VAI KA ANG EM NI?

Zonet Zonuni te in ah ka kal țumhnihna ah Zonuni Pa F. Rotluanga (Fam) khân polite takin "Kya He?" tiin min bia a, Mizoțawng pai miahlo in, "Zonuni awm em?" tiin ka zâwt let! Hemi țum hian ATC Hostel a ken tur Zonuni'n Istiri min pêk ka lam țum in a nia. Mahse Istiri hi Hostel ah kan lo neih sa avangin In lam ah kan kawl țha.

Tuk khat chu kan vêng a ka țhianpa te in a ka len țumin an in kawt ah zîng nilum kan ai a. Kan vêng pa Pardan-a'n Hindi in min be nulh a, kan țhiante an nuih a za hle. Vai Hmarcha zawng emaw min ti niin a sawi.

ATC ah Dr. Eric Zomawia te lo kal țumin a thlâwnin kan in entîr a. Ka beng veilam chhûng hi a nat lai tak a nih avangin ENT Dr chu ka en tir a. Ka sam kha a buk ve deuh a, pial tak khân ka khuih a. Dr chuan min biak hma in ka hming ka sawi  chu mak a ti hle a, hnamdang țawng a biak ngai ka nih a rin thu a sawi nulh bawk! 

Mizo Arsenal Fans lama ka țhiante chuan Vai hi ang min tithlu ngang a niang-Masihi Sangati Qouta in mi i zir tih hian min fiam reng zel a, kan nui nasa thei hle! ATC kan luh hlim a Introduction kan hman țum pawh in Final Year a mi chuan Black Theologian tiin min ko nghal.

Adivasi, Dalits Theology kan sawi apiang in ka țhiante'n min hmehbel zêl a, ngaiah ka nei țan tawh. DCPC zirlai hmeichhe pakhat, ka țhianțha tak chuan min thlahtute ah vai an awm leh awmloh min zawt bawk.

Hmanni lawk khan M. Th 1st Year lo zirthar Mizo pakhat chuan Sapțawngin khawia țang a lo kal nge ka nih min zawt a, Mizoțawng pai miahlo in Zobawk Lunglei ațang a lo kal ka nih thu in ka chhang a. Hetia kan inhmuh zui zel hnu hian a ni lakah chuan Vai ka nilo a Mizo ngei ka lo ni hi ka inthlahrung ru hle-nuamlo ka ti hial zâwk!

ATC a hathawk Vai Mistiri ho pawh hian min nêl lel a! Hman ni zîng ah pawh Mistiri pakhat nen kawng ah kan intawk a, chibai min bûk tur a a kut lo phar chhuah pahin nuisâng in "Bhaia, Keisa He?" min lo ti var a, keipawh in lâwm takin "Thik He!" ka'n tih ve zat kha! Thla khat vêl kan inhmu lo a, an lo lunglêng deuh a ni ang.

TNT Muanna Veng, Aizawl ah kan kal țum pawhin mipa tleirawl ho Pathian thu hrilh in eng eng maw ka sawi a. A tawp ah zawhna in nei em tiin ka zawt a. Anni chuan, "3 Idiots Film a mi Farhan-a kha i ang" tih chiah an sawi. 

Vishal an hawn thar dawn te khan "I thawk ve dâwn em?" ti a min zâwt tu țhahnem tak ka dawng a, ka hman rihlo thu in ka chhâng ve mai zêl a. Vishâl hi ka la kallo a, zuk kal ve chu a ngai a ni. MZP in Article Of The Year lawmman mîn pêk te kha kan țhian țhenkhatte chuan MZP in Vai min chawimawi hi an mak an thu min hrilh.

Heti êm êm a Vai ka lo ang chho ta leh ka lo hâng ta hi ka hriatloh hlân vek a thil thleng a ni a. Mahse pawi pawh ka ti êm êm lo-ka Mizo pui te aiin ka Indian hmêl zâwk nge nge ang chu. Odisha kan awm lai te khan Mizo chu Indian ang hi min tilo ngang a niang-khawii ațanga lo kal nge kan nih tih kan țhiante kha an zâwt fo a, Mizoram India kan tih pawh khân an awih hleitheilo a. Kei chu min zâwt ve ngai miahlo.

Pathian zara kan dam chuan Chanchin Țha hi India ramah hril darh te kan la duh ve ngei dâwn si a. Chûng hun ah chuan Mizo pa, Indian hmêl pu ngawih ngawih, vun rawng thleng a Indian sa khuk mai kei atan hian engemaw ti kawng tal a Chanchin Țha hril te hi a awlsam phah dawn chuan a va lâwmawm dâwn êm.

Ka thlalâk 1 hi ka'n dah ang a, "Vai ka ang em ni?" ti a ka zawhna chu i lo chhang mai dawn nia.

Ka lawm e oh Jai Hind!