ANNI LEH KEINI
-Rinfela Zadêng G. Udayagiri, Kandhamal
** Kan pian hmain kan kum aia tam fe hmun danga awm an awm teuh a, kei zawng " Thil kan hmuh leh hriatte hi sawi lovin kan awm thei lo" (Tirh 4:20)**
Rêl : Rêl ah a man tlâwmber chi ' Sleeper Class' ah kan chuang a, thutna changlo tamtak an awm a, Mizo taka thutna inken a awm lo a, inpawh tlâng taka han titî tumah an awm lo.Kan chhukna tur kan hre lo a. Kan thutna pindan a thu ve, kan chhukna a chhuk ve tûr tho chuan, "Chhuk a hun dawn e" tih min hrilh miah lo in a tho nulh a, min chhuk san hmak a. Kan chhukna tûr hmun kan thleng tih kan hriat meuh chuan Rêl a lo tlan tan leh tawh a, Rêl tlân laiin kan zuangthlâ ta a nih kha!
Heta tanga ka hriat chhuah tâk chu: Induhsak, inpawh, intanpuitawn lo hlut zia hi a ni. Hawh u, Mizo te hian midang tanpui i uar sauh sauh ang u.
Zirlai Naupangte tân: Hnamdang zirlai naupang, kum 10 pawh la tlinglo te chu an dîl chhût êm êm a, zirtirtu thil hriat zawng zawng hi hriat ve vek an tum a, zawhna an zâwt reng thîn.
Keini chu kan zak a, kan Zirtirtu te zawnhna kan zâwt ngam lo a, zirtirtu te'n zawhna min zawh kan hlâu zâwk êm êm thîn. Kan Branch zirlai naupangte chuan kan zirtirtu te zawhna zawh hi zak lo in i uar thar ang u. Chutichuan kan zirlai ah kan tui ang a, kan lo hre thûk ang a, lehkhathiam kan lo ni leh zual dâwn a ni.
YMA Hlutzia: YMA hlutzia hi sawi ngailo a chiangsa leh hriat sa nimah se YMA awmlohna a awm chiah hian a chiang leh zual thîn. Harsatna, manganna leh thihna pawh tâwk ila, YMA chuan kawng engkimah min chhawmdâwl a, tlaivar thakin kan lungngaihna min hnêm thîn a ni.
Hetah chuan harsatna tâwk ila, tunge min tanpui ang? YMA ang a englaipawha min tanpui tûra inhumam rêng pâwl emaw, mimal emaw an awmlo a, rilru a thlaphâng duh hlê.
Chuvangin, YMA hi i hlut thar sauh sauh ang u. Kan hruaitute tlinlohna leh fel tâwk lohna ringawt hmú thei êm êm, sawisêl tûr hre êm êm, YMA thiltihna leh chêt vêlna a tel ve ngailo kan nih chuan, insiamtha ila, i tel ve zêl tawh ang u.
Kan hruaitute pawh tang sauh sauh se. Pâwl zahawm leh ropui tak, mi tamtak te innghahna a ni tih hre thar leh i la, kan chêt phung, tawngkam leh nun dân te i uluk sauh sauh ang u.
Mizoram thlamuanthlâkna êm êm chu Pathian leh YMA kan nei hi a ni. Chuvangin kan thilneih hlût pahnih te hi i chawisâng leh zual ang u. Tichuan keini tân leh midangte tân malsâwmna a lo ni zêl ang nga, kan thih hnu ah pawh hmingthatna leh chatuana nunna chu kan ta a ni zêl ang.
Thathna a inlâwmtawn: Thatna a inlâwmtawn pawimawh zia hi Hnamdang bulah a lang chiang hlê. Tlâwmngaihna leh mi tanpui duhna rilru hi, hêng laia mite hian an pu pha lo a. Nimahse, Kan Kristian pui te thatna leh lainatna a kan va hneh hmasak avâng in min tanpui lêt ve duhna rilru kan tuh a, kan tan an inhuam tawh hlê. Km 7 vêl a hlá ah an motor in a thlâwnin min thlah duh hial a ni.
Kan Pipu te'n "Khaw sarih do aiin thenawmte do a hreawm zawk" an lo ti mathláwn lo a. Chuvangin, Mizo taka inpawh a, inngaihsaktawn i uar sauh sauh ang u, a lo hlû in a lo thlamuanthlâk êm mai.
Comments
Post a Comment