Thupuan 2:10- “Thih thlengin rinawmin lo awm rawh; tichuan, nunna lallukhum ka pe ang che”
Theological College-a hna kan thawh hian kan zirtirtu te hian mi enzui ngailo a. Kan hna chanpual theuh chu kan thawh that leh chhiat ah a mawhphurtu chu keimahni kan ni a. Kan mawhphurhna min pek theuh ah kan rinawm in mahni pawh inzah ru veng veng thei khawp in hna kan thawk tha em; kan mawhphurhna chu kan kan theihna zawng zawng nen kan hlen chhuak em tih chu mahni ah kan inzawhna a ni thin.
Mizoram Kristian ram ah hian Kristian te hian kan hna leh kan mawhphurhna hrang hrang ah hian kan rinawm in kan puitling em tih hi inzawt ta ila, kan chhanna pek chu a inanglo thei hle awm e. Sorkar hna leh NGO a nihna pawimawh tak tak chelhtu te hi Lal Isua din Kohhran ah pawh nihna pawimawh tak tak chelhtu hi a tam zawk kan nih a rinawm a. Kohhran bel miahlo leh inkhawm ngai miahlo hi chu a tlem zawk kan ni ang.
Kristianna atanga thlir chuan kan ram hi eirukna leh hlemhletna hrang hrang ah hian za ah za chuan fihlim theilo mahila, za a sawmriat tal chuan fihlimtur a ngaih kan nih lai hian kan fihlim lo tih hi kan rindan leh kan nih dan a ni tlat hi ngun taka ngaihtuah chu a ngai niin a lang. Kan sawi tak ang khan Mizoram hmelhmang-hmasawnna leh a than len zelna tura a fawng pawimawh vuan tute hi Sakhaw lam ah pawh a fawng vuantu te tho kan ni a. Kristian chu a theihna zawng zawng a a rin Pathian thu awiha rinawm tur anih laiin kan mawhphurna zawn theuh kan hlen chhuah dan han en hian kan rinawmlo thin tih a lang chiang hle.
Sorkar in ram hmasawnna tur in Project lian tak a kalpui dawn a, tute huan leh ram emaw chu tihchhiat angai thin. Chungmite hnen ah chuan zangnadawmna-compensate pek a han ni dawn a, tun hma a huan leh ram nei ni a kan hriatloh te khan ram an lo nei sup sup a, Sorkar hriatpuina document leh LSC/House Pass te an lo nei dim diam a. Thenawm khawveng te pawhin an awihloh leh mipui pawhin kan rinloh a ni a-an ram neih chu. Chung mite chu han belchiang ila-Sunday Sikul Zirtirtu, Kohhan Upa leh sakhaw mi em em te an lo ni leh tlat zel a. Khawiah nge Lal Isua din Kristian te chu? Eng Kristian nge kan nih?
Kan ram hruaitu MLA te leh Politician te pawh hi Kristian an ni a, a then te chu Kohhran Upa te an ni. Tin NGO ah pawh mi inhmang em em thin leh dikna duh a ram leh hnam vei em em thin an ni bawk. Mahse Politician leh MLA te hi mipuite hian mi rinawm (faithful) niin kan hmu em? Kan thinlung chhung ril ber ah chuan kan MLA te leh Politician te hi eiru turin kan beisei vek em? Chuti ang a thiam taka eiru a; an thiltitheihna leh an hausakna zarzo tum Kristian chu kan ni em? Sorkar hna a min thun thei, kan awm duhna hmun a piang a min sawn kual thei Politician te hi em ni Mizo Kristiante hian kan duh a kan thlan tlin thin? Kan thiamna leh kan theihna in a tlinlo chung chung pawh a kan hmelhriat, kan party mi an nih a vanga hna min petu MLA te hi Pathian malsawmna kan dawnna an ni tak tak em?
Kan thiamna leh kan tlin vang te, rinawm tak leh malsawm tlaka kan thawhrim vangin nge hna kan hmuh-kan hmelhriat neih that vang zawkin? Tun a kan hnathawh mek hi Pathian min pek nge kan hmelhriat Politician te? Chu chhanna chu rinawmna kan teh dan a zir te, Pathian malsawmna kan dawnna hmanrua kan ngaihdan a zir te in a chhanna hrang hrang a awm thei ang nga. Mahse mahni leh thenawmte pawhin kan hna hmuhna chhan ber hi rindan leh ngaihdan an nei thin.
Kan rilru put hmang hrim hrim ah hian Kristian rinawm tak nih a retheih nge kan thlan Kristian dik em em lo, mi tih ang tive a hausa ve thuai thuai duh kan nih? Bazar a kan thlai zawrh leh kan sa buk te pawh a tam lam leh hlut lam phulo a man chhiar a zawrh hi rinawmlohna ah kan ngai lem lo em?Rinawm taka Lal Isua hnungzui hi khawi chin ah nge kan zawm a khawi chin ah nge kan hnawl? Mi hmuh leh a langsar lai a rinawm hi nge a langlo leh tuma min hriatpuilo chung pawh a Lal Isua thuawih vang a rinawm tlat hi hlu zawk? Mi min hriatpuiloh leh tu chan ai mah tih heklo a engmaw lo fanghma no ei hi rinawmna nge rinawm lohna? Dik tak a nun hi mawlna nge mi pawisawina? Nge mi tih ang tih ve zel a rualpawl tawk a dik a, dikloh zeuh zeuh hi kan tih tur zawk?
Mizo Kristiante hi rinawmna ah hian khawiah tak nge kan din? Lal Isua’n rinawm trur a min tihna hi eng chen nge? Khawi chin ah nge kan zawm ang nga khawi chen ah nge kan reh bun dawn? Mahni hlawkpui tur leh kan hamthatna tur ah chuan engkim kan tih hi Pathian malsawmna lo thlen dan tur a ni em? Setana malsawmna kan dawng thei em? Pathian hian tute emaw ‘fair’ vaklo kal tlangin malsawmna hi min vur thei em? Kan hmelhriat te, min duhsaktu te leh miin kan thiltih dikloh an hriat miahlo te hi malsawmna hmanrua a ni em? A chhanna chu kan rin Pathian i zawt ang u.
Comments
Post a Comment