THINGTLANG PA POLITICS

Zirna lama MA Political Science zirchhuah chu sawiloh, A AW B chhiar thiam ngawr ngawr vang a ziak leh chhiar thiam sawih sawih kei Thingtlang Pa hian Politics ka hriat dan ka ziak ve duh a. Ka hriat dan leh hmuh dan hi khawii University mahin an zirlaite Thesis ah an la dawnglo a nga, lehkhabu rawn pakhatmah a awmlo bawk.

Inthlanpui kan hmachhawn dawn apiang in Politics hian lohtheiloh in kan khaw thingtlang kilkhawr ber ah pawh thawm a nei ziah a. A thawm mai nilo in Politics khel thin-politician ni mek te, MLA ni mek leh nihve tum te chuan kan khaw kilkhawr tak leh kan in chhe ve tak ah Politician an nih theih nan kan ‘vote’ min lo dil a. Chu kan vote hmang chuan Ram hruaitu an nih theih dan tur te, keini mi rethei tak tak, thingtlang pa mawl ve tak tak te chu kan changkan ve theih dan tur te, eizawnna tha tak kan neih theih dan tur te, retheihna laka ata min chhanchuah dan tur te min hrilh a. Chu tluka chanchin tha leh lawmawm a awmloh chu tiin beisei takin kan vote kan lo pe, mahse kan vote avang a MLA, ram hruaitu an  lo nih hnu hian kan khua ah an lo kal tawh ngailo a, chumai nilo in kan in awmna pawh an hre tawhlo reng reng. 

Kan khuaa an lo kal tum a an lo kalpui kan veng pa ho te chu ka han zawt chiang a, engikah nge kan hausak dawn a engtikah nge eizawnna tha chu kan hmuh dawn ti a zawhna ka han zawh chuan lo nghak deuh turin min lo hrilh a, thlamuang takin kan lo nghak a. Kum hnih vel a liam hnu ah ka han zawh leh chuan min chhang tha duh tawhlo a, biak an nuamlo in an mahni roh chu an in leh lo a changkang chak viau lawi sia! Ka hriatthiam dan ber chuan vote petu te aiin vote zawn sak pui tute hi an changkang hmasa zawk tih a ni.

Inthlan dawn apiangin min tihder ta ziah mai a. Ka ngaihtuahna ka’n tizau ta deuh a-khawpui mite hi Politician te hian an bum ve tho em tiin ka’n bel chiang ve ta a. Chuta ka hmuhchhuah leh pakhat chu khawpui mite pawh an lo bum tho tih hi a ni. Tute nge hlawkpui ti a ka’n chhui ruk chuan vote zawn sak tute bawk kha an lo ni ve leh tho. Vote zawn sak tute chuan khawi khawi ah emaw contract an thawk a, kum hnih hnu ah phei chuan Motor changkang tak tak an nei a. Tisa lam ah mai hausa lo in thlarau lam ah-an lawina Kohhran ah chanvo pawimawh tak tak an chelh zui bawk tih te ka hmu chhuak a. Politics hi kan ram pum vawilehkhat a siamthat thut na nilo in politician leh a mi leh sa te changkan hmasak phawtna ni ta in ka hria.

Thingtlang mi rethei te kan sorkar/politician te sawisel in kan phun luai luai a, chutih lai chuan khawpui mi changkang ho leh sorkar hnathawk te pawh an phun ve tho tih ka hre leh a. Ngatinge inthlan dawn a an thutiam ang a hnathawk leh tak tak ngailo hlir hi ram hruaitu ah kan thlan tlin le tih chu ka inzawt nasa a. A chhan diktak chu ka hrethielo na in hei hi nita ber in ka hria-kan phu tawk leh kan duhtawk chiah ram hruaitu kan thlang tling thin tih hi.

Mi diktak leh ram hmangaih tak tak, sorkar hnathawk mahni hna a kal duhlo te ban hmak hmak ngam khawp a huaisen thlan tlin ai chuan kan duhna hmun apiang a min sawn kual thei politician kan thlang tling duh zawk a. NLUP kan dawn te diktak a kan hman leh hmanloh enzui a min hrem hmak hmak duhtu aiin kan pawisa dawn kan duh ang ang a kan hman pawh a min hau lo tu Politician te kan thlang tling niin ka hria-keini thingtlang mi te pawh hian. Chu kan rilru chu an lo hriatchian ruk em vang emaw ni kan Ram hruaitu te hian engmah hi an tih that duh tak takloh tih te ka ngaihtuah a. Mipui hian kan hotute hi diktaka rorel tak tak turin kan beisei lo a, dik ve thawkhat, kan duhna lam lam a kan kawihher theih, mahse a lang a pau a mi diklo nilo, dik deuh a diklo thiam hi kan ngaina niin ka hria a. Keini pawh hi kan hamthatna tur ah chuan dik deuh maia diklo thiam, mi te’n an chhuizui theih mangloh tur a hamthatna dawn duh vek niin ka inhmuchhuak.

Dik lutuk chu mawlna leh changkang lo, mi rual pawllo nihna zawk mah nita in ka hmu a. Chu kan rilru sukthlek chuan politics kan khelh dan a nghawng a, politician te kan beisei dan leh anni pawhin mipui mar dek ru chung a Lal nih reng theih dan hisap ran in ro an rel nita ber in ka hmu a, dik tak maw?

Chutih lai chuan dikna duh a tuihal, ram leh hnam hmangaih em em mi engemawzat chu kan awm tih ka hria. Bul tan dan tur leh hmalak dan tur hre mailo, bul tan tum pawh a mipui zawkin kan vote tlin theih loh leh duhloh tam tak an awm tih erawh chu ka hmuh hmaih hauhlo. Kristian hun vawng dik theilo-office tlai reng, Sunday Sikul kaikim duh vang a mahni hna thawhna a kartluan a awm hlei theilo, tualthah leh thenawmte do hreh em em si a eiruk leh mi chan ai chhuhsak hre miahlo adt te vei em em ringtu, Pathian tih tlat mi mi tamtak kan la awm tih ka hmu a.  Kan ram hian kawngdik zawha Pathian hmangaiha tih tlattu ram hruaitu a neih theih nan a tawngtai bang lo mi sing chuang kan awm tih ka hrechiang a, chu hun chu an nghak mek bawk.  Tawngtaina chhangtu Pathian chuan min la chhang ngei ang.