawh chu a khat mawi tawkin a thawn deuh reng a. Mali pawh chuan a lo ‘reply’ ve ziah a, a chang phei chuan a lo ‘comment’ ve nulh thin.

Vawikat chu Mali WhatsApp status ah chuan Aizawl veng 1 thlalak a lo lang a. Rinawma chuan Mali chu Aizawl ah a lo kal a nih a ring a, an zirna DIET- lam thil vanga Aizawl a lo kal a nih a ring a. Hetih lai hian Rinawma chu lehkha zirin Aizawl ah  a awm mek a. Chutia a thiannu Aizawl lo kal chu Aizawla a awm thu te WhatsApp ah a zuk hrilh a, Mali chuan ‘OK’ tih chauh in a lo chhang let a. Chuvangin Rinawma chuan tihbuai zui chi ah ngailo in a be zui em em lo.

July ni 23, Pathianni chawhnu inkhawm bana Rinawma’n a phone a’n en chuan Mali chuan a WhatsApp status chu a lo update a. Rinawma chuan Mali status – thlalak chu a’n en a, chu thlalak chu Mali inkhawm bang thlalak a  lo ni a. Rinawma chuan Mali chu a hriat thin lai ai khan a sang tawhin a hmel pawh a danglam tawh hle mai tih a hmu a. Mahse a’n ennawn leh a, a thiannu Hnahthial a mi kha a nilo tih Rinawma chuan a hre chhuak chiah!

Mali Facebook profile te chu a’n ennawn a, he nula hi Aizawl a mi a ni a, kum 2012 vel atanga a thiannu Diana-i kha a lo ni reng reng lo! Rinawma chuan mak a tiin a zak hnuhnawh hle a, Mali chu WhatsApp ah chuan a be nghal vat a-

Rinawma: En teh..ka thiannu Hnahthial khua kha I ni emaw ka ti a, ka hmelhriat biak ve hmiah hmiah che a, mahse i ni miah lo!

Mali: Hahha..a pawilo..a ho lutuk!

Rinawma: A tir ah khan ngatinge I sawiloh a?

Mali: Nia..mak chu ka ti ve deuh a..mahse a pawilo..a tha vek tho a nia..hahahhaaha…

Rinawma: Ka thiannu kha maw ka ti tak tak che a, I number te kha min pe mai bawk sia, ka tihpalh takzet a ni.

Mali: A pawilo…a ho lutuk...tihian kan inkawm zel thei tho a lawm.

Mali chuan Rinawma thupha chawina chu lawm takin a lo pawm a, nula fel tak chu a ni. Chuti ang vel chu ni Rinawma leh Mali te inhriat tan dan chu.

(End of Chapter 1)