THIL ZIAH LEH KEI

'Thu ziah' pawh ka ti ngamlo- 'Thil ziah' ka ti. Thil chi hrang hrang hi ka ziak ve mai mai țhin a, kan țhian țhenkhatte'n an lo chhiar a, ka lâwmna'n min hlut der sak a, ka ziak ve zêl ta chu a nia!

Ka thu ziah hmasak ber chu kum 2000AD kha nita in ka hria-kan veng YMA Chanchinbu a chhuah tûrin ka pe ve a. Mahse kan YMA President khân engatânmah a tilo a, Thlânmual kawng a kawngsîr pal ah khân ka thuziah chu a târ a, ka zak hle!

Ka pa ka chhûn a, lehkhabu ka chhiar peih êm êm a. Pâwl 5-8 ka nih chhûng kha ka lehkhabu chhiar tam ber a ni âwm e. Sherlock Holmes, Billy the Kid, Dusty Fog, M&B adt. ka chhiar nual mai a. Kan û te ho ta BA Mizo zirlaibu te pawh ka hmuh phâk chin chin ka chhiar țhîn. 

Ka thil ziah chanchinbu a an chhuah hmasak ber chu Class XI ka zir kum, kum 2007-a Gov't Higher Secondary School, Lunglei Monthly Bulletin ah a ni a, a thupui chu 'A mak, A ril' tih a ni a, phêk lehlam khat hi a ni a, khawlchhut kha chuan a tawi țha hle!

Chuta țang chuan thil ka ziak peih tih ka classmate te'n an hre țan a. Tin, vanneih thlâk deuhin kan Mizo subject kha ka ti țha ve leh nulh zêl a, min zâwt ve fo țhin. Hmangaihna lam ka la nã tih an hriat khân kan class hmeichhe ho khan an harsatna kha Dr. Hrekima ang hrim khân min hrilh a, an harsatna kha ka lo 'solve' sak țhîn!

Class XII kan nihin kan class in 'CR' atân min thlang a, kan Mizo Teacher Sir Thianga khân a tir ah chuan min ngaina lo hle a. Mahse a subject Mizo ah mark 50 ah mark 37 ka hmuh khân min duhsak ta hle a. Class XII Mizo Note kha a siam a, ka zawrh sak a. Kum tawp exzam ah Pathian khawngaihna in Mizo ah mark 81 hmu in kan Sikul ațangin Mizo ah Letter hmu awmchhun ka ni hlauh mai a, Sir Thianga a lâwm hlê a, hnukulh țeuh leh mittui parawl purin kan inchibai!

Class XII kha ka'n pass chhe khawp a-subject dang ah margin deuh vek ka hmu a. Mahse Pathian zarah liau liau BA ah khan ka tuina ber Mizo ah Honours subject ka la pha hrâm a, ka lâwm hle!

College kan kal a, 'College Week' ah Essay Competition ah ka tel ve a-Mizo Section ah. A vawikhatna ah chuan lawmman engmah ka dawnglo. 2nd Yr leh 3rd Yr BA kan zir kum ah erawh chuan Essay inziahsiak ah pakhatna ve ve ka ni a, Gold Medal Saikuti Hall-a min pêk țum a ka lâwm zia kha aw!

Exzam dâwn hnai ah Bethsy Lalrinsângi'n ME & MIL min lo zawh te kha phone call ka dawn ah chuan a la hlu ber awm e! A tûk ah exzam turin Lunglei kan pan a. Exzam Hall a mi lo țhut țhup laiin Bethsy'n a bula țhu tur a min sâwm te kha a va han nuam ve mai mai tak e aw-mi khan min lo thlir țhup lehnghal a! Mahse General leh Honours students kha exzam hall ah a țhut dun theih silo a, ui tak chungin Bethsy bul ah ka țhu ta lo nih kha!

KȚP Chanchinbu 'Kristian Țhalai' a kum 2015 a ka thuziak pakhat chu Sihphîr nula fel êm êm mai-KȚP OB leh Bial Zaipawl member hlun nibawk chuan țha min lo tih der sak ve êm êm a. Facebook leh WhatsApp lam te kan inbe zui a. Țhianțha tak kan ni zuiin tûn ah chuan pasal țha tak mai-Biak In hawng in a nei tawh. 

Vanglaini a ka thuziak pahkhat chu Khatla South nula chhe lo ve deuh hian țha a lo ti der ve leh hle a. WhatsApp lam ah te kan inbe zui a, kan inkawm ngeih ta phian a, kan inbe thûk hman hle! Mahse kan Kohhran te a lo in ang chiahlo nen khan țhianțha tak ah kan inchhuah zui ta.

Blog-a ka thuziah pakhat chu Kolasib nula pakhat in țha a tih thu min hrilh a, inbox lam ah te inbe zuiin tûn thlengin 'ințhianțha êm êm' ah kan inchhuah!

College ka kal ve laia ka thuziak pakhat chu MZP Chanchinbu ah ka pe ve mai mai a. Pathian khawngaihna leh MZP hruaitute duhsakna vang liau liau in kum 2016 chhung a  'Article of The Year' ah min thlansak a, ka beisei loh lutuk thil a nih avangin ka lawmzia hi ka sawifiah thiamlo zâwk!

Thuziak dahțhat nân Blog te siam ve tûrin kan u pakhatin min rãwn a, ka siam ve ta a. Mizo Bloggers WhatsApp Group-ah min add a, ka chhawr țangkai êm êm a. Ka mâwl ang angin min lo dawngsawng a. Anni chu MA, Dr, IAS, Lecturer adt te an ni fur a, ka sapțawng thiamloh zawng zawng te pawh ka zâwt a, min hrilhfiah vek zêl a, ka lawm hle. 

Thuziak thiam êm êm, khawvel leh Mizoram dengchhuak khawp a thuziak thiamte hian vanneihna an dawn nasat dân tur hi ka ngaihtuah thiam lo zâwk a. An hlu in an ngaihsânawm takzet a, kan ram leh khawvel rohlu ber an ni. 

Ka thuziak te hi keima tân ka ziak a, miin țha an lo tih a an lo chhiar ve duh hian ka lâwm êm êm a. Ziak thiamlo min tiin min hlutsak miahlo mahse ka vui chuang rêng rêng lo-keima tân a ziak ka nih avangin.