KHAWVEL CHEN DAN THA
-Rinfela Zadeng G. Udayagiri, Odisha
(Zobawk Vengthlang Branch)
Thuhriltu 11:9,10:- “ Thalaite u, in that lai chen ula, in la naupan viau lai hian hlim rawh u; in thinlung duh zawng chu zawm ula, in mitin a hmuh chak zawng nen chuan; amaherawhchu, chungah chuan Pathian in ro a rel dawn tih hre reng ang che u”
THALAITE KHAWVEL
Khawvel hmasawnna leh changkanna lo thang zel hi nuamti tak leh hlima tak a chen a, a nawmna tak tak pawh pha tu chu kum upa lam tawh te nilo in keini thalaite hi kan ni tih kan hre theuh awm e. Keini Kristian Thalaite pawh hi khawvel chen tur kan ni a, kan chen pawh Pathian in a phal a ni tih Thuhriltu 11:9,11 ah chiang takin kan hmu a. Mahse, Pathian in kan chungah ro a rel dawn tih kan hriat reng erawh a ngai. Kan thalaipui khawvel nawmchen na in a hruai mek te hi engtin nge kan chhanchhuah ang? Kristian Thalaite’n khawvel kan chen dan tur chu enge nita ang?
LAL ISUA TELLO IN
Nula tlangval nih a mahni tawka hmeltha leh ‘luck’ nih ngat chuan LAL Isua tello a khawvel chen hi a chakawm duh khawp ang. Setana’n hian chuti ang titur chuan thiam takin min lo thlem chamchi bawk thin. Kan thalaipui tamtak te chuan Lal Isua telve theihlohna hmunah nawmchenna an zawng ta chiah reng a. Lal Isua tello in an vanglai tawite chu chen in, hmeichhiat mipatna, zu leh sa leh ruihhlo tinreng nen an vanglaini chu an chen ta thin a. An tawpna chu Over Dose, AIDS adt te a ni thin a, a va pawitak em! Nun beidawng in an awm a, an nun hlimna tak tak an hmuh zawh lohna chuan mahni intihhlum duhna rilru an pu a, mahni nunna ngei inlaksakin Setana’n a bum hlum ta thin a, a pawi takzet a ni. Hlima leh lawmna dik ni a an hriat chuan beidawnna vawrtawp ah a hruailut a, Setana chuan an vanglai zawng zawng leh an thlarau nun thlengin a neihsak ta thin a, an khawngaihthlak takzet a ni.
LAL ISUA NEN
Lal Isua nen a vanglai/thatlai chen hi ngaihzawngte nen a chen aiin hlu a, a tlo bawk a ni tih hretu kan ni thei hi kan va vannei teh lul em. Lal Isua tello a khawvel chen tute chuan kum 10/20 emaw an chen chuan an taksa chu hmuhtlak loh khawp a chhia a ni tawh a. An thlarau nun phei chu beidawnna hlirin a khat thin a ni. Lal Isua nen erawh chuan kum 14-40 thlengin taksa leh thlarau ah malsawmna tamtak kan dawng a. Hrasatna leh manganna kan tawh pawhin Lal Isua kan neih tlat avangin kan thla a muang a, thihna kan tawh pawhin chatuan nunna neitu kan ni bawk si a, a va ropui em! Lalpa chu fakin awm rawh se. Nitin zantin min veng a, nupui pasal tur tha tak tak min pe a. Sum leh pai ah hausakna min vur loh pawhin thlarau lam ah nun hauhsakna thuruk in min vur thin a ni. Mite’n he khawvel ropuina leh hausakna chan/hloh anga min ngaiin, sum leh pai tamtak neilo mahila van ah ro chhe theilo khawlkhawmtu kan ni si a. Kan va vannei teh lul em. Nunhlimna thuruk min pe a, rilru hahna nei miahlo a zan ah tui taka kan muhil bawrh bawrh thei te hi Lal Isua kan neih tlatna avang a kan hausakna leh kan hlimna thuruk chu ani si a. He khawvel natna khirh ber ber leh Doctor te tih dam theihloh natna pawhin min tlak buak mahse, chatuan nunna min petu Lal Isua nen chuan engkim kan tithei a, kan natna zawng zawng pawh a ni chuan min tihdam sak thin a. Kan taksa damna min pekloh chang pawn’n kan thalrau damna min pe thin a, englaipaw’n kan mamawhna apiang ah min awmpuiin min chenchilh tlat zel a ni ti r’u.
MISSIONARY NI VE RAWH
Lal Isua nena khawvel chen hi a hnawk lo a, a hnawk chu sawiloh a hlu em em zawk a ni tih hi kan thalaipui la hre velo te hi thahnem ngaitakin i hrilh ang u. Lal Isua’n min hmangaihzia te, Lal Isua nen hian kan thatlai hi a chen theih zia te hi hrilh sauh sauh ila, chu kawng chu thahnem ngaitakin i hrilh ang u. Lal Isua nen a khawvel chen hi khawvel chen dan tha ber leh hlu ber, chatuana nunna neihnna a nih thu hi a hrilhtu leh kawhhmuh tu, zitirtu i ni turin thahnem i ngai zual ang u. Hmusit leh endawng mailo in, ‘Missionary’ rilru puin Lal Isua nen a khawvel chen nawmzia i hrilh mawlh mawlh ang u.
Comments
Post a Comment