HMANGAIHNA LEH THALAITE

Khawvel a Pathian thu ziak chhiar hlawh leh internet a zawn hlawh ber chu Johana 3:16-na hi a ni e an ti a. Chuta tang ngawt pawh chuan Hmangaihna hi mihring leh nunna nei zawng zawng te hian kan duhin kan damchhan ber pakhat a ni tiila kan sawi sual awm lo e. Min siamtu Pathian meuh pawh hi hmangaihna ah hi chuan a tuiral a, Vantirhkoh chhiarsen loh te’n thlem mahse a hmangaih Mihringte tan chuan mihring ah lo changin Chatuan Nunna min pe a nih hi. Tun lai thalaite hian hmangaihna hi enge ni a kan hriat a engtin nge kan nunpui ve le?

Kan nu leh pa, pi leh pute hun lai ang kha chuan tun lai thalaite  hian hmangaihna hi kan la lungrun tawhlo em tih hi zawhna awm thei leh chhana dik pek har tak a ni ang. Tun hma chuan khawkhat nilo inngaizawng te chu an inhmu khat em em a, lehkhathawn kha a hlu em em thin. Tun ah chuan WhatsApp leh Messenger te hmangin kan thlalak te nen lam kan inthawn thei tawh a. WhatsApp an update hnu phei hi chuan Internet 4G ngat phei chuan 'video’ in kan inbe thei tawh a, kan lungleng vak tawhlo.

Kum 2000 hma lam ah kha chuan kan hmangaihte chu  chhungkaw rethei leh pachhe ve tak, sual ve tak leh innghahna tlak nilo mahse kan duh bur a, chhungte’n an thatlohna min hrilh engang mahse kan hmangaihna ti zual tu mai mai a ni zawk. Kan duhber ten nen a Bahra khur laih kha duh miahlo te nen a Khuangchawi ai khan kan thlang thin a nih kha. Mahse kum 2000 a’n ral chho a, khawvel changkanna te, rethei leh hausa inkar lo hla zel te chuan hmangaihna kan lak dan leh hmangaih tur kan zawn dan a thlak a. Kan hmangaih tak tak hma in an dinhmun kan thlir hmasa in kan hmangaih chawp chho tawh zawk a nih hi tiraw? Building tha tak nei fate hi chuan lo neitu fate nen hian kan in makpa/puzawn thei tawhlo tiila kan tisual lo ang. 

Kan fing chho zel a, kan inneih hun a kan dinhnun tur hisap hmasa in ngaihzawng kan nei a. Rethei taka chhungkaw bul tan ai chuan nuamsa zawk a bul tan kan duh avngin kan hmangaih tur kan zawng thiam tawh hle. Hei hi dinhmun tha leh khawpui a awm te tan chuan a a that em em laiin thingtlang mi, chhungkaw harsa ve tak tan chuan chance a awmlo in kan level pui te bak kan melh ngamlo a. Chuti ang a kan inneihna chuan kan tumloh leh hriatloh hlanin rethei leh hausa te dinhmun kan lo tizau zel a ni. Mahse siamthat ngawt theih pawh ani chuanglo. 

Heti ang class ho hi chuan an bialnu/pa te nen pawh inthen thut mahse an tal buai lo a. Facebook, Instagram leh WhatsApp status ah te pawh an in tih el khum a, Photo upload leh ‘Dp’ ah pawh an bialnu/pa thar te nen an photo an hmang leh zung zung thei  mai. 

Chuti tak a khawvel changkan tawh lai leh hmangaihna pawh a dal tawh hle a kan sawi mek lai chuan thinlung zawng zawng pe, dinhmun leh engmah thlir lo a mi hmangaih ve chawt mai hi kan la awm reng bawk. An tlinlohna te, an that tawklohna leh an thinghlim tawklohna te chu hai der in an tan engkim huam in kan la inpe zo em em. Hmangaihna hi inngaihzawnna  leh induhna ringawt nilo in a aia thuk a nih zia te kan hrechiang a. Kan hmangaihte lak ah kan ipekna a thukin kan beiseina a sang em em a; a zawng zawngin kan inpumpek thin-kan hmangaih tak zet a vangin.  

Inthen chang leh inhauh changte awm mahse hmangaihna leh dawhtheihna nen kan tuar a, kan la beisei fan a. Kan laknat luat ah harsatna awm in kan tuar thiamlo a, mahni nunna hial lakphah pawh kan awm hi. Kan hmangaih te’n mi dang an neih leh an awm dan te kan tuar theilo a, WhatsApp, Instagram leh Facebook lam an activities te chuan min ti tap in nun beidawnna ah min hruailut a, thih duhna hial kan nei thin a, kan thihpah fo. 

An ngaihnep hlawhkhawpin kan hmangaih a, an hma ah kan chhe zo a, kan zahawmna zawng zawng kan hloh thin. Inchhirna te, mahni inrintawklohna ah te min hruai lut a, kan khawvel hi a thim phah thin. Hmangaihlo thut dawn ila kan thei silo a, kan hmangaih ber te hmuhsit kan hlawh ngawih ngawih mai ni.

Hmangaihna vanga thinlung kehchhia, nun beidawng leh hreawm tuar i nih pawhin zak suh. Tuar tawp rawh. Sawi la, share la, bia la, text rawh. I hmangaihloh hma chu i hmangaihloh theih dawnloh avangin chumi hun nghak thleng tur chuan dam lo tum hram hram la, tawngtai lo thlahthlam lo ang che. Kan chaklohna tak hi Pathian thiltihtheihna famkim kan hmuh theihna a nih avangin Lal Isua min hmangaihzia hriatchhuah nan hmang hlauh ang che.