'Twinkle, Twinkle, Little Star'

'Twinkle, Twinkle, Little Star' hi ka hriat hmasakna ber chu kum 1999 kuma Class V kan zir laiin kan English bu ah a awm a, 'by heart' kha a la ngai zui a, ka la chhiar thiam thalo leh nghal a. Ka chhiar dan kha ka thiante'n min nuih nasa hle nghe nghe!

He hla hi English Nauawmna hla (lullaby)ah chuan hla lar ber pawl leh khawvel deng chhuak a ni tih hi kan hre theuh awm e. Kum zabi 19 na tir lam a Jane Taylor poem phuah 'The Star' tih atanga lak chhuah niin an sawi a. Kum 1806 ah he hla phuahtu Taylor leh a farnu Ann te'n an poem phuah hrang hrang an lakkhawm an tih chhuah 'Rhymes for the Nursey' a a tel a, a thluk hi French hla pakha 'Ah! vous dirai-je, Maman’ tih thluk atanga an siam niin an sawi bawk.

He hla ‘story’ hi ka ziah tum leh ka sawi tum ber  a nilo a, mahse ka sawi tum tak ka sawi hma in he hla story erawh hi chu kan sawi tello theilo. A chhan chu he hla 'Twinkle, Twinkle, Little Star' tih a ‘Twinkle’ avanga fiam hlawh leh hriat awlsam  em em kan thiannu hming a nih vang a ni!

‘Twinkle’ tih hi Sap tawng nimah se a mikhuallo a, a chunga kan sawi tak Nursery Rhyme vang te pawh a niang kan hriat lar em em ni! Chu ‘Twinkle’ tih chu ka hriat leh hmasakna ber chu Pathian Thu zir tura kum 2016 a kan interview dawn ah a ni. Hmeichhe hming a ni a, kan rilru ah 'Twinkle, Twinkle, Little Star' tih chu a awm nghal. Personal Interview kan neih dawnah pawh kan bulah a thu a, a hming chu kan lam zingin kan fiam laih laih a, a ni pawh chuan a haw chuang lem lo. ‘Twinkle’ hrim hrim hi chu a ‘common’ a, mahse Mizo Hmeichhe hmingah chuan a ‘common’ lo pawl tak a ni ang. Lohtheihloh in ‘Twinkle-i’ chu a hming kan chhinchhiah ta zel a. Personal Interview result a chhuah hnuah pawh chuan Twinkle-i pawh chu a tling tih kan hre ta zel a.

Nula ngo lam leh pumraw lian, hleitling tak leh hmaifang chhe lo tak a ni a. Thenkhat tan chuan nula hmeltha tak te pawh a ni ang. A sam hi a kir deuh lek lek a, a tihkir chawp nge phei chu ka hre lo! Thil pakhat erawh ka hre thin – bak samkir zun a uai chu a na!  

Chutia Pathian thu kan zirpui tur chu tiin Facebook lamah ka’n zawng a, a hming chu kan sawi tak ang khan a ‘common’ loh em avangin zawn chhuah pawh a harsa lo hle. A ni pawh chuan min lo ‘accept’ a, Messeger-ah te kan inbe zui a. Hetih hun lai hi February thla tawp lam a ni a, kan class tan hun tur chu June ah a ni.  Kei ta pek chuan ngamtlak chho nghal in a ‘WhatsApp’ na phone number ka dil a, ka la hre reng min chhan dan kha-

“Ka WhatsApp ngailo!”

Ka awih lo lutuk a, ka ngaihzawn a hlauh avangin min pe duhlo tih ka hre vek. Mahse ngaihzawn ka tum lo hrim hrim! Tun hnua fiamthu a ka chhuahchhalh leh hian nui var var chungin kha tih lai tak khan a WhatsApp a chhiat thu min hrilh thin. A hming avang hian hriat a awl a, mi tam takin an phuah chhan an zawt fo a, tin a an fiam fo thin bawk. 

“Twinkle tih chu thim zinga eng sawi nan an hmang a chuan midang tan thim zingah pawh eng ka nih theih nan,malsawmna ka nih theih nan an phuah” tiin a a sawi a, a hming pum chu Twinkle Lalremruati Hauhnar a ni.

Tun thlenga Lal Isua hnung a zuina kawngah chuan a chhungte’n a hming an phuahchhan ang tak khian a nung tih kei chuan mit ngeiin ka hmu a. Pathian thu a duh em em a, a lam peih em em bawk a. Tin, Pathian faka zai nuam ati em em a, Sap hla leh Mizo hla ah pawh Pathian faka Halleuii’n tui takin a zai thei a. Thenkhat chuan ‘thalarau mi tak a ni’ tiin an sawi thei ang.

Nula a ni a, nula hmelchhe lo leh pumraw zahpuiawmloh tak a ni. Chuvangin mipa amah lo duh der ve tu pawh tamtak a tawng tih hi ka hriatpui a. Chutih rual chuan Pathian thu zir mek a nihna hi a hre chiang em em a, ngaihzawng lam buaipui lo in uluk takin, entawn tlak takin a nun a hmang mek a. Keima mimal tak pawhin ka zahin ka chhuang ru em em a, ka ngaisang hle bawk.

Delhi kan zin tumin pawisa ka neilo tih hi a hre chiang em em a. Min tanpui a duh avangin Pathian hnenah a tawngtai a, Rs. 3000/- ngawt min pe a, lakloh ka tumin Pathian hnenah a tawngtai vek tawh avanga hnar thei ka nih loh zia min hrilh a, lawm takin ka la. Hemi tum hian ama mihring rilru ah chuan pawisa min pek tawp hi a ui ve tih ka hria, a tirah Rs. 2000/- min pe zet a, ,mahse a tawngtaina ah Rs. 3000/- pe tura tih a nih thu min hrilh a, tichuan kan thiante hriat miahlo in Rs. 3000/- lai Delhi ah min pe a, ka lawm zia hi ka sawi lo law law mai ang. Amah avangin Smart Shoe nalh tak Rs. 2000/- man lai mai ka lei theih phah a, tun thlengin Chawlhni a piangin ka la bun a, ka pheikhawk neih tawh ah chuan a man a la to ber  a ni.

Kan phahnih a thla kan lak dun hi ka dah a. A classmate kan lo ni ve te, a bula kan lo awm ve thei te hi vannei ka inti thar thin a. Heti ang nula fel leh hmeltha, Pathian tih em em mai te nena Pathian thu kan zir tlang thei hi hlu ka tih a. Min duhsakna te hi engtikah keimah phei hi chuan ka theihnghilh tawhlo ang.

Twinkle,

I hming an sak chhan ang ngei hian Pathian tana hmaraw tangkai, malsawmna leh mi dangte Lal Isua hnena hruai tlhlengtu, enna petu I ni a, chuti ang ni zel turin duhsakna ka hlan a che.

Ka bem rei tawh che sia, min lo chhang dawn em? (Zawngte Hmaihup 77!)