I TAWNGTAINA KHA

Johana 14:14 “ Nangni’n ka hminga engpawh mi dil chuan chu chu ka ti zel ang”

Lal Isua hnung zuitu te tihtur pawimawh ber leh mawhphurhna lian ber chu Chanchin Tha hril a hi ni tih kan hre theuh awm e. Mi tamtak chuan ringlo mite awmchilh in Pathian thu an hrilh a, chuti ang chuan Missionary tamtak in Chanchin Tha hril in an hun leh nun pum an hlan zo thin a nih hi. Chanchin Tha hril a pen chhuah hian ringlo mite hi Lal Isua hnen awlsam taka hruai hi tun lai khawvel ah chuan a harsa tawh hle a. An nun ah tuihalna emaw a awmloh chuan Pathian nung mamawhlo; an mahni pathian te a innghat tlat hi an tam em em a ni. Tun lai khawvel changkang tawh takah phei chuan sakhaw neilo mihring leh khua hi a vang tawh em em a. An pi leh pu te atanga sakhaw vawn ngheh nei ve tlat-sakhaw dang be duh miahlo an tam hle.

A bik takin India ram phei chu Hindu kulmuk an ni a. An sakhua a upa in Kristian a awm hi an duh lo a, an haw em em zawk tih kan hre theuh awm e. Chutih rualin Mosolman te pawh hian Kristian nen chuan unau kan ni e tiin Lal Isua hi an nei pumhlum duh lo bawk. Khawsak rel leh dinhmun ah mi challang, sum leh pai ngah tak tak te an nih hlawm avang hian Pathian hi mamawh an inti lo a, an pathian  hi run dal ah an be ve lau lau a, hnam tha ho phei chuan Kristiante chu mirethei leh michhe sakhua ang lek ah an ngai nawk a ni.

Chutih rual chiah chuan Missionary te tan nasa takin kan tawngtai thin a. Pathian hian A ram leh a felna puangchhuak tute hi a lo chhinchhiah in, an tan a tawngtai tute tawngtaina hi a chhan hmaih ngai reng reng lo. Kan awmna Orissa ah te pawh keini chu Tribal, North East-mi tamtakin Mizoram pawh an hriatloh leh Indian nive ah pawh min ngaihloh laiin Pathian chuan min tawngtaisaktute tawngtaina hre tlat a. Mosolman leh Hindu chhungkua te pawhin an in a tawngtaiturin min sawm leh tlat thin-Lalpa chu fakin awm rawh se. Chumai nilo in khawvel pumpui a Missionary zawng zawngte pawh an rawngbawlna hlawhtlin theihna chhan chu i tawngtaipuina vang kha ani. Tawngtaina tel lo a mihring theihna leh chakna rinchhan chuan Chanchin Tha a hril theih loh.

Hindu Pu Sandeep Mollick leh a fanu Kajol Mollick in baptistma an chang 

Tawngtaina hian thil a ti thei em em a. Kan phaktawk leh kan tlintawk tlemte in Pathian hnen ah rawngbawlna tur te kan dil a, ringlomi te hmachhawn turin kan dil a. Chuti ang in nasa takin Mizoram mipuite’n min tawngtaipui bawk a. Pathian chuan kan phaktawk leh kan rawngbawl theihna tur tawkin ringlo mi-Hindu leh Mosolman te hmachhawn turin min pe leh zel a, Lalpa chu fakin awm rawh se! An hnen ah kan theihtawp in Lal Isua chanchin te kan hrilh in Bible te kan pe a. Tin Gospel Tract te kan pe a, chuti ang chuan hma la in Pathian zarah Baptistma chang te an awm ve leh hlauh zel a. Hengte hi kan theihna nilo in Pathianin min tawngtaipuina a chhan zel vang ani.

Pathian hming a tih nilo in mihring lam thil tih nise-kan programme siam tamtak ah hian kan mualpo nasa tawhin mi nuih kan tiza zing tawh ngawt ang. Mihring buai tak tak leh hnathawh tur ngah tak tak anni hlawm a. Chhungkaw rethei ve te te-hnathawh reng ngai anni thin. Mahse Pathian chuan a hminga chi kan theh   chu tiak lo a thi turin a lo phal awzawng lo a, kan rawngbawlna tur leh a awm tawk-kan zawhtawk tur mihring min pe zel a, min kohkhawm sak in min hruaikhawm sak zel thin- Lalpa chu fakin awm rawh se! Kan theihtawk beitham te a Chanchin Tha kan hrilh hian nasa taka an thinlung ah hmun a chan a Lal Isua chu an neih theih nan i tawngtaina khan thil a ti thei ber tih hi min theihnghilh sak ngai suh ang che.

I tawngtaina kha a thlawn reng reng lo a. Vawiin thleng a damna leh hriselna kan neih theihna chhan te, rawngbawl na tur a hmachhawn tur leh tihtur lo awm zel te hi i tawngtaina hlu tak rah ani a. Banglo in tihtakzetin min lo tawngtaisak zel ang che. Nangmah kha Lal Isua’n tawngtaina hmanga Chanchin Tha puang darh tur a ruat che i ni tih hi theihnghilh ngai suh. Keini ve chu intawngtaina rah lo tur a hnathawktu ve mai kan ni a. I tawngtaina hlu tak avang a Pathian in a chhiahhlawh nitur a min hman ve mai chuah kan ni a, i tawngtaina tello chuan kan pen thei lo a ni.

I tawngtaina hlu tak avangin thlarau bo tamtakin Lal Isua n neih phah a, chatuan a boral mai tur kha Lal Isua hnen ah i hruaithleng a sin. Chuvangin nasa leh zualin thlaraubo te tan lo tawngtai zel la, Chanchin Tha hriltu hmanraw ropui tak i nih hi hre rengin lo tawngtai sauh sauh zel ang che.