KA LÂWM E LALPA

Vawiin Ramhlun Vengthar Kohhran kan tlawh chu ka hlâwkpui khawp mai. ATC lam pana kan haw kawnga Bus ka chuanna ah thil tamtak ka ngaihtuah a, Pathian hnenah hian lâwmthu sawi mawlh mawlh tur ka nihzia ka inhre-chiang nawn.

Kan têt ve deuh lai kha chuan kan retheih êm avang hian ka vui nasa țhin-Pathian lakah. Higher kan kal laiin Bus fare tur kan nei mumallo fo a-Lunglei a ka kal a vangin.

Zingah chawhmeh tur kan nei mumallo a, 'Rum Pum' ringawt hmeh châng te, Purun Sen nen rungawt a chaw ka ei te, Ajino-Moto chawm a tukțhuan ka tlingtlak tak mai mai te kha hreawm ka tiin Pathian lakah ka vui ve nasa țhin. 

Lunglei Gov't College kan kal chhûngin Jeans kekawr ₹800/- man 1 chiah hak tur ka neih te kha hreawm ka ti em em țhin a. Bag ah tur ka nei mumal lo a, țhil țha leh nalh kha ka rilru in a hria a, a leina tur dîl kha ka hreh ngawih ngawih-ka nu leh pa thawhrimzia ka hre kiau si a. Bakah pawisa kan neilo tih hi ka hrechiang hle-kan unau ah upa ber ka nih avangin. 

Chuvangin ka tuar ta mai mai a, ka ngaihsam der a, ka ngaihsam hlen ta deuh bawk! College kan kal chhung zawngin ka țhing quit țhak a. Da deuh, ro ve ri re, dum deuh chel chuan khan kan kal kum 3 ve a, Pathian zarah kan 'graduate' ve ta hram a nih kha!

Nulat tlangvalna kawngah tumah duh kha kan hlawh pha ve lo a. Hmelțha tia kan bem te khan mawihnai tak khan min hnar a, a la 'serious' chi kan lo ni kher nen-kan rilru kha a va han na thei tak e aw...

ATC ah BD zir ka dil ve a, Personal Interview ah vawi 2 ngawt ka tla a, ka beidawn zia te kha! Ka tumloh deuhin Orissa ah Missionary in ka awm a, chumi hnu ah a vawi 3 na'n BD zir ka dil leh a. Pathian zar leh a khawngaihna liau liau in ka tling ve ta a. Hei, tunah pawh BD-II niin Ramhlun Vengthar Kohhran te tlawhin kan kal a ni a. Ka va vannei tak em aw!

Ka duhthusam ang diak diak in ka nunah thil a thleng lo a. Ka duhloh dan leh tumloh dan deuhin thil a thleng fo a. Rilru na leh țap zawih zawih a ka awm chang a tam mai-BD ka zir hnu ah pawh. Pathian laka vui chang ka ngahin nun beidawn chang ka ngah mai.

Mahse tunah heng zawng zawngte hi ka'n ngaihtuah let leh a, ka tana țha tur veka Pathian remruat a nihzia hi ka hmu fiah chiang hle. Ka hlimna leh lawmna te, nuam ka tih zawng ang ringawt te hian awm ila tun dinhmun hi ka thleng ngailo ang tih ka hrechiang hle.

Kei mi tlinglo ber mai hi BD zir ve turin min thlang a, hei ngawt pawh hi ka dam chhung lawmthu sawi senlohna tham a ni tawh-Pathian lakah. Amah vangin mi in mi pangngai hmuhin min hmuh ve phah a, mite tan malsawmna thlentu hmanrua ah te min la hmang duh hial hi-Lalpa, ka va lawm êm!

Engpawh thleng se ka nunah, nangmah rinchhan a lawm zel thei turin min țanpui tlat la, kei misual hian i ropuizia, i țhatzia te puangchhuak a hril thei turin min buatsaih ang che.