KEIMAH

Mi ropui leh mi danglam bik te hian an chanchin an ziak thin a; mi dang in an chanchin an ziah sak thin bawk. Mahse mi ropui lo te pawh hian chanchin hi kan nei ve tho a, min ziah saktu an awm loh avangin mahni’n ka’n ziak ta poh chu ni a, lei chawina tur a awm em lo’ng chu! 

THAWHTANNI AH

Mahatma Gandhi thih ni, ni 30^th January 1989 zing lam ah ka piang a, ka pian tirh hian ka nu leh pa te an la inneilo. Hindu sakhaw rindan pawhin chhuizawm i la, Gandhi thihni ni 30^th January a ka pian avang hian ka ropui chuang lo-Gandhi ka nilo!!! Thingtlang nausen satiah ve mai ka ni a, ka pa te hle bawk.

KA HMING HNAISAILO HI

Ka hming hi ka pute a sak a ni a. A sak chhan min hrilh dan chuan kum 1986 vel a Kanhmun a ka nu nen an awm laia a bialnu, atchilh em em tu hming chawi a a phuah a ni awm e. Kanhmun khaw mi leh sa ka zawh hian, ka hming sak chhan-i chu tun ah hian a la dam in an sawi a, a ni ngei em tih chu ka finfiah hran lo.

DINGKHAWR NGE VEIKHAWR KA NIH?

He zawhna hi chhan harsa ka inti thin. Ka tet lai chuan ka vei ziah a, mahse ka chhungte’n ding ziah min zirtir niin an sawi a, ka ding ziah hlen. Chaw ei nan erawh ka vei lam ka hmang-ka pa pawh a vei bar. Odihsa-a ka awm laiin vei zawng a chaw ka bar chu thingtlang a kan kal hian mak an tiin zawhna min zawh phah fo a. “I inthiar in i kut vei lam in nge dinglam in i mawng i sil?” tiin min zawt tawh a, ka chhang lo na a, ka ngaihtuah in ka vei lam hian ka sil thin tih ka hrechhuak!

Chem hi ka dinglam in ka sat a, mahse Ngunhnam invei ah chhuak dawn ila ka vei lam lo ka hmang thiam lo. Ball pet, Lung vawm, Board pen leh tuan ran na ngai chi thil reng reng ah chuan ka vei lam ka hmang thiam zawk. Mahse thing sat chhum tur chuan ka dinglam kut thlak a na zawk. Tooth Brush te, Bakcheh te, Ara te leh Kuhva cheh te erawh chu ka dinglam in ka ti thin.   Table Tennis hi ka la khello a, khel dawn ta ila dinglam nge veilam hman tur ka hre lo. Kan thenawm tlangval pakhat Messi ngaisang deuh hian vei zawng a ball ka pet thin chu min awt hle!

KA PUMRUA LEH MIZIA

Ka pa lian lo hle. Ka pa ka chen lo a, feet 5 leh Inches 3 chauh ka ni a, ka fuke leh pumrua a la te em em zui. Ka harh a, ka thawveng in ka tawng duh bawk. ‘Khauphar thawven’ hrilhfiahna atan miin min hmang dawn se ka haw lo. Fiamthu ka duhin mi’n min fiam nasa bawk. Ka hang a, ‘Black Theologian, Dalits’ tiin ka classmate te’n min ko fiam thin. 

Vai emaw min ti tawk hi an awm leh nulh thin a. ENT Doctor pakhat chuan ka inentir dawn in ka hming ka sawi a, ‘E..nang chu hnam dang tawng a biak ngai i ni dawn emaw ka tia’ a ti. Ex-Zonet Zonuni Pa hian an inah ka kal tum in polite tak in ‘Kya He?’ tiin min bia a, Mizotawng in ka chhang let. Ka tawng duh lutuk leh fiamthu ka duh lutuk hi a chang chuan over ka inti thin a, ka duh aiin thil ka lo sawi tam hman in mi rilru ka tina ang tih ka hlau hnuhnawh leh thin a, ka inchhir fo. Inhmuam up leh zahawm taka awm hi ka thiam lo.

HMANGAIHNA KA LA NA

Chuti taka thawveng chu niin, Hmangaihna awmzia pawh hreawm a mawilo leh hmeichhia, ngaihzawng aia thiantha a chhuah tam tawh zawk chu nimah ila hmangaihna ka la na lutuk leh ka nep lutuk hi ka inhaw ngawih ngawih thin-ka hming sak chhan pawh kha hmangaihna vang a nih vang te pawh a ni ang! Kum 15 ka nih lai chuan kum 21 ka dam thlen hi ka ring ngailo a, lunglen vang hian Lalzova te ang mai a fam ka chan thuai ka ring thin.

Lungleng mi te hi an luck lo deuh nge ni ka ti thin a. Ngaihzawng lam hian kei pawh ka luck lo in ka riang thei fu a, ka tap zing mai! Fiamthu ka thawh dar dar lai min hmu tute hian rilru na vang a ka tap leh ka lungleng em em thin hi min hmu se an awihlo ang-Dr Jekyll & Mr Hyde kha ka ni ringawt!

Lengzem hla ah pawh a riang lam apiang hi nalh ka tiin ka duh zawk a, Pathian hla ah pawh Hmangaihna lam leh tlinlohna lam hla hian ka nun a chawm zawk. 

RINNA LAM AH

Ka rinloh deuh leh ka beiseiloh takin Kohhran ah ka inhmang ve a. Pathian hi chu ka duh in ka nei tak tak zolo thung. Mahse Pathian erawh hi chuan min lainatin min khawngaih tlat a, ka kalbo san tak tak hi a phal ngailo. Hei kher hi chu ka chiang in ka lawm em em thin a, mahse ka inthlahrung in ka inthiamlo em em thung.

Kohhran lian lo takah kan awm a, paintharna tak tak pawh awmlo khan Kohhran Committee in Kohhran Thalai Secretary an min ruat a, tlinglo tak a inhmang chho chungin ka hriatloh hlan in ka nun a eiral a, Pathian khawngaihna leh hmangaihna vang liau liau in Bacherlor of Divinity te ka zir ve mek ta. Pathian hi a va han tha tak em aw!!!  

Keima duhna leh nuam tih zawng ah te ka kalbo nasa in ka pengkawi nasa a, mahse Pathian hian ka bo hlen loh nan min kai tlat a, a chang phei chuan ka duhloh vanga ka tah hial pawhin a hnuhin min min hnuk thin! Heti tak hian kei tehlul hi min hmangaih a, min kai tawhlo in min hlamchhiah se kei hi boral nghal mai tur ka nih vei nen-Pathian hmangaihna ropui zia hi chu aw!!

KA TAWPNA TUR

Ka tawpna tur hi ka la hrelo a, tunge engkim huam a damchhung kawppui atan min thlang ve duh tak tak ang tih chhana pawh hi ka la hre lo a, ka hmalam hun hi chunglam kut ah a awm a, Amah rin tawp mailoh chu tihtur ka hre lo a, tihtheih ka nei hek lo. Hetah hian ka innghat tawp-tlinglo eng ang mah ila-Sam 37:05.