LOVE STORY IN PRESBYTERY

Sumo Counter ah

Zing dar 6 a ni a. Khawthlang lam a zin tum te chu Sumo counter ah chuan an zi nak nak a. Hnam hrang hrang leh tih tur hrang hrang nei, incheina leh rilru inanglo tak tak te chu an awmkhawm a. Rina leh Tetea pawh chuan Presbytery hmang tur in sumo counter-ah chuan an bag ak in Sumo an nghak mek a.

“He Sumo counter hian em ni Bae-i khan Sumo a nghah ve ang? Nimin lam ah khan an khua ah Presbytery hmang turin a chhuk tawh a, tu nen nge an chhuk ang? Kawng a chhia an ti si a, Bae-i chu motor a rui a ngem?”

Chung leh thil hrang hrang ngaihtuah in Rina chuan a suangtuahna chu a kawm melh melh a. Mahse a hmangaih ber chuan a hnawl tawh a, ngaihtuah engang mah se a tello in nun a hmang tawh a, a theihnghilh tawh a, a vei zui ve tawh lo-Bae-i chuan. Chung thil a ngaihtuah thlen chuan a rilru a na in a hnual rawih a, mahse Sumo kal chu a  hun tak avangin a suangtuahna a tang chuan harh in Sumo chhung ah chuan a lut a, Khawthlang lam panin an kal ta a.

Kawngchhia leh Lunglen

Lengpui pelh atang chuan kawng chu a chhe nghal hle a. An chuanpui te lah chuan kawng a la that zawk thu leh a la chhe deuh deuh dawn a ni tih an hrilh chuan kawngchhiat dan tur chu suangtuah dan a thiam lo. Chirhdiak leh tui tling chuan kawng chu a ti nal in kawng tha lai chu a awm zauh zauh zawk.

A vawikhat kalna mah nise nimin mai a Bae-i chhukna a nih avang leh Bae-i te khua an kaltlang dawn avang chuan a ngaihtuahna chuan thil dang a luah zo meuhlo. Nupui ah neih duhin amah ah chuan a lo innghat em em tawh a. Mahse tun ah an inkar chhe leh ta mai chu a hrethiam theilo a, a beiseina chu a la thi theilo.

Mahse WhatsApp-ah a block a, a phone a pick up ngai tawh lo a, mi dang a nei tawh nge a hre lo. Kal san ve tur a thutlukna nghet a siam ve theilochu nep a inti in a inhaw hle.

A hlui theilo

A thinlung na chu a dam tawh teh lul nen, a hmangaih-i te Presbytery ah kher a kal leh tak avangin Rina rilru chu a thar leh vek a. Tap chung leh na chung a lo tawrh tawh dam viau tawh chu phurthak hiah ang main a rilru ah chuan a lo thar leh ta tiam tiam mai.

Tlai dar 4 a ni a. Hospital kawt ah chuan an ding a, thingpui in chuan an chawl a. He khua ngei hi a ni a hmangaih-i te khua chu. Khawilai ah nge an in a awm ang? Tun ah hian enge a tih ang? Nge Presbytery na hmun tur ah chuan an chungkua in an kal tawh zawk? A pa chu Kohhran Upa ah an nemnghet dawn a nih kha.

Chung thil tamtak chu ngaihtuah in vei em em mah se, a tawpna chu-rilru natna a ni. A duh tawh lo a, a kalsan tawh. Harsa in hreawm a pawm a ngai. Pawmlo mah se mi hrang an ni tawh, a vei ve tawh lo. Ngatinge helam Presbytery ah kher an lo tirh le?

Khawthlang ah

Zan dar 10:16 ah Khawthlang Presbytery na tur hmun chu an thleng a. Usher te leh tleirawl ho chuan hlim tak leh phur takin an lo hmuak a. Zan rei pawh sawilo in dawhthei takin an lo la nghak a, an bag te chu khai sak in an thlenin lam pan chuan an hruai a.

“Bae, ka lo thleng tawh sin, khawnge  awm ang? I kal tawh nge in khua ah i la awm? Ka la hmangaih reng che sin. Induh leh biak duhlo che hi ka thiam ve lo a, ka va nep em!”

Hnawl a ni tih a inhria a, a mittui a tla ru fep fep a. Zahpuiawm a inti a, hmeichhe pakhat ve mai a ni tih hi a la pawm ve thei lo. Ngaihnep hlawh khawpa a hmangaih hi chu a lo ring biklo. A theihnghlih hlen emaw a ti a, a lo thar leh si a.

Presbytery Inkhawmpui

Inrinni chu Rorel a ni a. Tetea chuan Vantlang inkhawm ah thu a sawi a, Rina erawh chuan Rorel inkhawm a chu a chhim thung a. Thutna hran an siamsak a, duat tak leh zahawm takin an lo dawng sawng a, phulo a inti hle.  Ni leng in rorel inkhawm ah chuan an awm a. Zan lam ah inkhawm ban ah Fellowship a ni.

Nun beidawng leh khawhar ru taka a awm lai mek pawh chuan Lal Isua’n a awmpui reng tih erawh Rina chuan a theihnghilh ngailo. Immanuel-a thizam a’n tih hla Fellowship ban dawn a an sak chuan a rilru a hnen hle a. A nun sual zia leh bawlhhlawh zia te a inngaihtuah a, mahse Lal Isua chuan a lo la hmangaih reng a ni-

“ Mi sual thi tur an khenbeh khan,
 Chhandamna lui a hmu;

Amah angin sual mah ila,
 Min la ngaidam duh e”

Pathianni ah

Pathianni chawhma chu Kohhran Upa thar nemngheh Inkhawm a ni a, mipui pawh an thahnem hle a. Biakin leh a vel zawng zawng chu an luahkhat a, inkhawm boruak pawh a nuamin Pathian faka lam an tam hle. Rina pawh chuan Lal Isua bak belh tur a neilo tih a inhria a.

“Khawnge i thut ve Bae? I pa chu ka hma lawk a saw a thu a, i nu pawh i pa hnungah chiah a thu sin. Kan inkar boruak that lai te kha nise tiraw?"

Inkhawm report ziah a ngaih avangin chu ringawt chu a ngaihtuah hman lo a, uluk taka Sermon leh mimir che vel en chung chuan report chu a ziak malh malh a. Moderator chuan tawpna hla a thlang a, inkhawm hun serh chu a tawp ta.

Feet 15 lek ah!

Chutia inkhawm service a zawh hnu chuan mipui chu Usher te thu angin a indawt te te in an chhuak a. Rina pawh chu a thutna atang chuan an hawi kual a, biakin hnunglam pandal an zar, a thutna atang a feet 15 emaw lek ah hla ah chuan Bae-i chu a hmasa ber ah a lo thu reng a, an inhmuh hmasak ber a a kawr hak-Chawlhni kawr chu a lo la ha zui a.

A en vang vang a, Bae-i pawh chuan a lo en ve ngei mai, mahse Bae-i chuan a mit chu a la sawn vat a! Theihnghilh hlen tuma a beihna zawng zawng chu chu Feet 15 emaw lek a hlaa a hmuh chhung second 1 ah chuan a chhe leh ta vek mai.

“ Bae, Ka hmangaih che”

A rem tawhlo

Greek exam hma zan chiah a ni a, Rina chuan a huphurh hle a. Presbytery an kalna chuan a rilru a la luah reng a, mahse sawt tawhlo thil ngaihtuah reng erawh a tum biklo-theilo mah se. A rilru chhungril ber ah chuan Bae-i chu a lo let leh a la ring fan a, hlim taka nun bul an tan leh ngei a beisei tlat. Greek bu chu a keu a, chutih lai tak chuan

“In nu nen khan in inthen daih a law? Hei Aizawl ah kan lo kal mek a”  Rina te khaw lam a mi chuan WhatsApp ah a lo inbox nawlh a.

“Aw...July atang khan kan chhia a, engtin nge inhriat? In zawt a mi?”

“Aih...a Dp mi hi a bialpa a nih duh hmel em a”

“Lo sent teh..min block daih a, ka hmu ve theilo a”....WhatsApp ah chuan a lo sent a, Bae-i chuan Mipa dar ah a kiu a nghat a, a mipa chu a sir zawngin  awm thung a,  status ah chuan

 “U are my everthing”

Rina chu khum ah chuan a bawk thlawp a, naktuk ah Greek exzam tur a nei a sin......

Love Story chu

Rina chu Lal Isua tana mi thahnemngailo leh hmangaih let ve lo ber pawl a ni ngei ang. Chuti chung chung chuan Lal Isua chuan a hmangaih em em a, kalbosan in rilru na ngawih ngawih in siam thin mah se Lal Isua chuan a hmangaih tlat a, dawhthei takin a tan a lo let hun tur a nghak tlat ni- a tan a thlang tawh si a.

“Thil dang hi thlang thei ka ni lo Lal Isu. Nang aia hmangaih ka neih hi i phallo a ni. Ka hmangaih ngawih ngawih leh ka innghahna ber chu nangin min laksak a, mahse vui thei ka nilo. Kei mi sual hian nang ka hnaih phahna zawk tur che a ni si a. I hmangaihna ropuizia leh thukzia hre tur hian heti zawng a min la zirtir duh avangin ka lawm e. 

“Isu, i tan ka lo let leh thei a ngem? Khawngaihtak meuh meuh in min ngaidam ang che aw? I rilru ka tina in ka va ti lungngai zing che em! Ka tan a nun hial hlan in min hmangaih a, kei lahin mawl takin ka lo hnawl che a, min ngaidam rawh..khawngaihtakin...min la hmangaih reng em? Ka lo let leh thei a ngem Isu...”

Lal Isua ah chauh

Tling lo leh tluk fawmin Rina chuan a nun a hmang chho a. Lal Isua chuan a en reng a, a thinlung duhzawng pawh a hre reng. Beidawnna vanga mahni intihhlum hial duhna rilru a put lai pawhin Lal Isua chuan hmangaihna nen a chelh reng a, a veng tlat a, a kalsan ngailo.

Kum 5 hnu ah chuan a tlinlohna zawng zawng nen a ngaidamtu Lal Isua chuan a rawngbawltu ni turin a thlang ve anih kha-Rina chu a va lawm em! Lal Isua hmangaihna hi rul let turin lei a a dam chhung hian a daih lo a, Van a chatuan hun pawhin a daih zo ngailo ang.

Mi tling lo leh bawlhhlawh, amah timualpho a ti tap a ti hmingchhe chu tu Lal Isua chuan atan a thlang a, khawvela mi vannei ber  a nih phah ta zawk. Hmangaihna chu Lal Isua hi a va ni em! Love Story ropui ber chu Lal Isua a ni.

Min nei duh a ngem?

A awmna atang a Aizawl a kal leh hmasak ber chuan Rina chuan Bae-i chu a zawng chhuak a. Bae-i chu a kawng Scooty in a sutna kha a na a lo chhuah leh avangin ke in a kal thei tawh lo a, Wheel Chair ah  a lo thu a. Bae-i ni chuan Rina lo kal chu a lo dawng sawng a, chutih lai chuan Bae-i chu Bed Room atangin Wheel Chair nen a lo chhuak mek a.

Rina chuan a mit ah tak pawh a en tha ngamlo a, a ngei in a la haw reng a ngem tih te chu a ngaihtuah ruah rauh a. A coat hak chu siam tha pahin Bae-i hma ah chuan a thingthi a..

“Bae, ka hmangaih che. I tana mi tlinglo tak hi pasal ah min nei duh a ngem?”