KA HMANGAIH CHE

Vawiin hi February ni 14 a ni a; Valentine's Day a ni. A awmzia sawifiah ngailo kan hriat kha. Vawiin thleng a ka la hmangaih che hi i rin ka ring tawh lo-tiila ka nêp êm a; min ngainep tak chungin ka hmangaih cheu che i la ring mai thei-ni e, ka nep a, ka la hmangaih cheu che a ni.

Ka hmangaih che vang hian ka â a, tun a he thu ka ziak leh pawh hi ä ka intiin nêp ka inti ngawih ngawih a, mahse ka hmangaih che ni.

Ka hmangaih zia che hi i bul ah ka sawi thei tawh lo a, awmzia a awmlo a, ka țhiante bul ah ka sawi thei tawh lo. A chhan chu hmuhsit leh ngaihnep ka ni tawh a, kei ngei pawh hian keimah hi ka inngainep a ni-heti kau hian maw ka lo hmangaih che?

I lak ah khan ka lo innghat ve tak tak a, ka nupui tur atan ka duh che avangin nangmah lo hi hmangaih dang ka neih leh ka ring tawhlo a, a zawng zawngin ka lo inpe hman a ni. Min tihlawmna leh tihhlimna aia nasa in min ti țap a, min ti beidawng a, min tichhe vek a sin!

Ka nun ah hian midang, nangmah thlâk zo hi ka tawng leh mai thei tawh silo a, chutak chu nang chuan min ngiahnepna chhan pawh a ni ngei ang. Ka mualpho a, ka â zo tawh a, ka la nep zel dawn a nih hi!

Kalsan theilo che mahila i lak ah hian ka hla ve bek bek zel a. Nêp engang mahila ka kalsan ve chhet chhet che ni. Hnapkhawn pawh a kal reng chuan-muang mahse hma a sawn ve zel hi tiraw?

Tihsual tamtak ka nei a, ka thiamloh  vek a ni tih ka hria. Lal Isua nen a bul țan țhat a kan dam chhung hun hi kan pahnih a Lal Isua tan hmanzawh ka duh a. Mahse a theih tawh siloh.

Ka mizia i hria a, mi hlim thei tak, fiamthu duh tak ka ni tih i hria. Ka fiamthu i nuihpui țhinte kha i ngaihtuah lêt a i rilru a tina țhîn tih ka hria. Mahse kha mi phen a ka hmangaih zia che hi i hmuh hmaih a ni.

Hmangaihna hi hmel a nilo a, sex a nilo a, virginity a nilo a, retheih leh hausak a nilo-hmangaihna chu i awm ang ang a hmangaih che a, tlinlohna leh țhatlohna inngaihdam tawn hi a ni.

Ka ngaizawng lo che a, ka hmangaih che. Min hre ngai tawhlo in kei ngei pawhin ka theihngilh hun che hi a la thleng ang. Chumi hun chu nang chuan i hmang zo tawh a, ka tan hian engtik hun nge a nih ve ang tiin ngaihnep, hmuhsit, hnawl leh fiamthu thawh khum phur chungin chaklo takin ka pan ve țâwk țâwk a ni.

Ka țhianțha leh min hmangaihtu te u, khawngaihin inbeng lo hup ula, min lo en lo ula, min lo hau suh u, vawikhat chiah nangmahni zah em em chung in ka sawi leh hram ang-vawikhat chiah.....

"Bae, ka hmangaih che"