RK STORE

Durtlang a Hostel a kan awm tirh hian Airtel Internet signal hi kan hostel room ah hian a a tha lo in chhungte leh thiante biak a harsa hle a. A bikin Internet phei chu a hman that theih loh a-kan awmna room bik ah. Kan senior te hnen ah eng nge tha tih kan zawh chuan BSNL a that ber thu min hrilh avangin Inrinni kan chhuah hmasak ber ah chuan BSNL Sim Card ka lei a, Top Up thunna leh recharge na tur ka zawh chuan Aizawl Dawrpui phei-dinglam side a RK STORE chu pan turin min hrilh a, chu chu RK STORE ka hriat hmasakna ber a ni. 

 

Chu dawr ah chuan Nu, kum 40 mi vel, inkhaithli zet zawt, cher lutuk lo, ngo lam deuh leh hmaibial lam deuh hian dawr a lo nghak a. BSNL Top Up leh Internet Pack an nei em tih ka zawh chuan an neih thu leh tun mai ah chuan server a down a vangin an thun theilo tih min hrilh a. Dawr dang han pan mai tur ka hriatloh avangin ka number ziakin an hman hun hun a lo thun mai tur in pawisa ka pe a, a ni chuan a phone number min pe bawk a-BSNL tiin ka save a. 

Kei, mi hmanhmawh leh dawh theilo zet chuan tlai dar 5 vel ah chuan min lo la thun sak loh avangin ka zuk phone a, a ni chuan dam thlap leh dawhthei tak in min lo chhang a. Signal a that chiah thu leh min lo thun hmasak ber nghal dawn tih sawiin kan inbiak zawh atang a minute hnih pawh tlinglo ah chuan min lo thunsak ta nghal a, chuta tang chuan ka laklawh apiang in Top Up leh Internet Pack chu a ba in ka thun tir ta ziah a. Inrinni tin hian ka ba chu ka zuk rul ta thin a. 

A hnu lam ah phei chuan Inrinni ka chhuah a piangin lenna tur dang ka hriatloh avangin an dawr ah chuan ka leng zui ta ziah a. A then chuan dawr nghak ve emaw min ti a, thil man min zawh hian ka hre ngai silo a, a neitu nu chu ka zawt leh ziah zel a. Zaithiam hmeichhe pakhat phei chuan “Thil man hi hre ve ta che” min ti a, ka nui ringawt. A hnu ah chuan thil an zawrh man chu hre chiahlo  mahila an dahna te chu ka hre ve ta zel a, customer lo kal te chu ka lo en puiin ka lo pe  ve ta fo a. Ba rul tur chauh a kal e tilo khan chhun ah Thingpui te min intir in, a chang phei chuan ka ba rulh aia tam mah ka thingpui in man ah an seng ta thin a, ka lawm em em rual in ka zak ru fova, anni lah chuan an nau te ang tak takin min la dawngsawng zui a, Pathian zarah ah thiantha tak kan nih zui phah ta a, ka lawm hle. 

He dawr nghak tunu atang hian Kristian nun dan tha leh mi chung a that chhuah chu ka zir chhuak chiang hle a. Inkhawm  zan apiang a inkhawm thin leh Kohhran a chanvo pawimawh tak tak nei te hian Biak In pawn a kan nun dan ah he dawr neitu nu hi kan tluk lo fo tih hi mit leh beng ngei in ka hre chiang hle.

Mi chi hrang hrang-Pastor, thingtlang mi, khawpui nula changkang tak tak, Vai, Mosolman, Mutia leh Putar, naupang leh thalai, mi hausa leh mi rethei te’n nitin an dawr thin a. Chung Amah dawr thin tu mi chi hang hrang a dawnsawn dan mawlh chuan ka rilru a hneh thin. 

An dawr a an neih loh thil an lo zawh chang te chuan hawihawm takin an neihloh thu leh a nei te dawr awmna nen lam a hrilh thlap a. Chumai nilo in an thil zawrh chu to an tih in a tlawmna hmun nen lam a hrilh thlap thin! A tir ah chuan hlawk a tum lo em ni aw ka ti rilru ru rum rum a, mahse chu a rilru thianghlim leh phakar tello chu Pathian leh mi hian an hmuh hmaih hauh lo-nitin in a dawr chu a lun em em reng a, a in hralh tha em em tho. 

Tin, a hnuaia thawk a en dan mawlh hian ka rilru a hneh thin. A hnen a inhlawhfa chu ni teh meuh mah se, hawihawm tak leh zah thiam takin a bia a, tih tur tul te chu nu in a fa a hrilh ang hian a hrilh melh melh a, zawm loh leh tihloh chu zahthlak tak tur a ni zawk-mi pangngai tan chuan. A order ngailo a, a command hek lo-a hrilh tawp a, a hnuaia thawk tan pawh a tirhkah nilo in a nu in a fapa a tir nizawk hial in a inngai fo ta ve ang. 

Thenkhat hi chuan kan hnuaia thawk te hi kan chhiahhlawh chei a, mihring ve tho an nihna hi theihnghilh in hmanrua ang lek a en in kan duh duh kan tih tir a, an zahawmna zah saklo in kan ngainep hle thin. Chuti ang mi chu an hnuaia thawk te pawh hian an hai lo a, rei tak an inhrawn theilo nge nge zel. Tin, phur takin an hna pawh hi an thawh sak mawh khawp mai. Mahse he dawr neitu nu hi chuan chuti ang chuan a ti ve ngai miahlo-a nun ah hian Lal Isua ka hmu chiang hle!

Chumai a nilo, sum dawngte hian hlawk kan duh luat ah kan thil man kan chhiar to a, mi dang aia hlep neih tam kan duh vek-chu chu Vishal dawr an hawn dawn a kan dodal zia leh mipuiin Vishal dawr hawn kan thlawp zia a tang khan a lang chiang hle. He dawr neitu nu hi chu a danglam hle-a thil neih hi a man awm tawkin an hralh a, an neih loh pawh a neite dawr a hrilh a, chu mai nilo in a dawr tu te’n to an tih chuan a tlawm zawkna dawr chen in a la kawh hmuh thei nia! Hei lo liam a Krista rilru hi va awm bik suh! 

Ni thum kalta a an thil lei tawh, an duh leh loh vanga an lo thleng let chang pawhin engmah sawi nawi neilo in nui sang chung in-a thleng let tute harsatna hrethiam takin a lo dawng sawng a, nui var var chung in pawisa a kir let mai thin. He ti kauva a rilru that chhan hi Lal Isua tello chuan a theih ka ring lo!

Amah dawrtu te mai bak ah thian inleng a nei ve neuh neuh a, a dawr a thawk te pawh an thiante’n an tlawh fova. Chung mi chi hrang hrang, a dawr tana hlawkna awmlo-a dawr ti chep mai mai tu te zawng zawng-keimah te nen chuan angkhat vekin min bia a, min en a, min kawm a, eitur min lamsak vek zel. Krista nunmawi leh Chanchin Tha, Amah ah hian atak ngeiin ka hmu.  

Chan leh hloh hlau lova a inpekna rilru hian mi a hip khawm zawk a, a rinloh leh beiseiloh lam atangin chunglam in mal a sawm a, a tlin tawklohna leh a fel famkim biklohna te chu miin hmuh hmaih in a nungchang leh a rilru tha em em chu mi hian an hmu nasa zawk a, he dawr neitu diktak chu Lal Isua niin ka hria-kei chuan.

Tawng duh leh zaklo viau e tilo chuan an dawr hming-RK hi a lampum ka zawt hreh teh tlat a, chuvangin a lampum ka hre lo. Mahse a chhung a dawr neitu erawh chu Lal Isua neitu diktak a ni tih ka hria.