Film kan en te leh thawnthu kan chhiar thin tamtak hi a changtute leh misual te inkara thil thleng a ni tlangpui thin. Hun hlimawm leh a tha lama Film/ Drama/Thawnthu tawp thin te hi 'Comedy' a ni tih Literature subject-ah kan zir thin a. A tir lama lungchhiatthlak, mahse hlimna a tawp thin hi 'Trage-Comedy' an ti thin tih pawh kan zir kha. Tin, lungchhiatthlak taka tawp thin film/thawnthu te chu 'Tragedy' a nih tih kan hre bawk.
Heng film/drama/thawnthu te hi mihring nun hlimthla, a taka thleng ngei leh lo thleng thei behchhana ziah, phuah leh chan a ni thin a. A chang chuan kan mittui a ti tla a, a changin hlim takin min nuih tir uar uar thin. Tragedy film hmuhnawm pawl chu Titanic leh Romeo & Juliet te hi a ni tih kan hriat kha. Romeo & Juliet phei hi chu Drama a ni a, khawvela drama lar ber a ni kan ti thei ang - William Shakespare ziah a nih kha.
Hindi film lamah pawh 'Qayamat Se Qayamat Tak' (Amir Khan & Juhi Chawla te channa) te pawh a lungchhiatthlak pawl a ni ngei ang. Kan film/drama/thawnthu duhzawng a zir erawh chuan a danglam thei ang. Heng zawng zawng hian a tarlan tum chu mihring nuna thil thleng thin te, lo thleng thei te leh lo la thleng tur - thleng mek te a ni tih kan hre awm e.
A chang chuan kan hringnun ah hian kan duh reng vang nilo in mi sual 'role' zawk kan 'play' tlat chang a awm thin. Duh leh hmangaih tak kan nei a, mahse anni chuan misual pa/nu ang zawk maia mim ngaiin min thlang duhlo a, mi dang min thlansan thin.
Hausak tumin hna rim takin kan thawk a, vanduaithlak takin kan chesual a, rethei leh beidawng ngawih ngawih in hun kan hman phah a, nuihzat leh hmuhsit ruk te kan hlawh thin. Misual nu/pa natna tur zawka kan lo duh thin natna tihbaiawm tak, tihdam theihloh te kan vei tlat ta tlat a! A ngaihna kan hrelo in kan beidawng takzet thin.
Kan kawngzawh lai mek ah kan hisap telloh harsatna lian leh thihna te kan tawk thin a, hriatthiam har kan ti em em thin. Engvanga heti ang vanduaina, harsatna leh thihna te hi tawk nge kan nih? Eng nge kan tihsual? Anchhia em ni?! Zawhna chhan senloh hian kan ngaihtuahna a luah tlut tlut thin.
Heti ang harsatna chi hrang hrang kan nuna a lo thlen chang hian Pathian kan au a, a chhan hi vawi tam kan zawt fo thin. Keini aia sual zawk emaw a kan ngaihte'n harsatna an tawh ve loh phei chuan kan vui nasa thin. Tin, misual chhungkua ni a kan hriat te'n harsatna leh vanduaina an tawh changin an sual vang ah kan ngai thin a, kan hmeh bel in Pathian hremna ang hialin kan ngaihsak thin.
Harsatna leh vanduaina te hi Pathian min hremna a ni lo. Kan sual vang liau liaua Pathian hremna erawh chu a awm ngei. Lal Isua hun lai pawh khan mitdel saa piang an hmu a. A zirtirte chuan, "Rabi, mitdel saa a piang hi tuin nge thil sual ti, he mi hian nge a nu leh pain?” an ti a. Isuan a chhâng a, “He mi hian a tisual lo, a nu leh pain an tisual hek lo, amahah Pathian hnathawh a lan theihna tûr a ni." tiin a chhang a nih kha (Johana 9:1-3).
Hetih hun laia Juda te pawh hian sual vanga Pathian hremna chu he mitdel chungah hian lo lang chhuak niin ang ngai a, Lal Isua'n anih loh zia leh Pathian ropuina tur zawka lo piangchhuak anih thu chiang takin a zirtirte leh mipui te kha a hrilh a ni. Kan sualna anga rulh nghal zel tur nise tun thlenga dam zo mihring hi kan awm awmlo e.
Chuvangin, kan nunah hian harsatna, vanduaina, natna- HIV/AIDS, Cancer adt te pawh a lo thleng ang. Kan duhloh zawk leh kan thlanloh zawk hi kan hmachhawn fo ang nga, kan thihpui hial chang pawh a awm ang. Heng kan chunga thil thalo lo thleng zawng zawng hi Pathian hremna a ngaitu chuan Pathian ropuizia a hre tawklo hle a ni ang a. Chuti anga mi vanduaina tawk - Pathian hremna a ngaihsaktu chuan Lal Isua thusawi khi a pawmlo in a hrethiamlo tawp tihna a ni bawk ang.
Heng harsatna zawng zawng - a te ber atanga a lian ber thlenga min tidama min chhanchhuak theitu chu LAL ISUA chauh hi a ni. Lal Isua chuan “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” a ti a (Matthaia 11: 28-30).
He Lal Isua min thlamuanna rinchhana kal mai hi kan hringnuna kawng dik awm chhun leh rintlak chatuan a ni. Engpawh tawk ila, Lal Isua hi 'answer' dik awm chhun a ni tih hria in i pan tlat ang u. Chutichuan he kan khawvel damchhunga a changtu 'role' hi kan 'play' ve zo lo a nih pawhin Varnamah Lal Isua kiangah a changtu mai nilo in a neitu kan ni ang-chatuan atan.
Comments
Post a Comment