ORISSA KA HMUH VE DAN

Pathian khawngaihna avangin kum 2014 June thla ațang khan Orissa ( A hming thar Odisha) ah tlinglo taka rawngbawlin ka awm ve a. Orissa hi Kristiante tan chuan hriatloh pawh tum ila, a hriatloh theihloh a. Kum 1999 a Australian Missionary Graham Stein te pafa an hal hlum avang khan khawvel a Kristiante zawng zawng chuan an hria ti ila, a sual awmlo e.Tin, kum 2008-2009 ah Hindu ho in an Puithiam, Naxalite hel te'n an thah chu Kristian te thah ah an puh vangin Kristian te chungah phuba la in, mi tamtak in in leh lo an chãn a. Biak in tamtak an hal chhia a, mi tamtak in nunna an chan phah bawk anih kha.

Kum 2008-2009 a Kristian tamtak te an tihduhna leh an tihhlumna hmun, Kandhamal Dist. (Orissa ah hian District 30 a awm) ah hian ka awm mek a, ringtute an tihduhahna suhnu pawh a la awm nual a ni.

Mi tamtak chuan Orissa hi hlauhawm leh ral muanglo,Kristiante tan a awm ngamlohna ang ah an ngai a. A dik a,a hlauhawmin fimkhur taka awm a ngai bawk. Tin, Supreme Court in Anti- Conversion Law a pass bawk a nih kha. Chuti ang khawp chuan an khirh in, Krismas ah pawh Biak in tin ah Police te'n min veng a ni.

Tin, Kristian te'n Programme kan siam dawn pawhin kan fimkhur țhin hle. Ral khat ațanga lo hriat a, lo thlir tu tan chuan Orissa hi hmun ralmuanglo ber pawh a ni ang nga, nu leh pa te tan pawh kan fate Missionary a an kal pawh a kan ngaihtuahna ber hmun a ni ngei ang. Chuvang te pawh a ni ang nge-Pathian zarah țawngțaipuina kan dawng nasa em mai!

Tichuan keima mimal in ka hmuh ve dan sawi ka duh a. Orissa hi India ram mai nilo khawvel ah pawh Pathian hnathawh hmu chiangber pawl anni mai awm mange ka ti țhin a. A chhan chu Ringute khua Rudangia chu tihduh dah a, an in leh lo hal vek an tum laiin, Vantirkoh in Rudangia khaw chunga tlang chung ah a lo veng lai an han hmu tlat mai te hi tun lai khawvel ah chuan Pathian hnathawh lo lang chiang ber a ni awm e ka ti țhin. Tichuan tihduhdah tuma Ringlo mi lo kal khawmte chuan Vantirhkoh chu hlauin an țin darh ta vek mai zuk nia! Lalpa chu fakinawm rawh se!

 Kristian Nu an chehhlumna@ Rudangia

Tin, Kristian Sai kan tih mai te, kum 2009 ah Kristian tiduhdah tute in zawng a chil chhia leh ringtute in zawng a zuah tlat te hi a mak a, a ropui bawk. Chanchinbu hrang hrang ah pawh chiang taka kan hmuh kha, Heti khawp a Pathian hnathawh hmu nasa, tuar nasa leh tawngbaw nasa hi tun lai khawvel ah chuan avang tawh hle ang. Tin, tihduhdah an tawrh hnu hian Kandhamal Dist ah hian Kristian an pung nasa an ti bawk a. An district mipui 70% hi ringtu an ni tawh an ti hial reng a ni. Pathian chu do rual a nilo tih a ang chiang hle. Lalpa chu fakin awm rawh se.

Kristian Sai@ Kandhamal Dist,Odisha

               
 Keini Mizo awmte pawh min dah sangin min zah em em a-Pathian avang chauh in. Ringlo mi zu rui te pawhin min chhaihnawmnah tum mah se, min hrechiangtu (Ringlomi tho) te'n mi pawimawh an nih hi tiin kan thlavang an lo hauh thuai thuai zel mai-Lalpa chu fakin awm rawh se!! Tlangval hawklak deuhin min lo chhaih ve zauh zauh chang a awm a, chu'ng ah pawh chuan mi hrechiangtu Ringlo mi te bawk hian nasa takin kan thlavang min lo hauh sak țhin.

Keima mimal phei hi chu pa te takte, zahawmloh leh zuamawm tak ka ni a. Ka Cycle te hi lock lo in khawlaiah te pawh ka kalsan fo țhin a. Mahse Pathian mite ta a ni tih an hriatchian em a vang

hian min ruksakin, min khawihsak ngailo-a va lawmawm em! Lapa chu fakin awm rawh se!

Heta țang a ka zirchhuah chu, Pathian herchiang leh A hnathawh hmuchiang a piangte hian Pathian hi an lo țih in an lo hlau hle tih hi a ni. Keini ringtute zawk hian kan pawisa lo fo a, kan țihtawk lo fo țhin. Mahse Orissa mipui, ringlo mite pawhin Pathian nung an hlauh zia hi hria ila, an lak ațang hian keini Kristian te hian zir tur kan nei a ni.

Pathian hian a mite hi a hauh in, an tawrhna leh an thihna hi a hrechiang a, a thlawn in a awm tir ngailo tih hi hriatchian phah ila. Engthilpawh a mite hum nan chuan a hmang thei a ni tih i hriatchian phah ang u. Ringo mite pawhin an hlauh leh an țih Pathian, Amah ringtute tan a Awma, Nunga, Thlamuanna Pathian-a kan lo nei hi kan va vannei em!