HMANGAIHNA HI ENG NGE?

Hmâna hmãn hman ah, mi thiam leh mi ril tak tak te'n 'Hmangaihna' hi hrilh fiah a sawifiah an lo tum tawh țhîn a, sawi leh hril a fiah chi nilo in a nuna nunpui in a fiah ber âwm e!

Pathian thu-Theology te pawh hi kan hun tawn mil leh kan awmna mil zêl in a danglam țhîn a. Chuti ang deuh chuan kum Za bi pakhatna leh kum Za bi sawmhnihna a hmangaihna kan hriat dân leh kan ngaihdan chu a in ang tawhlo a. Tûn kum Za bi sawmhnihpakhatna ah phei hi chuan a danglam nasa leh zual awm e.

He Hmangaihna avang hian Pathian fapa meuh pawh a thih-thawhleh phah a, a ropui a ni. Khawvela a thu leh hla zawng zawng pawh hi Hmangaihna chungchâng tel miahlohna chu a tlêm hle âwm e. Kan damchhung leh kan thih thleng a kan la buaipui tur chu he hmangaihna hi niin a lang-Kristiante tân phei chuan.

Hmangaihna pawimawh zia chu Bible-ah pawh kan hmuh kha-I Korinth 13 ah. Hmangaihna tello a thusawi, thurûk hriat leh rinna chak tak mai neih, a tawi zawng a rawngbawlna kan tih zawng zawng hi hmangaihna tello chuan engmahlo mai a lo ni-Tirkoh Paula khan a ti thlawt mai a nih kha!

Hmangaihna ah chuan- Pathian hmangaihna, Mihring inhmangaihna-nu leh fa kar, nula leh tlangval adt a awm thei a. A Greek țawng chuan tih kual vel ngailo a fiah êm êm pakhat awm chu hmangaihna hi mi pahnih inkar a ni a, zawmpui leh lo dawngsawng tu an awmloh chuan hmangaihna chu a famkim thei hauh lo. 

Pathian pawhin min hmangaih a, kan tan a fapa min pe hial mahse kan hmangaih lêt loh chuan a famkim thei chuang lo. Chuvang a ni ngei ang Lal Isua'n Amah ah awm reng tur in min chah. Grape hrui tak a nih thu leh a zawmpui pêng rahlo chu paihchhuah tur kan nih thu min hrilh a. A zawmpui kan niloh chuan kan boral mai dawn a. Pathian hmangaihna tifamkim tur chuan kan hmangaih lêt ve kher a ngai. Chuvangin hmangaihna famkimna chu inhmangaih tawnna hi a ni.

Nula leh Tlangvâl te pawh kan ni chiah mai-kan inhmangaih tawn a ngai. Kan hmangaih êm êm, a tellova dam zolo hial tur ah kan inngaihte lakah pawh hian-min hmangaih lêt ve miau loh chuan kan hmangaih reng theilo. Kan hmangaihna lo dawngsawng a lo chhâng lêt duh tu bul ah chauh hmangaihna chu a famkim țhîn.

Kan hmangaih te'n min hnawl a min kalsan hian, rinawm tak leh engkim tuar huam chung a an lo lêt leh hun lo sakuh ser nghah hi hmangaihna a nilo. Mahni nunna hial lâk a nun chân phah phei chu kan hmangaih vâng nilo in kan nêp vâng zâwk a ni. A sir leh lam a kham kaina tur ko pang emaw awmlo napui ah lei kan dawh theilo ang hian a hnawl tlat tu nên hian kan inhmangaih theilo. Lal Isua hmangaihna hnâwl a hawisan tlat tu tân Vanram ah hmun a awmlo.

Hmangaihna vâng a nun kehchhia leh nun beidawng ve tawh i ni ngei ang. Mahse chhel taka i tawrh chhuah hrâm hrâmna khan vawiin ah hian hmangaihna diktak leh a awmzia chu in inhmangaih tawnna ațang chiah khan a ni tih a hrechiang ber tu i ni ang. I rilru nat lai leh i thinlung kehchhiat lai khan mahni lo intihlum ta la chuan hmangaihna vâng a thi nilo in tawrhchhelloh vang a thî i ni tih i hriat chhuah meuh chuan hremhmun ah i awm tawh ang. 

Hmangaihna chu kan inhmangaih tawn chiah hian a ni. Pakhat zâwk chauh in a hmangaih a, a hmangaihin a hmangaih lêt ve loh chuan a famkim thei ngailo-Pathian hmangaihna pawh. Chuvangin i hmangaih in a hnâwl che pawh in tuar rawh; hmangaihna tak tak zâwk tawng tur in i inbuatsaih zâwk chiah tihna a ni.  Hautak in na deuh mah se Hmangaihna chu i hmangaihin a hmangaih lêt hun ah chauh che a famkim dawn a, chu hmangaihna hlu lutuk chan tur chuan lo dam tlat a, lo thi rêng rêng suh. 

I hmangaihna hnâwltu avâng a i nun i chân khan hmangaihna vang a fam i nilo, i tawrhchhelloh vang zâwk chauh a ni. Lal Isua hi a hmangaihna hnawl tu te a thih kêp lo, a tâwp thleng a tuar hrâm hrâm a hmangaih lêt tlat tu te tân chauh a thi tih hre reng rawh.