Phone chang kang ka neih ve hma khan Onida Company Handset, Camera support lo, 1GB Memory Card support ah hian ka 'cousin' hian Lengzem hla pakhat min pe a. Chu hla chu ka ngaithlak hun ah nalh ka tih dan tur leh ka hriat reng dan tur te min hrilh a. Ka'n ngaithla ta chiah chu ka unaupa sawi ang tak tak chuan nalh ka ti em em a. Chu hla chu Myanmar lama kan unaunu Lalpanliani sak "Ka dam zo lo'ng'' tih hla hi a ni.
A thluk leh a thu kan sawi hmain a satu Lalpanliani sak thiam zia mawlh hi sawiloh a tan chuan a uiawm ang. A satu 'aw' mawlh hi tunlai zaithiam chhuak thar te zingah chuan Mizo 'sentimental' phawrhchuak ber niin ka hria-keima mi mal chuan. A han thluk thlep no nalh chho vel te hian-he hla bikah chuan Mizo pa rãp in, sum hmun leh Zawlbuk te min mitthla tir uai uai a. Khuangchawi Thla hleinga zan min ngaihtuah chhuar tir vang vang thei bawk.
Tin, he hla thluk pawh hi a no nalh ngheuh mai a, a phuahtu rilru zuk 'feel' phei chuan lunglen vanga mittui tla zawih zawih khawpa ngaihthlak theih niin ka hre thin. A phuahtu hian rilru beidawng leh inhnemna tur neilo a nih zia he hla ah hian a puangchhuak chiang hle a. A thinlung hi a hmangaih em em lakah hian a bun ruak ve takzet in a innghahna ve tak tak a ni tih a hriat hle.
A phuahtu hi KL Tluanga a ni.
Kan inrinloh laiin kan hmangaih te'n thenna thu min han hrilh thut a, awih a harsa in kan pawm theilo a. Mahse anni chu an lo inpeih sa vek tawh avangin min ngaihtuah tawh miahlo in an kal vang vang mai tawh si a! Kan la inpeih miauloh avangin mahni chauha kan awm changin kan ngaihtuah ru leh veng veng zel a. Min ngai tawh miahlotu, kan rilru tikehsawm vektu chu kan ngaihtuah zui veng veng a. Kan pahnih chauha khawvel kan din lai leh kan siam lai te kan ngaithuah let in hlim taka kan thiante ho nen a kan nuih bawk bawk lai te kha kan dawn kir a. Hetia min han kalsan ta ngawt mai hi mak kan ti a, a mak zia kan sawifiah zo lo a, kan ring phallo a, kan ring theilo a min kalsan hi...mahse min kalsan miau si!
Kan theihtawp bakah 'extra' leh 'bonus' nen min kalsan lo turin kan theihtawp tak meuhvin kan ngen a. Mihring ve tho an nihna theihnghilhin kan hmangaih takzet avang zawkin min kalsan lo turin kan thinlung zawng zawngin, kan thalarau zawng zawngin kan ngen a. Mahse...kan ngenna chuan an thinlung a thleng pha tawhlo a, an tan chuan dar ri mai mai emaw, darbenthek ri mai mai emaw a lo ni tawh-min hmangaihna kha an nei tawh miau silo a! Kan chantawk chu BEIDAWNNA! Kan tlawm zawh poh leh kan kehchhia a, kan ngenngawl poh leh min ngainep si! Hmangaihna hi a 'start' na leh a 'ending' na hi a chang chuan a va inpersan nasa em! Vanram atanga Hremhmuna chhuk ang vel nitur a ni.
Kan hmuh lai leh kan rilru na pawh a la dam fel em hmaa an 'Dp' ah mipa dang an han kuah hnap mai te, mokawr an han inbel zui han hmuh zawm zut phei hi chuan thihna kha thlang duhlo mahila kan hmaa lo langsar ber thil chu a ni chiang a lawm! Kan dam zawh kha kan ring lo a. Kan hmalam hun a thim a, kan beiseina zawng zawngte chu a va kehchhe hneh in min va ti beidawng chiang kuang em!
Kan hlimna ber kha kan tahna chhan ber a ni chiang a! Hlimna zawng zawng min pek tluk aia tam hretin min ti tap leh sia! Engah nge kan neploh teh lul ang? Mipa kan nih avangin enge kan tah loh ang? Kan hmangaih a, kan hmangaih takzet a lawm. Hmangaihlo in duh hun hunah kalsan thei ni ila, a tir atang reng khan kan ngaizawng tawp nang. Keini chuan kan ngaizawnglo a, kan hmangaih a, kan hmangaih takzet a ni. Chuvangin min kalsan thut hi kan tuarthiamlo a, kan tap a ni. Kan nep vang a nilo-kan hmangaih vang chauh a ni. Kan rilru chu a zawng zawng kan pek miau avangin a lo nep zo a, thuthlukna dik leh mawi kan zawng thiamlo a, kan ngaihtuahna a fim thei tawhlo a. Engkim hi kan ar khawthim dai lo theilo. Min dem ngawt suh-i hmangaih tak in a then ve hma che chuan.
Heti kauva min tiduhdahin min sawp rethei mahla, kan lam a pen khat i lo pen keuh a nih chuan i lam panin a tlan a tlan nghal turin kan inpeih reng a sin. Min kalsan chhan te, min kalsan chhunga i awm dan te, ngaihdam min dilna ngaithla tur in hun kan neilo...kan lam i lo hawi rual rualin chaktakin kan hmalam a kal nghal char char turin kan inpeih reng a sin. I tihsual kan hre lo va, min tihnat leh min tih tah tamzia, kan thiante'n min nuihzat phahzia te kha kan ngaihtuah hmanlo a, a sawi pawh kan sawi chhuak hmanlo. Min lo hmangaih ve takzet tih kan hriat nawn avangin lawm chungin, hmangaihna nena damchhung ni chhiar zawh chiah kan rilruah a awm...mahse chu chu duhtuhsam thleng ngai tawhlo tur a ni tih kan hriat chian hnu hian min va ti tap nawn leh si em!!!!!
Ka Dam Zo Lo'ng
Satu: Lalpanliani
Mahte'n awmhar tinkim ka dawn changin,
A thar zel thin aw nang ngaih;
Nuihiau biahthu di hlan chung si hian,
Sam ang then mi tum a lo ni.
Ka ngen che bawihte i tang vuan in,
Beidawnna ka chan tawk maw?
Khuandima zamual i liam si chuan,
Ni rei hi ka dam zo lo'ng!
Ka hlimna leh ka lawmna ka engkim kha,
Ka thahna mai maw lo ni?
Kei zawng sen nau ianga no ka thinlung hi,
Ar ang a vai zo ta i tawn ah.
Lungchhirin ka lam lo hawi leh la,
Lawmte'n ka kuah vawng vawng nang che;
Duhtu ai ang sam mai maw lo ni?
A riang kei ka chantur hi.
Comments
Post a Comment