NIHLIAP

Zan tir a ni a, ruah a tla cherh cherh a. Hritlang-awmna tan chuan chhuahvah a chakawmloh khawp ang. Lehkhabu dahna chhuar bula perek a inbang Nihliap-thlehtheih chu ka la a. Hun engemaw chen ruah a sur tawhloh avang leh ruah sur nikhua pawh a nihliap keng peihlo tak mai ka nih avang in chu Nihliap pawh chu ka khum chhuak khat hle a. Hun engemawti chen ka khum tawhloh hnu a ka’n lek chhuak chuan ka lung a ti leng hle a. 

Ka lunglen chhan zawk tak erawh hi chu he Nihliap hi ka rilru luah rengtu-ka hmangaih em em ta ni. Khawi dawr atanga a lei nge, engtik a mi nge tih leh tute nge he nihliap hian a lo zawn tawh ang tih lam chu ka ngaihtuah lo. A thar a ni tawhlo a, hmeichhe tan a khawlaia khum chhuah tlak a nih meuh tawhloh avangin a hluihlawn tawh a nih ka ring a. Chutia Nihliap chuang tlai reng awm ta chu an in a ka kal tum in a Ni (aunt) chuan ka khum hawn atan min pe a, ka pe let leh talo a nih kha.

  

He Nihliap neitu hmaah hian ka kehchhe vek a; ka nihna leh zahawmna zawng zawng hloh khawpin ka hmangaih a. Ka thinlung a tihkhehchhiat vek hnu pawh hian hmangaihna nen ka la nghak ta fan-a ruk in-a hriatloh in. A hriat chuan min ngainep zual mai mai dawn tih ka hria a, kei ngei pawhin zahthlak ka tih tawh avangin ka tilang ngam tawh lo.

Hmangaihna hi hmelthatna ah a awmlo a, pian nalh leh khal ah a bet hek lo. Thatna leh sualna ah hian a awmlo a, thianghlimna leh mawina ah a awmlo tih ka hriatchian phah. Hmangaihna chu ka thinlung a awm a, a neitu chu ka thinlung tikhehchhe vek tu, natna leh beidawnna a min hnuklut tu; mahni nunna ngei pawh lak mai duh khawpa hreawmna ruam a min hnuk lut tu chu a ni. Chu mai nilo in ka hmangaihna hnawl a min hmusit a min ngainep tu, ka nat belchhah ngeina tur a thil ti thin, Facebook, Instagram leh WhatsApp thleng a ka rilru natna tur a khawsa thin a ni. Social Media ah mai nilo a tak ngei ah pawh chuti ang chuan a khawsa zui ngei bawk ang.

Ka tah a, ka nat a, ka chawh ngawih  ngawihna tur a che duh, ka hmangaih takzet vanga a laka a ka tlawmna, ka inpumpekna, ka inhlanna zawng zawng te hmusit a hnawl lui tu, mi dang min thlansan lui ngattu chu ka la hmangaih cheu a,  amah vang a tah tum tawhlo mahila ka tap nawn a, ka la nghak cheu. Hmangaihna chuan beiseina a lo kengtel tlat si a-ka beidawn thak tawh hnu ah pawh ka hmangaihna chuan a la beisei tal thin.

Ngaihsakloh a ngaihvenloh ka tum a, ka theihnghilh ve fo. Ka mihrinna leh ka rilru chuan a theihnghilh a, a chapo khum. Ka hmangaihna erawh chuan ka inrinloh hlan in a lam ah bawk ka rilru a lo pe a, ka hriatloh hlanin ka lo ngaihtuah leh a, ka tumloh bur laiin hmangaihna nen a lo beisei a, a lo nghak leh tlat thin. Ka rilru ka hneh thei a, amah ka hmangaihna-hmangaihna erawh chu ka hneh theilo. Ka thinrim a, ka in haw ngawih ngawih.

Chung zawng zawng ngaihtuah a chhuak chung a Nihliap chu ka ban lai tak chuan, ka rilru nat aia a let sang engemaw zat a rilruna, keimah vang a rilru na em em mi pakhat-hlinglukhum khum hi ka hmu a. A hmai leh a chal vel te chu thisen in a buala, a mitmeng chu ka en chian chuan min hmangaih takzet tih ka hmu a. Chumai nilo in min hmangaih avang in tun a natna chu ka tan, ka tan ngei a tuar mek tih ka hmu zui a. Ka hmangaih in min tihnat aia a let sang tam taka na zawk in a rilru ka tina tih ka hmuh phei chuan ka hnuk a ulh a, ka en chiang ngam lo.

Chuti taka a rilru ka tihnat, ka hnawl chian em em leh chuti chung a min la hmangaih cheu tu chu ka’n enchiang a. Khawvel leh a piahlam thlen a chatuan nunna ka neih theih nan Kraws ah chuan an khengbet a, a chatthla lek lek tawh hi a lo ni a. Chuti kau a min hmangaihtu mitmeng chu zak takin ka han en ru leh hram a, a mitmeng chuan tihian a sawi-

“Ka hmangaih che..min tihnat tawhna aiin min hmangaih let ve hun tur in ka rilru a luah zawk. I tan chatuan in ka lo awm ang-ka lo nghak ang che Vanram ah”