BIKE A I CHUAN HUN AH CHUAN

Bike nalh takah, tlangvâl hmelțha tak in an phur ka hmuh che chuan ka țap ngei ang! Ni e...pä takin, zak miah lo in, ka rilru nat avangin ka țap ngei ang. Ka mittui a per sawk sawk ang a, ka mit a sen rûm ang. A chhan chu ka hmangaih che a, ka thinlung i tihkhehchhiat vek avangin ka țap a ni. Ka țhiante'n min fiam ang a, ka zak ang.

Chutih lai chuan kei chuan Crocs rawng uk ₹250/- man, 1st copy pawh nilo chu ka bun ang a, ka ke artui pawh a châr in a khî deuh hrup ang. Ke a ka kal avangin ka thlan in min bual ang a, ka sam pawh Gatsby ka hnawih in a hneh tâwkloh avangin a ro deuh hrup ang a, a țuak a lang bawk ang.

Chutih lai chuan i sîr ah i hmuh loh in Bike a i chuang lai chu ka thlîr ang che. Ka rilru nat dan tur chu i hriat vek kha! Mi dangta ni tûrin ka phallo che tih chiang taka hre tu i ni a, ka rilru nat dân tur chu i hriat chian kha! MAN tak in ka țap ang-ka zak lo ang.

Pheikhawk nalh tak i bun ang a, nangmah phur tu che pawh in thawmhnaw nalh tak a ha ngei bawk ang. Crocs a bun ve lo ang a, lo bun teh rêng pawh nise 1st copy sâng chuang man a bun ang. In inhmeh in in nalh dûn ngawt ang. 

Khawnge in kal ang a khawi lam nge in pan ang tih chu ka theihna zawng zawng sâwmkhawm in ka ngaihtuah lo ang. Chûng zawng zawng ka ngaihtuah leh chuan ka țap nasa dâwn si a. Țah reng hi ka duh tawhlo a, tun ah ka țap hi a tawpna nise ka duh avangin tun țum chauh chu ka țap fak fak ang.

Bike a nalh tak mai a traffic jam leh motor tam tak karah pawh in tlan liam zung zung theih laiin kei chu Foothpath ah ke a kal hnek hnek in, nisat vâng a thlan tla hluam in ka kal ang a. Hla taka ațanga min thlîr tu chuan Dumka Kawngpui luan hotu emaw pawh min lo ti se ka vui hauh lo ang. A chhan chu ka dress leh ka colour hian ka support êm a!

Nula hmêlțha tak mai Tlangval in Bike a an phur ka hmuh te hian ka lo hrechhuak leh vawng vawng dâwn che a. Hlim tak mai leh induh tawn tak mai a Kawngpui an suartluan lai ka hmuh te chuan nang chu ka lo ngaihtuah hmasa ber ziah ang che tih hi ka hre chiang a ni. 

Duhtak mai a nangmah phurtu kawng ah i kuah hnâp a, thlamuang tak mai a Bike i chuang ka hmuh mêk lai chuan kei chu ka insit ngawih ngawih ang a, ka thinlung chu a kehchhe hneh hle ang. Nangmah phurtu chuan i hmelhriat ka ni tih chu hre ngai dâwn lo a, min hmu hek lo ang-nangpawh in. 

I khawvêl chu kei nên nilo in nangmah phur mêk tu che Tlangval nen inhmang dûn mêk ang a, khawvel hi i tân hlimna leh lâwmna hlîr a ni ang. Beiseina leh hlimna in a hmuak ang che nga, chumi neih tum chuan hmalam pan in chaktak in tlân ula, nei ngei bawk ang che. 

Chutia ka ka kal hnek hnek lai chuan ngawi rengin, ka hriatloh hlân in ka bulah nang i lo kal a, Bike ka neilo tih hre chungin ka bul ah i lo awm duh tlat hi a chhan ka ngaihtuah lo a. Ka ngaihsak lêmlo che. 

Ka thinlung a kehchhe vek tih i hria a, dawhthei tak in i chhar khâwm a, a theih ang ang in i chãr a. A châng chuan i charh sa te chu a nghet lo a, a tla leh vek țhîn. Mahse i beidawng duhlo a, dawhthei takin i char khâwm a. A keh darh nawi zawng zawng te nen chhel tak leh taima tak a rût khâwmin i khawrpum a. 

Kei ngei pawhin ka beisei tawhloh ka thinlung kehchhia chu i zawm khawm a sin! Ka thinlung kehchhia, tla darh nuaih, a neitu kei pawhin ka zawmkhawm theih tawhloh, zawmkhawm ngaihna pawh ka hriat tawhloh chu i khawrpum leh a, hmangaihna nên i tuam dam a sin!

Ka theihtâwp ka chhuah ang a, Bike ka neih a i chuan hun ah chuan min kuah ang a, nangnen hlim takin Kawngpui hi kan suartluan ang. Ka kâwng ah i kuah ang a, dîm tê in ka tlân ang a, kan inhmangaih tawn thu kan sawi dûn sep sep ang a. Kan inhmeh in kan nalh dun ngawt ang.

Hla taka min thlîr tu chuan nupa inhmangaih tawn tak kan ni tih a hria ang. Ka țhiante'n min fiam ang a, ka va hlim dâwn êm!

Hmâna țap thîn kha ka nui vak vak ang a, beidawnglo a beih hi hlawhtlinna a nih thu te ka sawi ang. Hmangaihna chu inhmangaih tawnna a nih thu te hi uar tak in ka sawi ang-ka bike a i chuan hun ah chuan...