LUNGRUK AH MIN VEI VE RAWH

Pawl Sawm Mizo zirlaibu ah nita in ka hria, 'Lungruk ah min vei ve rawh'  tih Zikpuii Pa (KC Lalvunga) phuah hi kan zir kha. Kum 2005 ah Pawl Sawm kan zir a, thingtlang lam kan nih avangin he hla lo pianchhuah dan 'background' vel hi kan hre tam lo a. Kan zirtirtu te pawh kha (kan sawiselna lam nilo in) Mizo subject a Graduate/Master an nilo bawk nen, an thiam ang ang khan min zirtir thin a. Mahse kan zirtirtu thiam tak tak zarah Mizo subject ah khan mark kan hmu chhe ngai hauh lo. 

Ka sawi tak ang khan he hla lo pianchhuah vel dan leh a phuahchhan tih lam hi kei chuan sawi thui tur leh chhui zui tur ka hre lo a. Mahse keima tawkte ah he hla hian min hneh dan erawh chu sawi tur ka hre ve nual thung. Ka ler vang hrim hrim leh ngaihzawng neih hi ka uar/hrat vang pawh ni bik chuanglo in heti lam ah hian ka lung a leng hma em em thin a. Heng Lengzem hla lungkuai tak tak te hian ka rilru hi a hneh thei in a phuahtute rilru tur awm ang hi keima tawkah ka 'feel' ve chiam chiam zel a. An lunglen dan tur te, an rilru nat dan tur te leh an harsatna tawh thin zawng zawng te ka ngaihtuahpui ve thin a, ka mittui hi a lo tla ve nasa thin-zahthlak hian!

Mumang ni hauh silo a kan hmangaih em em in kan la hmangaih lai renga  Nupui-Pasal min neihsan thut mai han tawn chu-a natzia leh hreawm tur zia hi thu leh hla hian a puangchhuak zolo ang a, Greek tawng leh Hebrai tawngte, Latin leh English te pawhin a fiah zolo ang a, Vantirhkoh tawngte pawhin kan sawi fiah zo chuanglo ang. Chutih rual chiah chuan hlim tak leh lawm taka kan hun hman thin te mitthla ah a lo lang ve leh kher bawk hian kan rilru nat a ti zual! An inneih hnu fe kum sawmah te duh leh lo lang se...tawrh a zia deuh tur.  Kan pahniha kan hlim dun lai  kha mitthlaah a lo lang vawng vawng a-mi dang nen a kut insuih a zungbun inbun tir tur hian kan phallo che a sin! Rilruna, nunhlui ngaih leh mi dang min neihsan te hi-a rual deuhthawa vawikhata a lo thleng nghal vek hi a 'fair' lo takzet a ni!

 Kum 2020, 2030, 2035, 2040, 2060...a....kan dam chhung pawh hian kan hun lo hman dun tawh te kha kan theihnghilh ve thei dawn lo. Kan 'nih' laia kan thiante kan hmuh chang te, kan hun hman dun tawhna hmun kan kal leh chang te'n rilruah i lo lang leh vat dawn a. Nangmah ang deuh mi dang kan hmuh changte hian kan rilru ah i lo in 'refresh' leh zawr zawr ang a, i hming ang hming dang kan lam chang te hian kan lo 'feel' leh vawng vawng zel dawn che a ni. Chuvangin, hei hi kan chah ve ang che aw- Zan dar 11 hnulama Van dumpawl thiangkuk maia Thla eng ngawih ngawih i hmuh chang hian min herchhuak ve leh ta che aw?  

Thla tin Thla a bial thin a, mahse thla bial apiang chuan min hrechhuak dawn lo a, beisei chi pawh a nilo. Kum khata eng thla ah emaw ber 'Full Moon' zana Thla eng i thlir chang talin chhe te in min lo vei ve rawh aw? Kumkhat pawh chu a zing lutuk mai thei a, kum 10, 20, 30 vel emaw min theihnghilh tawh hnu ah pawh October Full Moon zan i lo thlir fuh hlauh a nih chuan khawngaihin kan hmangaih zia che kha lo 'feel' ve leh rawh aw? Chu chu a la harsat cheu pawhin, i dam chhunga Thla eng mawi i tih zan ber ah vawikhat tal min lo vei ve rawh aw? 

Hlim takin in inneih ni atangin i awm tawh ang tih ka ring a, min hre ve tawh ngai hauhlo ang tiraw? Mahse i thiante nena in nunhlui in sawi chhuah changin, mi dang bula sawilo in a ruk te in min lo hre chhuak ve leh thin rawh aw? Nangmah vanga ka mal tak zia te, ka khawhar zia te leh ka hmangaih zia che  kha lo chhui let la, ngaihnepna leh hmusitna rilru hlipin khawngaihna nen min ngaihtuah ve ang che aw-nangmah vanga riang ta hi?

Kei chuan kan inhmangaih lai hun kha ka theihnghilh ve thei reng reng lo a. Theihnghilh ka tum a, ka 'fight' ve nasa a, mahse mahni ka inbum mai mai tih hi ka in hre kur! Chuvangin ka tum buai peih tawhlo a, ka hre reng ta law law a. Ka hriatchian ber, ka theihnghilh theihloh zual lai phei chu 'Ka hmangaih che' tih dawt tello a min hrilh lai ni leh thla, hun leh hmun kha a ni.

Keimah anga rilru na hi an awm ve ang ngem tih hi ka zawng ru nasa thin a, min hnemtu hi ka mamawh ngawih gawih mai a ni. Riakmaw Sava in zana riahna tur a hrelo a thlawk kual ang khan zan ah te, chhunah te, Sunday tlai ah te hian ka mal thei em em a. Kan thiante'n an 'chhass' te an kalpui a an kawp laiin kei chu ka mal leh thin a, ka lo hrechhuak leh vawng vawng zel che.

Ka lo tap ta a..mahse a pawilo ti tawh mai ang. A nih tur a nizo tawh a, chuvangin ka pawm thiam tawh a-pawmlo mah ila. Hlim deuhin awm la, Fanau tha tak tak neiin Chhungkaw hlim tak ni ang che u. Kei chu a chang chuan Thla eng-kan lo thlir dun thin kha ka lo la tahpui leh fo a nih pawhin min lo dem bik lo la, min hmusitin min ngainep zui lo hram ang che. 

  

Lungruk ah min vei ve rawh

Phuahtu; K.C Lalvunga (Zikpuii Pa)

Satute: 1. H.Lalchawimawii, 

           2. H. Vanlalngura etc

Tawnmang silo maw lungrunpui

Khiangawi a mual min liam san

Hallo ten kan lenlai dawn in

Thlang khuan dim ka phallo che.

Aw kumtluang hrui ang sei mahse

Ka nghilh lawng hmana kan nunhlui

Zantian chhawrthla a en changin

Lungruk ah min vei ve rawh.

Mi tawn ah nau ang nui mahla

Min nghilh bik suh annem te

Nunhlui mual liam i thlir changin

A riang hi min dawn ve rawh.

Ka nghilh lawng hmana kan nunhlui

Hallo ten kan lenlai ni

Ka hmangaih ber mai che lungrun

Ti a biahthu min tiam kha

Van hnuai hnamtin zaleng zing ah

Kei ang rairah awm ve maw

Riakmaw valeng iangin kei zawng

Kaina run ka lo vai e.

Ka tahkhua sei mahse parte

Nang zawng damten mualliam la

Par ang kan lawm thin chhawrthla eng khi

Mahten ka tah pui ta'nge.

(Source/courtesy: www.mizolyric.blogspot.in)