Hnam dang chu kan sawi theilo ang a, Mizo te bik ah hian kan pian kum diktak ‘Birth Certificate’a dah hi engzat nge ni ang aw tih hi ngaihtuah tham niin a lang a. Fir leh fet takin han in ‘check’ ta ila; tun a hna tha tak nei-kohhran leh khawtlang a mi pawimawh leh zahawm tak tak te hi an kum a over tawh in an hna a tanga an pension hun tawh mi tamtak an awm teuh mai lo’ng maw?
Pathian in kan nu te pum chhung ah a nih dan tur thlap a min siam in kan pian hun tur dik tak thla kaw hnu ah kan piang a. Chu kan pianni chu lawm leh hlim tak a pawm a kan thihni thleng a chhawm tur kan nih laiin kum hnih thum te in kan han sawn tlai ta dawr thin a. Kan pian kum kan sawn ang tak tak ah hian piang ta ila mi pangai kan ni lo ang nga, mi piangsual emaw mi danglam tak emaw kan ni zawk dawn a ni tiraw?
Zirchianna chu awm chiahlo mahse kan pian kum chung chang ah hian khawpui mifing fate aiin thingtlang naupang mawl zawk ni a kan hriatte pian kum hi a dik zawk ngei ang. Pawl Sawm Exzam dawn ah kan pian kum aia kum thum emaw vel a naupang in kan han in ziak ta ngawt a, chuti ang chuan kan document zawng zawng ah kan pianni Siamtu in min pek kum chu ziak diklo in kum hnih-thum a sawn tlai in kan damchhung kan han hmang zo ngawt mai tur hi chu min Siamtu kan tawh hun ah a zahawm duh dawn mang e aw ka ti thin. Dikna leh rinawmna duh Pathian betu kan ni si a,
Pathian in duhtaka min siam in kan piansual a rual kan banloh hlauin thla kaw hnu ah kut ke kim a min pian chhuah tir laiin keini chuan kum hnih thum a sawn tlaiin thla sawmli panga vel ah kan han inpian tir ta ngawt mai a. Thla sawmli panga hi kan nu te hian min pai ta teh reng se kan pian chhuah paw’n kan mak ngawt ang! A rah chhuah chu Sorkar hnathawk te ah thangthar te hna thawh tur a dal a. Kan pianni atangin eirukna nen bul kan tan a, sual zep theih zep duhna rilru kan nei chho nghal a. Chuchuan sual liantham ti turin kan inrin hma in min lo hmin ta thin a ni. Kum thum vel in sorkar sum kan ei ru bawk tihna a ni.
Kohhran hnuai a hna thawkte zing ah pawh heti ang mi hi kan lo awm a nih chuan Pathian sum chu kum hnih thum-kan pian kum kan ziah dikloh zat zel in kan eiruk sak char char a ni a. Ngaihdam dilin Pathian hnen ah kan tawngtai ngai em? Mahni lam fel hmasa zet silo a midang fel tura nawrluih hi a ni lawm ni Lal Isua’n mahni mit a khanchhuk awm hmu silo a mi mit a hmawlhte awm hmu a tih te kha? Vanram a Pathian hnen a chatuan a chawl tur Kristian kan nih avangin dikna hi kan theih chin chin ah kan nunpui tur a ni a, chumi tur chuan Lal Isua pawh hian min zirtir a ni. Kan dikna vang leh kan rinawmna vanga Vanram kai tur chu kan ni hauh lo. Vanram kai tur erawh chuan kan dik a kan rinawm hi angai ani-kawng engkim ah.
Tun ah chuan Sorkar pawhin kan pian kum a la uluk tawh in kan duh hun hun ah kan pian kum kan sawn thei tawh dawn lo a, a lawmawm hle. Ziak in Computer-ah min chhinchhiah sak thlap tawh a, thangthar te chu kan vannei hle a ni. Pathian in kan pianni leh kum fel leh dik thlap in min ruatsak a. Chuti chuan mi pangngai kan ni a, he khawvel hi nuam ti takin kan chen theih phah a. Lawm taka pawm a lawmthu sawi mawlh mawlh tur kan nih lai a kan han zep a kan han sawidiklo ve ringawt hi chu-Anania leh Saphiri te ang a kan boral nghal loh avang hian lawmthu sawi mawlh mawlh tur kan ni!
Tun atang chuan kan pianni dik tak ah kan piang tawh a, kan thihni ah pawh kan kum diktak nen kan thlanlung an lo chei thei tawh dawn a ni. Kan thlanlung leh zel ah pawh dawt an ziah chuan kan inbum hlum thak tihna a ni dawn a, chunglam rorelna ah Setana’n phur over in min lo welcome zui palh ang tih a hlauhawm. Chuvangin kan lo tidiklo a kan lo tisual a nih chuan ngaihdam dil ila, kan bula mi te pawh diktak a awm turin i zirtir ang u. Chuti chuan khawvel ah leh Lal Isua ah kan pianni diktak ah kan piang ang a, tisa leh thlarau ah mi pangngai kan lo ni ang.
Comments
Post a Comment