ZOBAWM, ZOBAWK GROUP YMA

I DAM TAWH E 

(Fam Tv. R. Lalrintluanga, Executive Committee Member, Literature Sub-Committee, Group YMA Zobawk pualin) 

-Rinfela Zadeng 

Eng vang nge? 

Mihring kan lo pian chhuah hian kan hmalam huna kan thil tawn tur zawng zawng te hi-chiang sa leh kan chanvo ni ngei gei tur hi pakhatmah a awm lo a, kan thawhrimna leh kan taihmakna avangin nihna leh chanvo ropui tak tak te chu kan hlawh chhuak thei. Kan duhloh ber leh kan pumpelh theih hauh loh, mihring kan nih chhunga kan paltlang ngei ngei tur chu-Thihna hi ani. He thihna hian kan chungah ro a rel tawh chuan, hriatthiam a har a, puhmawh tur leh chhuanlam tur kan zawng fo thin. Siamtu Pathian hnenah ‘Eng vang nge?’ tiin zawhna kan zawt a, kan hrethiamlo a, kan tap lo theilo thin. 

Nang Pawh 

Nang ngei paw`n hmachhawp tamtak I la nei a, khawtlang leh kohhran-ah rawngbawlna tur tamtak I la neih mek laiin min kalsan ta mai si a. Keini hi I tello a awm thei tawh tur ah min ngai em ni? Min thihsan mai hi I la tum lo tih hi ka hrechiang a. I damloh laia I pindan a kan lo kal pawh khan, “Ka damloh thu hi Chanchinbu-ah lo chhuah reng reng suh u,” I la tih kha. Khatih lai khan khum-ah I mu a, I bul ah khan kan ri hlut a nih kha! 

Khawnglung Run 

Literature Committee-in ‘Khawnglung Run’ film chhuah kan rel a, kan pahnih a Ticket zawrh kan huphurh zia kha aw..mi hmai zah tina leh mi han bel deuh chawt chawt hreh mi ve ve kan lo ni bawk nen, Ticket pawh kan hralh tlem ber a nih kha. ‘Khawnglung Run’ film kan chhuahna tur a kan hnatlan laia leh kan chhuah zawh hnu a min zilhna kha ka la hre reng. Kei chuan, “Zing kar hnatlan chu, zanin kan mengrei si a, ka tho theilo ang, min lo kai tho la?”ka ti che a. “ Mi ka kaitho ngailo, ka kalsan ang che” I ti a. “Ka thawh hun hun ah ka lo kal mai ang” ka ti a. Nang chuan, “O.B i nih kha hria la, member-te aia kal hmasa tur i nih kha hre reng rawh” min tih kha. Ka hre reng tawh ang.

Rih Dil 

Literature Committee te`n Rih Dil tlawh ve ngei kan tum a, kan kal hun tur te kan sawi dun thin a nih kha. Phur takin kan hnatlang a, kan zavaiin thahnem kan ngai em em bawk. I tello hian kan kal dawn em ni? Ka harsatna leh ka dinhmun engkim I hre chiang a, kan sawi fel vek tawh a, I tello a kal ka hreh a sin. Kan kal hun tur te leh, kal ve ngei I tum thu te, hun thawl deuh ah nise I duhthu min hrilh te kha ka hre reng. Ka dam a ka kal a nih ngai chuan Rih tui ka lo hawn ngei ngei ang che.

I Nihna Hi 

Lansarh tumlo mihring I ni a, mahni intihlar emaw, I theihna neihte emaw hmang a mi hnuaichhiah thin I ni ngailo tih hi ka hria. Kohhran leh khawtlang pawhin I that rukna hi an hmuhmaih lo a, mawhphurhna tamtak pawh I chelh reng a nih hi. Tlang chunga khaw awm chu thuruk theih a nilo an tih angin nang pawh I thatna hi hmuh hmaih rual a nilo. Mihring ve mai I nih avang erawh chuan I famkim vek lo tih erawh ka hria. 

Nagmah ah kei leh I thalaipui tamtak hian entawn tur kan nei a. I nun nem tak leh puitling ru em em si te hi kan hre reng tawh ang nga, kan thinlung ah thu I sawi reng tawh ang. Mi pawsawi hlau tak i nihna te, hotute thu awih thiam tak i nihna te hi, pawl a kan thawh honaah rah tha chhuah tu a ni tih min zirtir chiang hle in ka hre thin.

I Dam Tawh E 

Taksa lamah bawrhsawmna tam tak i nei a, tunah pawh hian I Lung a na ani tih kan hria. I natna avang hian KNP, TKP, Sunday Sikul, YMA leh Kohhran Zaipawl a I mawhphurhna pawh I hlen theilo tih kan hria. Damdawi In ah I lut a, Doctor leh Nurse te, I nu lehpa, I u leh nau leh I thiante`n I dam nan theihtawp kan chhuah mek a ni. Mahse, hengte hi Pathian hian tawk a tilo a, A ni chuan I damhlen a duh a, A hnen a awm a na tuar tawhlo turin a duh zawk che a ni. He lei a na leh fo thin tur te, lungngai leh fo thin tur hian A phal tawh lo che tih hi kan hrethiam tawh a ni. 

I dam tawh a, I na dawn tawh lo tih kan hriat hian kan lawm a. Kan laka I beisei-I hnen a lo kal ve ngei tur a min duhna hi kan lo hlen chhuak ngei bawk ang.

Oct 21, 2012