“ISU, MIN THLANG VE MAW?”

Johana 15:16: “ Nangnin mi thlang lo, keiman ka thlang zawk a che u" 

Pathian thu zir ka chak em em lai khan kan zirlai harsat tur zia hi ka ngaihtuahphaklo a, ka hrethiam phak lo hle. Anganwadi-College thleng a English aia Mizo tawng thiam zawk niin Nursery Rhyme pawh “ Are You Sleeping Brother John?” tih chiah Anganwadi kan nih laia ka thiam bak kha thiam lo ka ni a. Sap hla ngat phei chu MLTR leh Bryan Adams te sak kha a ziak en chung in kan sa ve bauh bauh thei a, a thu lah kan lam no-nalhlo in kan lam chang na rawh!

Pathian fakna hla Saptawng a ka sak ve hmasak na ber chu kum 2013-a Haflong Assam-a PRESBYTERIAN YOUTH FELLOWSHIP (PYF) 20^th BIENNIAL CONFERENCE kan neih tum a inkhawmna a kan zai kha ani mai a; chupawh a ziak en chung in kan sa a, a thluk kan bel ve meuh kha chuan inkhawmpui kan tiak zan a ni der tawh. Chuti ang taka saptawng thiamlo chu niin mi zing ah phei chuan kan tawng ngamlo hrim hrim a. Haflong ah pawh khan an sermon sawi zawng zawng ah Pathianni a Rev. VL. Luaia Hranleh in Mizo tawng a minute 15 a thusawi chiah kha a awmzia ka hria!

Chutikhawp a Saptawng lama pachhia ka nih avng chuan Theological College-a Bachelor of Divinity ka’n zir chu ka bo hle a. A mualbo mai nilo in a ram bo in ka bo- Film a mi Rambo erawh ka nilo! Kan hotute thusawi ngun taka ka ngaihthlak hian a awmzia ka hre tep tep zel a. Kan thiante’n zawhna an zawt sup sup a, mi tawng duh em em kha Sap ho vangin Mizo pa hi ka ngawichawi hle!  Chu achhapah kan saptawng hi Chhim lam chhuak ka nih avngin ‘Ț' a lo ri tam em em bawk nen, ka inthlahrun belhchhah hle a, nungchang that hmel takin-mi nuih rual in arkhawthim-nuih in ka nui ve mai mai chu a ni ber e!

Greek mawlh mai hi! A har em em a, Saptawng thiam tel a ngai leh zel nen ka thiamlo hle. Greek ho hrim hrim hi Zirlaibu ah kan zir mithiam ho bak ka hmelhriat lo a. Tunhnai a ka hmelhriat-ka hmel leh nihna a hriat veloh-a chu Samaras, Footballer kha a ni a, Celtic ah pawh  a khel thin tih ka hria.   Pastor ho in Pathian thu an sawi a ‘ A Greek tawng chuan..’ an lo tih fo hi a lo hlu hle tih ka hria a, thiam tur chuan zir ngun leh beihngawrh  a ngaih zia ka hre chhuak a, Pathian thu awmze hriatna bul ber  anih bawk avangin hlu em em a, a thiam tan chuan Bible in sawi a tum leh kawh hmuh min tum te chiang takin an hre dawn ani.

Mi 150 atanga mi 25 thlanchhuah kan ni a. Min thlang chhuak tute hi Pathian in a awmpui a ni tih ka hriat chianna em em chu-mi 25 an thlanchhuah te hi an puitlingin belhchian an dawl hle-kei tiamloh in. Solfa thiam tak tak te an ni a, a then in saptawng an thiam em em a, a then in Music lam an thiam hle bawk. Incheina leh nunphung reng reng ah an zahawmin an puitling hle a. Mi talent nei tak tak te an ni a, an zirchhuahna College pawh a tha tlang hlawm hle a, an lo chhuahna chhungkua pawh a zahawm hlawm hle. Chutah chiah chuan- kei hi tunge ka nih ve?

Chhuan tur engmah neilo, pa te takte, Vai ang deuh, tawng duh deuh, Saptawng thiam lo, Solfa thiam lo-Bass pawh a hla sa thiamlo leh thawhmnaw neilo zet; dry ve ri re deuh ka ni a. Engmah ka nilo takzet tih ka inhria. Kan Class ah kei aia Saptawng thiamlo an awmlo bawk. Chung zawng zawng chu Thla 1 kan awm hnu hian ka hmuchhuak a, tunge ka nih ve a, engtin nge ka lo tel ve tih hi ka inzawt nasa hle. Ka tawngtai tam phah ta fu a-keima tawk ah. Pathian hnen ah Saptawng thiamna te ka dil tawp zel a. Chuta ka rilru a awm ta reng chu Lal Isua’n Johan-a ziak  bung 15:16 a sawi “ Nangnin mi thlang lo, keiman ka thlang zawk a che u” a tih hi a ni. A dik tih hi ka hrechiang hle. Kei tehlul hi Lal Isua’n min thlang lo se ka mihring puite chuan min va thlang lo nasa dawn em! Hetia min thlang ka tih avang hian ka fel vang te, ka phu vang te lam ani lo; khawngaihna vang liau liau a ni zawk. Mi fel, thiamna leh finna lam a mi tling tak tak te phei hi chu Pathian hian a va hmang duh nasa dawn em tih hi ka hriat chhuah phah nasa hle.

Pathian hian kei mai mai pawh min thlang duh a nih chuan nang phei chu a nghak reng che sin. I thiamna te, i finna te kha A ram zauna tur a tan hman a duh a, a nghak reng che a, a thlang che sin. Chu a thlan chhuahna che chu i tihthlawn sak mai dawn em ni? Theihtawp chhuah la, a thlang tu che Lal Isua ram zauna tur hian i pen ang aw? Mi tlinglo leh mi chhe ber ber te thlang duh tu kan Pathian hi fak a va phu em tiraw? A hmanrua ni turin tun ah a thlang che a, tangkai i tum dawn lawm ni? Kan chaklohna zawng zawng a hre vek a, kan thiamna leh tlinlohna te nen lam. Chung zawng zawng nen chuan Lal Isua’n min thlang a sin; hawh i kal ang aw?

Keini aia fing leh fel, thiam leh neinung an awm teuh laiin Lal Isua’n keini tehlul min thlang a, min chhawmdawl a min kaihruai zel turin min thlang ani. Min thlang satliah ringawt lo a, min awmpui a min hruai zel turin a intiam a sin. Tirawh, muang lo i pan ve tawp ang aw? Kan chhiat ang ang hian min pawm a, min hmangaih tlat a, kan tan a nun hial hlan in Chatuan Nunna min pe a sin. Kan thawh ve ngai miahlo in engkim min pe a, min thlang a, min chhandam a sin. Hawh, i kal ve tawp ang. Kan nih ang ang hian min lo duh a, min lo hmangaih reng a sin. Chuti taka min hmangaih tu, keini tehlul min thlang duhtu hi kan pan dawn lawm ni?