Hellai Di

Valzotea hla phuah 'Hellai Di' hi keini thangthar leh zual te chuan Joseph Zaihmingthanga sak bak kha kan tuipui ve hman lo a. Khatih hun laia Mizo Mipa Zathiam lar ber pawl Josepha'n 'Hellai Di' tih hla aw no leh nalh em em mai a a han sa vang vang kha a phuah tu Valzotea pawh hian ngaithla ve se, a phuah chhan tleitiri kha a hmuh hmelthat phah leh zual sawr sawr ngawt in ka ring thin.

He hla hi chang hnih lek a ni a. A phuahtu hian Tleirawl hmeltha leh 'inno' em em mai a hmu a, a vei em em a. Chu chu zah pawh dawnlo in rim a va tum a, mahse a lo awmlo a ni tih he hla ah hian min hrilh a. A hla thu ngawr ngawr hi chu a hawl chin leh a huam chin a zim hle na a, hemi phenah hian thil tam tak, a phuahtu dinhmun leh he tleirawl duhawm dan tur leh 'luck' dan tur te chu a inphum hnem hle in ka hre ve thin. 

Lunglen la na mi leh duh tawh lam duh ngut ngut chi tan chuan he tleirawl, chhelo em em, nu hnap mai leh hawiher zang vah mai hi tawrh a har ngawt ang. Tawrh a har tluk zetin neih pawh a har ang-a luck em em a rinawm si a! Keini ang chhe ve tak, 'dry' ve ri re, engmah innghahna tlak neilo tan phei chuan he tleitiri lakah hian chhuan tur kan neilo a, chhuan loh tur pawh kan neilo ang.

Chu ti taka hmeltha chu kan tan chauh rinawmin min han duh tlat mai se la zawng...a nawm dan tur leh a lawmawm dan tur hi kan sawi chhuak zolo ang. Chuti taka kan thinlung luahtu a nih avang chuan va bem ve mai kha kan va duh tak em!

'Min duhloh pawhin ngai kan awh' tih te hi dawt mai mai. Kan duh ber te'n kan duhna min hnawlsak tluka na leh zahthlak a awm lo. An hmaah kan inpuang vek tawh a, a hma ang khan min en thei tawhlo a, min duhlo tih kan hriat phei chuan rilru nat leh zah fawmin kan awm a. An mahni hmu chak leh thlahlel ru em em si khan kan hel ta fo a, rilru na takin kan awm thin. Chuvangin 'risk' laka va bem ngawt chi a ni lo-a 'serious' tlat!

Chuvangin he hla phuahtu pawh hian a sawhkhawk awm thei zawng zawng hre lawk sa vekin 'Engtin ngai ang maw?' a ti nih hi. Ruih lungpuama bem chi a nilo..he Tleitiri lakah hian kan tuiral tlat tawh a, kan zuam teh hawr lo tlat!

Chuti kau a nih avang chuan a zun chuan min phuar veng veng mai a. Mahni chauha kan awm fal te hian kan lo 'dream' leh veng veng zel a. A nui ri te, a che vel te leh a hawiher hrim hrim te chuan kan rilru a luah zo a. Pawn lama damtha vung si hian he Tleitir Hmelthai zun hian Val hi min phuar chau zo a. Mi dang 'share' ve ngawt a rem hrih silo a, kan tuar tlawk tlawk mai a nih hi-Amah lah chuan a hre der roh silo a! Heti reng reng te chuan kan tuar zo dawn em ni Hellai Di?

Zak chung chungin, lut hmasa tur a 'first rawh' tia inhnawn nak nak thin nih nak a laiin, in in a kan lo len zan tum berkher khan i lo la awmlo zui a! Zaipawl hla zirin i chhuak nge, enge i tih tih i chhungte pawh kan zawt ngamlo-kan lai lutuk a! 

Zahna zawng zawng sawm khawmin kan lo leng ve nia, i lo awm lo nulh hi chu a pamhai ngawt mai! Ka vei lutuk che tih te hi i hre thiam ve lo mi? Zan tam hi nangmah 'dream' hian ka muhil thei tawhlo a sin! I duhawm zia te, i fel zia te, i hmelthat zia te ka hmuh a ka belh chian zual che hian keimah hi ka inhmu fiah tawlh tawlh a. I tan ka tlinloh zia hi ka inhre chiang tawlh tawlh a, i lakah hian ka riang takzet a ni!

Heng i laka ka 'feelings' te hi i he ve der silo a. Mahse han hrilh a han bem tur che hian ka huaisen zo rihlo a, ka riang nawn awn awn hreh a ni.  Phu che ka inti nganglo a, a ruk hian ka ngaizawng tawp mai che nih hi..

Hellai Di, i hmeltha in i va'n duhawm tak em aw!! Ka vei takzet che a, i zun hian min phuar takzet a ni! Heti reng chuan ka tuar zo miahlo ang aw.....

Hellai Di

Phuahtu: Valzotea

Satu: Joseph Zaihmingthanga etc

A mi leng hei zawng zawng zingah

Nang aia hmeltha an awm lo

Ka tan par vul mai teh la

Theihchang han nive the se aw

Biahthu Di hlan ka nuam a sin

Engtin ngai ang maw

Aw a na I zun a uai chu

Tuarzo hian ka in ring silo

Hellai Di Tleitir Hmeltha

Zatlang relthang  dawnlo hian in

In run sang ka lo lawi zan khan e

Tuar har mi u I awm si lo

I zun ngai a riang val te hi

Min dawn lo em ni lungrukah

A riang val chan hi