UI LEH KEI

Thufingte 12:10a-" Mi fel chuan a ran nunna a engto a"

Mizo te hi ran ngaina tak hnam kan ni a. Kan pi leh pute ațang tawhin ran kan vulh a, chutih rual erawh chuan sa ei duh tak hnam kan ni bawk. Kan pipute hun ah phei chuan Sa kap thei Pasalțha te kan ngaisang hle a nih kha. Tin, kan kut a hleiin Sava leh Thehlei lam chi te han perh leh han kutthakhnawih hrat tak hnam kan ni bawk.

Primary kan zir lai chuan kan zirtirtu te'n Vai ram ah chuan nungcha an tam thu leh an tihnat veloh thu te min hrilh fo a. Zawng leh rannung dangte hi khawlaiah an tlat thu min hrilh fo țhin. Mizoram ah erawh chuan kan khawlai leh kawtthler vel ah nungcha te an vang tawhin an ral ți zo tawh tih chu phatrual a awm awmlo e.

Tin, hnamdangte'n an ei ngai em em loh Ui hi kan ei in kan sa tui tih pawl tak a ni bawk a. Mi tamtak chuan hmangaih leh duat taka an vulh laiin a țhente erawh chuan Zu nena nawmchenna atan a sa an ei fo thung.

Tin, țhenkhat chuan an hlau êm êm a, a seh palh chuan ât a thih phah hial theih a nih avangin an țih hle a. Ui vulh in a len leh tlawh te an hreh phah êm êm bawk. Chutih laiin țangkai taka chhawrtu leh hmangaih taka enkawltu te chuan a hlut zia leh a țangkaizia hi an sawi banglo thung.

Odisha-a reilo te kan awm ve chhung khan Ui vakvai-Street Dog an tihmai tamtak ka hmu țhin a. Chaw eitur an neihloh avangin an cherin an pawr em em a. Hrik tam tak an kai a, an note duhawm tak tak te chu thla hnih khat hnu ah an hrik chuan a ei pawr a, an duhawmna chu an taksa lo pãn chuan a khuh chhe hneh hle țhin.

A ram mipui te chuan an ten em em a. An kawt kai a an bawhhlawh paih an lo hêl ringawt pawhin an hnawt a, an vawm zuang awrh awrh țhin a, ka lo lainat țhin hle. Chutia en reng chu hreawm ka tih em avangin kan inluah bul vel a lo kal țhin te chu kan in neitu te'n remti vaklo mahse luhlul chhuah in kan chaw ei bang nawi te kan pe țhin a. Hmangaihtu chu an hailo kher mai.

Kan in neitu Hindu kulmuk tak tak te pawh chuan min hmusit viauin lang mahse an chhungril tak ah chuan Ui vakvai te pawh hmangaih theihna min petu LAL ISUA neitu kan ni tih an hmuh phah tih chiang takin ka hria-chapona nilo in.

Note a han nei a. Kan in neitu te'n ten viau mahse duat taka kan enkawl tlatna chuan rah a chhuah a, an fapa-patling kum 30 ral kai tawh pawh khan tuk hnih chu Biscuit a lei sak a, a pek nghe nghe kha! Direct in Pathian thu kan hrilh theilo a, mahse Ui vakvai tlawm tak hmangin an thinlung ah LAL ISUA a lo inpuang tih chu ka hrechiang hle!!

Hnam dang ho nen a kan awmho chang te hian Ui vakvai ho chuan Mizo te chu min nêl ta zel a. An dawr a Biscuit-ui eitur kan lei te chu mak ti a an thlir rual in an rilru tak chuan Kristian kan nih an hriat nawn phah fo tih ka hria a. Kan Driver phei chuan Ui nu pakhat min zui rengtu chu kawk in "Zd-a bialnu" tiin min fiam ziah!!

Vaițawngin Pathian thu ka sawi theilo a, mahse Ui vakvai ka enkawlna ațangin Lal Isua neitu nun leh Lal Isua chanchin chu an ngaihven rûk phah tih ka hre chiang hle. Ui vakvai ka enkawl ve mai mai ațangin Chanchin Țha-LAL ISUA hi a neitu te awm dan leh khawsak dan chu tlinglo lutuk in ka puangchhuak ve tih erawh ka inhria-LALPA KA VA LAWM EM!!

Ui vakvai, hrik ngah tak leh rimchhe em em, hmul tlakhawlh nuai mai, hmui hmai sawrbawk lekluk te pawhin an mahni lainattu leh hmangaihtu chu hlau leh țih tak chung pawh a an pan țawk țawk lai hian, kan tan a nun hlan a min hmangaih em em tu, chatuan nunna min petu LAL ISUA hi i pan ve dawn lawm ni?